Khu râ kăn pêi cheăng xua Thươ̆ng tươ̆ng Phùng Sĩ Tấn, Phŏ Kăn tơbleăng tơdroăng cheăng lêng Kuăn pơlê Việt Nam pơkuâ djâ hiăng diâp hngêi tuăn pâ ăm 5 rơpŏng ai hnoăng tơnêi têa, rêm toăng hngêi kơnâ 80 rơtuh liăn, ƀă 10 toăng hngêi tơrŭm môi tuăn ăm mâu rơpŏng kơtiê, rêm toăng hngêi kơnâ 50 rơtuh liăn.

Pakĭng mê, khu râ kăn pơkuâ Khu tơbleăng tơdroăng cheăng lêng ối diâp 50 kơxuô tơmeăm ăm 50 rơpŏng pá puât tung kong pơlê. Tâi tâng ki kơnâ roh diâp hngêi ƀă kơxuô tơmeăm cho vâ chê 1,1 rơtal liăn. Tiô Khu râ kăn pơkuâ Khu xiâm tơbleăng tơdroăng cheăng lêng, Tây Nguyên đi đo châ Đảng, Tơnêi têa ƀă Khu xiâm pơkuâ lêng ngăn cho tíu pêi cheăng ton xŏn ki má môi kal khât ‘na kring vế, gâk ngăn dêi lâp tơnêi têa.

Tíu kố, vâi krâ kuăn pơlê hdroâng kuăn ngo a Dak Lak tối krê ƀă mâu kong pơlê Tây Nguyên tối tơdjuôm đi đo mơnhông hiâm mơno kăch măng, tơrŭm môi tuăn plâ lêng kong têa ê. Tơdroăng kố mơhno nhên tung tơdroăng tơplâ Tây Nguyên, drêng lêng ƀă kuăn pơlê lâp tơnêi têa rơtế veăng tơplâ xâ, châ ƀlêi trâng, tơleăng lĕm peăng Hdroh tơnêi têa, môi tuăn tơnêi.