Klêi kơ’nâi rêm măng tĭng lăm a têa kơxĭ, tuk dêi kuăn pơlê tơnăng ká xixŏng Đỗ Văn Tiến, bêng Hoài Nhơn Đông, kong pơlê Gia Lai vêh troh a kơno tơniăn, tro pơkâ ƀă tung tuk pêng ká. Tiô pôa Tiến, cheăng tơnăng ká xi xŏng a têa kơxĭ nôkố rế hía rế ai mâu pơkâ ki kơtăng. Mâu tơdroăng ki pro xôi môi tiah tơnăng ká ôh tá ai hlá mơ-éa ăm phêp, tơnăng ká xôi kơpong, xôi cheăng, tơkâ luâ tíu tơkăng kong ăm phêp; ôh tá rak vế tơdroăng ki séa ngăn tung pơla lăm prôk tơnăng; ôh tá chêh ‘măn lơ chêh ‘măn ôh tá tro tơdrăng hâi khế prôk tơnăng; xúa cheăng, kế tơmeăm ki tro mơdât lơ tơnăng ôh tá tro luât a kơpong têa kơxĭ kong têa ê pơrá tro pơxâu phâk kơtăng. Xua mê, cheăng ki ‘nâi nhên mâu pơkâ hiăng chiâng tơdroăng ki kal tung rêm rôh lăm prôk tơnăng a têa kơxĭ.

“Chin phuh hiăng mơ’no hên Pơkâ, khu mố đô̆i gâk tơkăng kong, khu ngế ki lăm ngăn rêm khế pơrá hnê tối troh kuăn pơlê tơnăng ká a têa kơxĭ ngin. Rơhêng vâ tâi tâng vâi krâ kuăn pơlê pêi pro kơtăng, ai tŭm mâu hlá mơ-éa, tơnăng pôi tá pro xôi luât vâ Việt Nam pin rĕng châ tah lôi “Theh trĭng” vâ tê ká xi xŏng ngi kong têa ê châ tơƀrê”.

Xuân môi tiah hên kuăn pơlê tơnăng ká xi xŏng ki ê, Kuăn pơlê tơnăng ká Nguyễn Hữu Kính, tôh 3, Bãi Xếp, bêng Quy Nhơn Nam hiăng cheăng tơnăng ká ing nah, xua mê cheăng pêi pro tro luât ôh tá xê cho vâ ví tơdroăng pơxâu phâk, mê ối vâ rak vế ăm tơná ƀă rak vế túa rêh kâ ối ton troh tá ah.

“Ngin châ Đông mố đô̆i gâk tơkăng kong bo cheăng hnê tối ‘na luât, ‘na pêi pro mâu tơdroăng pơkâ a têa kơxĭ vâ vâi krâ kuăn pơlê ‘nâi nhên ƀă pêi pro ăm tro, pôi tá pro xôi pơkâ. Sap ing mâu plong tuk mơ-eăm pêi pro tro luât châ hnê tối. Mơnê tơdroăng ki tơmâng ngăn dêi kơ koan mố đô̆i gâk tơkăng kong hiăng ăm ngin ‘nâi mâu tơdroăng pơkâ tơdjuôm vâ ngin pêi pro”.

Đăi ŭi Lê Văn Hòa, Ngế séa ngăn Tơkăng kong Mũi Tấn ăm ‘nâi, la ngiâ ah Pơkâ kơxô̆ 246 dêi Chin phuh pơkâ pơxâu phâk liăn ƀă mâu ngế pro xôi ‘na kơvâ tơnăng ká xi xŏng kô châ xêt khât ƀă teăng ăm mâu Pơkâ hdrối nah. Xua mê, khu ki ai tơdjâk troh đi đo hnê tối troh kuăn pơlê drêng vâi chêh pro hlá mơ-éa ăm tung vâ lo lăm tơnăng ká xi xŏng ƀă vêh troh a kơno.

“Ƀă mâu pơkâ nếo ‘na pơxâu phâk mâu ngế pro xôi tung kơvâ IUU mê tíu pêi cheăng hiăng tơbleăng tơkŭm hnê tối tơkŭm ƀă kuăn pơlê ki tơnăng ká xi xŏng klêi kơ’nâi mâu rôh lăm tơnăng ká a têa kơxĭ vêh tơkŭm a kơpong kơno. Ƀă mâu mâu ngế ki pro xôi pơkâ mê tíu pêi cheăng kô pơxâu phâk kơtăng tiô pơkâ dêi luât, hlối tơbleăng ăm kăn pơkuâ kong pơlê vâ rơtế pơkuâ ngăn kuăn pơlê ki pro xôi vâ rak tơniăn tơdroăng ki tah theh trĭng dêi Việt Nam”.

Ƀă mâu Đông gâk tơkăng kong Bo cheăng Kơno tuk Quy Nhơn, tíu pêi cheăng ôh tá xê to hnê tối a kơno tuk, kơpong tíu plong tuk tot mê ối tơkŭm po hên rôh tối tơbleăng luât a mâu tíu ki tơnăng ká xi xŏng. Ki xiâm cho tơkŭm tung mâu troăng pơkâ pơxâu phâk ƀă túa ki pơxâu phâk tơ’nôm ƀă mâu ngế ki pro xôi châ pơkâ tung tơdroăng pơkâ kơxô̆ 246. Trung tă Vũ Đức Tuệ, ngế pơkuâ đông mố đô̆i gâk tơkăng kong Bo cheăng Kơno tuk Quy Nhơn, ăm ‘nâi:

“Klêi kơ’nâi rêm rôh hnê tối kô gum vâi krâ kuăn pơlê tơnăng ká xi xŏng ‘nâi nhên mâu pơkâ luât, ing mê mơdêk ki rơkê plĕng pêi pro tiô tơdroăng pơkâ ƀă hnê tối ăm dêi nhŏng o tung pơla pêi pro. Ing kơthung kơthô điê̆n tưh, mah QR ngin hiăng pơkâ pơtroh ăm vâi krâ nhŏng o mê rơhêng vâ vâi krâ nhŏng o tối tơbleăng tung mah QR vâ ngin pơtroh khu ki ai tơdjâk troh lăm mơnhên, pêi pro tơdroăng pơkâ”.

Gia Lai nôkố ai 3.147 toăng plong tuk tung tâi tâng 3.152 toăng plong tuk lăm tơnăng ká tung têa kơxĭ hiăng krâ ‘măn kế ki séa ngăn tung pơla lăm prôk tơnăng tiô pơkâ.

Pôa Nguyễn Anh Dũng, Phŏ pơkuâ ngăn Khu pơkuâ Kơno tuk kong pơlê Gia Lai, ăm ‘nâi, cheăng hnê tối châ pêi pro đi đo, sap ing plong tuk hbrâ rơnáu vâ lo lăm tơnăng ká troh a rôh vêh tro kơno. Kơnôm mê, kuăn pơlê rế hía rế hbrâ rơnáu pêi pro mâu tơdroăng pơkâ ‘na tơnăng ká xi xŏng, malối cho mâu tơdroăng pơkâ ‘na hbrâ mơdât tơnăng IUU.

“Klêi kơ’nâi hâi khế tơbleăng kuăn pơlê hiăng hlê ‘na IUU mê drêng vêh troh a kơno pơrá pêi pro tro ‘na pêi cheăng xuân môi tiah tơnăng ká xi xŏng, rak tơniăn mâu tơdroăng pơkâ mơ’no. Troh nôkố tâi tâng mâu plong tuk pơrá pêi pro tro, tung la ngiâ ah ngin kô pơtối mơ-eăm tơrŭm ƀă khu ki ai tơdjâk troh hnê ăm kuăn pơlê ‘na mâu tơdroăng ki chêh ‘măn tung điê̆n tưh vâ vâi krâ nhŏng o hlê plĕng tâ ‘na pơhlêh xúa internet ƀă mâu troăng hơlâ pơkâ dêi kong pơlê mơ’no”.

Pơkâ kơxô̆ 246/2026/NĐ-CP kô păng ‘nâng xêt khât sap ing hâi lơ 18/8. Cheăng thăm mơnhông hnê tối, lăm ngăn ƀă pơxâu phâk mâu ngế pro xôi châ khu lêng ki ai tơdjâk troh mơnhên cho troăng hơlâ ki kal vâ mơdêk ki hlê plĕng pêi pro tro luât dêi kuăn pơlê tơnăng ká xi xŏng, mơdât tơnăng ká xi xŏng tiô pơkâ IUU, veăng gum rơtế ƀă lâp tơnêi têa lêi tah tối tơbleăng “theh trĭng” dêi Vi ƀan châu Âu ƀă ká xi xŏng Việt Nam.