Châ kăn ƀô̆, mô đô̆i Đông gâk tơkăng kong Đăk Long ƀă Kăn pơkuâ Mô đô̆i Gâk tơkăng kong kong pơlê Kon Tum diâp kơxuô tơmeăm, lôu péa diâp ăm hngêi nếo, pôa A Trỏ, hdroâng kuăn ngo Giẻ – Triêng, pơlê Dục Lang, cheăm Đăk Long, tơring Đăk Glei ôh tá ‘nâi chôu châ xua hơnăm hiăng krâ. Pôa Trỏ tối ăm ‘nâi, hơnăm kố hiăng 84 hơnăm, ôh tá khên tơmiât hiăng krâ tiah kố mê châ rêh ối tung toăng hngêi kân rơdâ, lĕm tiah kố:

“Hngêi ton á mê kong mêi kơchoh, khía mê tơdro. Hngêi nếo châ Tơnêi têa tŏng gum 60 rơtuh liăn, klêi mê mâu muăn mô đô̆i gâk tơkăng kong Đăk Long chiâ pro trêi, mơjiâng pro mơnât, ăm tơ’nôm xơmong klêi mê pêi cheăng gum ôh tá xo liăn. Nếo mơjiâng lối 1 khế mê hiăng klêi. Bu ‘nâi mơnê mâu muăn mô đô̆i gâk tơkăng kong’’.

Cheăm tơkăng kong Đăk Long, tơring Đăk Glei, kong pơlê Kon Tum ai troăng tơkăng kong tơnêi têa xŏn lối 53 km tơkăng ƀă kong têa Lếo. Cheăm ai 2 đông mô đô̆i gâk tơkăng kong, Đăk Long ƀă Rơ Long. Pêi pro hnê mơhno dêi Khu kăn pơkuâ hnê ngăn Đảng Kon Tum ‘nhê tah hngêi ton, hngêi pơtân, hngêi xi kơchoh mơjiâng pro ăm hngêi nếo ăm rơpŏng kuăn pơlê, 2 đông mô đô̆i gâk tơkăng kong tơrŭm ƀă Đảng ủy, khu râ kăn pơkuâ cheăm Đăk Long séa ngăn rêm thôn, mơnhên ai 24 rơpŏng kuăn pơlê kal châ ‘nhê tah hngêi pơtân, hngêi xi kơchoh mơjiâng pro ăm hngêi nếo.

Pôa A Thai, Kăn pơkuâ hnê ngăn Đảng uỷ Đăk Long tối ăm ‘nâi, ƀă tơdroăng tŏng kum dêi kăn ƀô̆, mâu mô đô̆i gâk tơkăng kong troh hâi lơ 1/3, cheăm hiăng pro châ 18 toăng hngêi ƀă mơ-eăm hdrối hâi lơ 30/4 kô pêi kêi đeăng tâi tâng:

‘’Đảng ủy tơrŭm rơtế đông lêng tung cheăm pêi pro môi tuăn sap apoăng troh tá tui lui kơbố ai ki klâi gum ki mê. Ki rơhêng vâ tối mô đô̆i gâk tơkăng kong nhŏng o gum hâi pêi cheăng cho hên. A kố tơdroăng pêi cheăng đông xuân thế mâu kăn ƀô̆, mâu lêng gum ƀă kế tơmeăm khoăng mê cho ƀă liăn mâ kum kuăn pơlê vâ pro ăm kuăn pơlê hdroâng kuăn ngo mơ-eăm hluăn ing kơtiê krá tơniăn’’.

Thươ̆ng tă Đặng Nguyên Hương, Kăn pơkuâ Đảng ŭy, Cheăng kal kí Đông mô đô̆i gâk tơkăng kong Đăk Long, cheăm Đăk Long, tơring Đăk Glei, tối ăm ‘nâi:

‘’Pêi pro tơdroăng ‘nhê tah hngêi pơtân, hngêi xi kơchoh pro ăm hngêi nếo tung cheăm ngin ai pơkâ, tơdrăng pêi tơkŭm mơhnhôk tâi tâng kăn ƀô̆ mâu lêng veăng tơdroăng kố. Ngin tơrŭm krá tơniăn ƀă khu râ kăn pơkuâ hnê ngăn cheăng Đảng, khu râ kăn pơkuâ cheăm Đăk Long pơtroh kăn ƀô̆ mâu lêng tơdrêng veăng chiâ pro trêi hngêi, pơto tơmeăm vâ pro hngêi. Pakĭng mê, ngin tŏng gum xơmŏng, krếo thế mâu khu tŏng gum veăng tơlo’’.

Rơtế ƀă khu râ kăn pơkuâ hnê ngăn cheăng Đảng, khu râ kăn pơkuâ 13 cheăm tơkăng kong ối tung 4 tơring: Đăk Glei, Ngọc Hồi, Sa Thầy ƀă Ia H’Drai, kăn ƀô̆, mâu lêng mâu đông gâk tơkăng kong kong pơlê Kon Tum dế rêm hâi tơdjuôm ivá, veăng gum kuăn pơlê ‘nhê tah hngêi pơtân, hngêi xi kơchoh.

Đăi tă Lê Minh Chính, Kăn pơkuâ Đảng ủy, Chính ủy Mô đô̆i gâk tơkăng kong kong pơlê Kon Tum, tối ăm ‘nâi, drô troăng tơkăng kong hơngế lối 292 km tơkăng ƀă kong têa pú hmâ Lếo ƀă kong têa Kul ai 199 toăng hngêi dêi kuăn pơlê hngêi pơtân, xi kơchoh ƀă ai hngêi kal mơjiâng pro nếo tâi tâng cho 145 toăng.  Ôh tá xê veăng tơlo ivá rơtế khu râ kăn pơkuâ rĕng kêi đeăng pơkâ ‘nhê tah hngêi pơtân, hngêi xi kơchoh pro ăm hngêi nếo, kăn ƀô̆, mâu lêng gâk tơkăng kong ối khŏm mơ-eăm tŏng gum mâu rơpŏng mơjiâng mâu toăng hngêi ƀă ki kơnâ lối kơxô̆ liăn Tơnêi têa tŏng gum:

‘’Pakĭng 60 rơtuh liăn dêi tơnêi têa mê ngin mơhnhôk liăn dêi kăn ƀô̆, mâu lêng mô đô̆i gâk tơkăng kong kong pơlê Kon Tum, mâu khu tê mơdró, mâu khu tŏng gum veăng tơlo pro ti lâi rêm toăng hngêi kơnâ sap ing 85, 90 rơtuh to ngi klêng. Toăng hngêi cho môi tơmeăm ki kơnâ kal khât ƀă tơdroăng rêh ối dêi kuăn pơlê vâ kuăn pơlê ai môi toăng hngêi tơniăn krá kâk, lĕm ƀă tơniăn ton xŏn ăm vâi krâ kuăn pơlê’’.

Ƀă tơdroăng tơdjuôm ivá dêi kăn ƀô̆, mâu lêng mô đô̆i gâk tơkăng kong tơdroăng mơjiâng pro nếo, rơnêu 199 toăng hngêi pơtân, hngêi xi kơchoh pro ăm hngêi nếo a 13 cheăm tơkăng kong dêi kong pơlê Kon Tum dế châ pêi pro rĕng. Tung mê, hên cheăm hiăng châ pơkâ pêi kêi đeăng tơdroăng ‘nhê tah hngêi pơtân, hngêi xi kơchoh pro ăm hngêi nếo ăm kuăn pơlê hdrối lơ 30/4 teăm tơdrêng koh phiu ro leh tơbâ 50 hơnăm tơleăng lĕm peăng Hdroh tơnêi têa môi tuăn tơnêi têa. Troh tâi khế 2 pơla kố nah, kong pơlê Kon Tum hiăng pêi kêi đeăng 879 toăng tung tâi tâng kơxô̆ 2.752 toăng hngêi pơtân, hngêi xi kơchoh kal pro ăm hngêi nếo ƀă rơnêu.