A hneăng hôp tơdroăng cheăng rôh má Péa, Hô̆i đong kuăn pơlê kong pơlê Dak Lak hneăng má XI nếo tơbleăng ăm pêi pro Tơdroăng tơbleăng xiâm a rôh hôp pơkâ kơlo mơhá hnoăng liăn ăm mơngế ki veăng pêi hên tơdroăng cheăng a thôn, tôh kơphô̆; tơdroăng pôu râng inâi tơdroăng cheăng ƀă kơlo hnoăng liăn mơhá pôu hnoăng cheăng; tơdrêng amê pơkâ kơxô̆ tơdroăng cheăng, inâi pêi cheăng ƀă kơlo liăn mơhá ƀă mơngế veăng tơdroăng pêi cheăng a thôn, tôh kuăn pơlê kơphô̆ tung pơlê, cheăm.

Tơdroăng pơkâ kố, drêng kăn ƀô̆, kŏng chưk, viên chưk, ngế pêi cheăng râ cheăm lơ ngế pêi cheăng hên tơdroăng cheăng pôu inâi tơdroăng cheăng ki ê pêi kơdroh môi ngế tiô pơkâ mê châ kâ 100% kơlo hnoăng liăn mơhá lơ tŏng gum inâi tơdroăng ki pôu; ngế ki pôu hên inâi tơdroăng cheăng bu châ kâ môi kơlo hên má môi. Kơxô̆ liăn pêi pro châ tơniăn ing kơxô̆ liăn ngân Tơnêi têa pơcháu mơhá mơ’no liăn ngân kong pơlê.

Ƀă mơngế veăng pêi hên tơdroăng cheăng a thôn, tôh kuăn pơlê kơphô̆, kơlo liăn mơhá châ pơkâ rêm khu kơpong pơlê cheăm. Ki nhên, Kăn pơkuâ hnê ngăn Chi ƀô̆ châ kâ hê̆ kơxô̆ 2,8 xôh liăn khế ki xiâm a thôn, tôh kuăn pơlê kơphô̆ khu 1 ƀă 2,5 xôh a mâu thôn pơlê ki ê; Kăn pơkuâ thôn, Tôh trương tôh kuăn pơlê kơphô̆ châ kâ tơdâng 2,7 ƀă 2,3; Kăn pơkuâ Khu pêi cheăng măt trâ̆n châ kâ 2,5 ƀă 2,0 xôh kơlo liăn khế xiâm.