Tung môi tơdroăng pơkuâ ngăn rơkê plĕng nôkố, tơmâng kuăn pơlê ôh tá xê to pơkâ thế pôu râng, mê ối cho tơdroăng ki pơkâ pêi vâ pơkâ troăng hơlâ tro ƀă tơkŭm pêi pro tơƀrê. Xua rêm rơkong pâ thế dêi kuăn pơlê ôh tá xê tối tơbleăng môi tơdroăng pêi ki nhên, mê ối ‘măn chôu hên mâu tơdroăng ki ăm hlo ‘na ki xơpá cheăng kâ rêh ối pơlê pơla, mâu tơdroăng ki pá puât tung pơla pêi pro troăng hơlâ, thăm nếo cho mâu tơdroăng ki mơni kô trâm tâng ôh tá kơnó nhên ƀă teăm tơleăng tơdrêng.

Tung pơla tơnêi têa pin dế mơdêk rơdêi mơjiâng Tơnêi têa luât pơkuâ xah hô̆i chuh ngiah ƀă pơhlêh xúa kong ngê̆ thong tin tơnêi têa, hnoăng cheăng dêi cheăng tơmâng mâu tơdroăng ki kuăn pơlê pâ thế ôh tá xê to pơtê a tơdroăng tơdah xo hlá đơn, pơtroh rơkong pâ thế lơ chêh xo tŭm mâu tơdroăng ki kuăn pơlê tối. Ngế ki ối a ko Kuô̆k hô̆i hên xôh tối nhên pơkâ thế kal pơhlêh rơdêi chiâng túa tơmiât hbrâ rơnáu ‘nâi nhên tơdroăng, rĕng kơnó tơdroăng ki ai khât ƀă tí tăng ‘nâi plĕng tŏng gum drêng mâu tơdroăng ôh tá tơ’lêi hlâu tơkŭm chiâng tơdroăng ki tôu tung pơlê pơla.

Vâ pêi châ tơdroăng pơkâ thế kố, pôa Trần Thanh Mẫn, kăn xiâm hnê ngăn Kuô̆k hô̆i pơkâ thế: cheăng chêh xo mâu rơkong tơpui tối pâ thế dêi kuăn pơlê kal châ pơhlêh nếo tâi tâng tá hiâm mơno tơmiât ƀă túa pêi cheăng, rĕng ‘nâi nhên mâu tơdroăng ki kuăn pơlê rơhêng vâ, tơdroăng púi tơngah dêi Kuăn pơlê; tơdrêng amê hlối cho troăng tối tơbleăng troăng hơlâ tŏng gum ƀă kế vê ki rơkê tung pơkuâ ngăn tơnêi têa.

“Cheăng tơmâng chêh xo mâu tơdroăng kuăn pơlê pâ thế trâu tâ, ôh tá xê pơtê to a tơdroăng ki tơdah kuăn pơlê, tơleăng đơn, pơtroh mâu rơkong pâ thế. Mê á pơkâ thế tơdroăng ki kuăn pơlê púi rơhêng vâ athế cho ƀâng ki châ hlo hiâm mơno kuăn pơlê, cho troăng hơlâ tối tơbleăng, cho kế ki vê ‘na ki rơkê tung pơkuâ ngăn tơnêi têa. Á pơkâ thế, pôi tá chiâng ăm mâu tơdroăng ki kuăn pơlê rơhêng vâ prôk kơ’nâi tơdroăng hêng hôu. Pin athế tí tăng, ‘nâi nhên tơdroăng ƀă tơpui tối hdrối. Péa cho, tiâ rơkong pâ thế dêi kuăn pơlê athế tơtro tâ. Mâu tơdroăng tiâ mơnhên cho kế vê ki má mơ’nui ôh tá xê to ai hlá mơ-éa tiâ, mê ối cho tơdroăng ki châ tŏng gum lêi tah xơpá há lơ ôh, kuăn pơlê ‘nâi nhên, môi tuăn há lơ ôh”.

Ki khât gá tung pơla hdrối kố nah ăm hlo, hên troăng hơlâ pơkâ, troăng mơ’no ki kân drêng hiăng xúa tung tơdroăng rêh ối hiăng trâm hlo mâu tơdroăng tơdjâk ing pa gong. Ôh tá iâ ki xơpá bu châ kơnó drêng hiăng ai tơdroăng ki pơsăm tối pơsăm tơkêng lơ chiâng tơdroăng ki tôu tung kuăn pơlê. Tung pơla mê, tâng mâu rơkong tối tơbleăng sap ing cheăm bêng rĕng châ tơdah xo, tơpui tối leăng tŭm, pêi klêi mơni kô ‘mâi rơnêu sap ing hdrối, hên tơdroăng ví vâ tơkŭm chiâng tơdroăng tôu, kơdroh tơdroăng ki tơdjâk troh pơlê pơla ƀă pro mơhrê liăn ngân.

Rơhêng vâ tơbleăng tro, athế hmâng tŭm. Rơhêng vâ troăng hơlâ châ xúa tung tơdroăng rêh ối, athế tơpui tơno ƀă kuăn pơlê sap ing tung pơla mơjiâng ƀă tơkŭm pêi pro.

Kố xuân cho túa ki kal vâ rak vế tơniăn tro ki pơxúa pơla Tơnêi têa, kuăn pơlê ƀă khu mơdró kâ, tơdrêng amê hlối ‘mâi mơnhông ki môi tuăn tung pơlê pơla.

Tâng hdrối nah, tơƀrê dêi hnoăng cheăng tơmâng xo mâu rơkong tơpui tối pâ thế dêi kuăn pơlê hmâ châ mơnhên ƀă mâu hlá đơn, mâu hlá mơ-éa tiâ mơnhên lơ mâu tơdroăng ki tơleăng mơnhên, mê nôkố kế ki vê hiăng châ mơdêk chiâng môi kơlo ki a ‘ngêi tâ; kơlo pơkâ tơleăng ai pơxúa khât tơdroăng ki kuăn pơlê hâk vâ. Túa tơmiât kố xuân châ pôa Hoàng Anh Công, Phŏ pơkuâ Vi ƀan tơmâng chêh xo mâu tơdroăng kuăn pơlê pâ thế ƀă Kăn séa ngăn dêi Kuô̆k hô̆i tối nhên:

“Tơdroăng ki kal má môi dêi cheăng tơmâng chêh xo mâu tơdroăng tơpui tối pâ thế dêi kuăn pơlê cho tơdroăng ki hâk vâ dêi kuăn pơlê. Pêi ki klâi, pin athế djâ ki pơxúa ăm kuăn pơlê, ăm tơnêi têa. Drêng kuăn pơlê hâk vâ môi tuăn cho xua tơdroăng hâk vâ mê dêi kuăn pơlê cho tơdroăng pơkâ pêi ki kal má môi ki pin tơmiât vâ pêi tung la ngiâ”.

Drêng rơkong tơpui dêi kuăn pơlê châ tơmâng ƀă pâ thế tơxâng châ tŏng gum teăm tơdrêng, tơdroăng loi dêi kuăn pơlê ƀă Đảng, Tơnêi têa ƀă mâu kơ koan kuăn pơlê pôk kô châ ‘mâi mơnhông. Pơkâ thế dêi Kăn xiâm hnê ngăn Kuô̆k hô̆i ăm hlo: pơhlêh nếo cheăng tơmâng chêh xo mâu rơkong tơpui tối pâ thế dêi kuăn pơlê cho tơdroăng ki pơhlêh nếo tung pơkuâ ngăn tơnêi têa tiô troăng xo kuăn pơlê, khu mơdró kâ cho ngế ki kal.