Pơtối mê, Đảng ủy Kŏng an Tơnêi têa, khu râ kăn pơkuâ Khu xiâm Kŏng an hiăng ai troăng hơlâ pêi pro Tơdroăng tơkêa bro mơjiâng 1.400 toăng hngêi kum mâu rơpŏng ai hnoăng tơnêi têa, rơpŏng hdroâng kuăn ngo kơtiê, rơpŏng ai tơdroăng rêh ối pá puât tung kong pơlê Kon Tum. Rêm toăng hngêi ai kơlo tŏng gum 60 rơtuh liăn ing kơxô̆ liăn pơlê pơla xua Khu xiâm pơkuâ Kŏng an mơhnhôk.

Vâ toăng hngêi kân lĕm rơdâ, krá tơniăn tâ kum rơpŏng rêh ối tơniăn ton xŏn, kong pơlê Kon Tum kô mơhnhôk, kơbông krếo tơ’nôm mâu khu râ a kong pơlê tung mê ai tơdroăng veăng gum hâi pêi cheăng, tơmeăm mơjiâng hngêi trăng... Kong pơlê Kon Tum tơkêa xúa kơxô̆ liăn dêi Khu xiâm Kŏng an châ tơƀrê ƀă khŏm kêi đeăng tơdroăng mơjiâng 1.400 toăng hngêi klêi hdrối hâi lơ 30/6 hơnăm kố.

Troh nôkố kong pơlê Kon Tum hiăng mơjiâng nếo ƀă rơnêu châ lối 1 rơpâu toăng hngêi tung tâi tâng kơxô̆ 2.752 toăng hngêi châ mơjiâng nếo ƀă rơnêu.