Hdrối mê, tung pơla pêi cheăng tung kơdrum, pôa Ksor Tân, kot mâ hơnăm 1980, ối a pơlê Sơr, châ ‘no môi plâ ché ƀă kơxêng nhôm mê cho kơxêng mố đô̆i hlâ tơplâ nah. Pôa Tân hiăng tối ăm Khu pơkuâ ngăn Lêng cheăm Ia Boòng ƀă Đô̆i K52 vâ séa ngăn, mơnhên. Klêi po rơdâ kơpong tăng, mâu khu râ pơkuâ cheăng hiăng tơkŭm tăng hlo tơ’nôm 2 kơxêng mố đô̆i rơtế ƀă mâu tơmeăm.

Tiah mê, riân troh hâi lơ 13/8, bú tung to lâi iâ khế tê, Đô̆i K52 hiăng tơkŭm 9 kơxêng kiâ a kơpong pơlê Sơr, cheăm Ia Boòng. Nôkố, mâu kơxêng kiâ ƀă mâu tơmeăm tơdjâk troh dế châ Đô̆i K52 ‘măn rak, tơkôm mơnhên tơdroăng, vâ pơxúa tung mơnhên inâi hơnăm ƀă lăm ‘mé tro tiô luât pơkâ.

-Hâi lơ 13/8, khu mô đô̆i lăm ti tăng dêi Khu hnê mơhno pêi pro ‘’Tơdroăng pêi cheăng 500 hâi măng mơdêk pêi pro ti tăng, tơkŭm ƀă mơnhên inâi kơxêng kiâ mô đô̆i’’ tung bêng Nam Nha Trang, kong pơlê Khánh Hòa, châ hlo mâu kơxêng nhôm cho kơxêng kiâ mô đô̆i a tíu hngêi pơkeăng (hngêi pơkeăng tung kiâp hmố), ối tung Kơpong đông tíu kăch măng Đồng Bò.

Hdrối mê, hâi lơ 4/8, pôa Nguyễn Văn Hưng, 65 hơnăm, ối a Tôh kuăn pơlê kơphô̆ Phước Tân, bêng Nam Nha Trang, tơbleăng tơdroăng troh kơ koan cheăng ‘na tơdroăng nah châ hlo mâu kơxêng kiâ mô đô̆i a kơpong Hngêi pơkeăng drêng lăm tung kong kơtăn kố lối 20 hơnăm. Ing tơdroăng kố, khu kăn ƀô̆, mô đô̆i bêng Nam Nha Trang tơkŭm po hên hâi lăm ti tăng tiô hnê mơhno dêi pôa Hưng. Troh kơxo lơ 13/8, khu mô đô̆i châ hlo mâu kơxêng pui kân, nhôm cho kơxêng dêi kiâ mô đô̆i. Kơpong châ hlo hiăng châ hdró kơpong, gâk kring ƀă tơbleăng râ kăn kơpêng vâ tơkŭm mơnhên, tơpui ƀă pêi pro tiô pơkâ.