Klêi kơ’nâi hên hơnăm rêh tung toăng hngêi hiăng tơ’nhê hên, kong mêi mê kơchoh, khía pê châ mot tung hngêi, rơpŏng pôa Siu Hoàng (hdroâng kuăn ngo Jarai) ối a cheăm Ia Mơ, tơring Chư Prông, kong pơlê Gia Lai hiăng châ tơdroăng ki pói vâ ai môi toăng hngêi krá kâk, tơniăn. Mot ối tung toăng hngêi nếo xua Mô đô̆i gâk tơkăng kong kong pơlê Gia Lai tŏng gum mơjiâng pro diâp ăm hngêi, pôa Siu Hoàng rơrêk tung hiâm mơno tối:

“Mô đô̆i gâk tơkăng kong, Tơnêi têa tơmâng tŏng gum mơjiâng ăm rơpŏng á hngêi nếo. Rơpŏng á phiu ro, hơniâp ‘nâng’’.

Ing kơxô̆ liăn veăng tơlo dêi kăn ƀô̆, mâu lêng rơtế tơdjuôm ivá dêi mâu khu ngế tŏng gum mơngế pá puât, Mô đô̆i gâk tơkăng kong kong pơlê Gia Lai hiăng tơkŭm mơjiâng 10 toăng kum kuăn pơlê kơtiê a kơpong tơkăng kong. Rêm toăng hngêi châ tŏng gum 70 rơtuh liăn, mô đô̆i veăng tơlo tơ’nôm tơmeăm ƀă hâi pêi cheăng, tơniăn mơjiâng toăng hngêi kân rơdâ tâ.

Đăi tă Trần Tiến Hải, Kăn pơkuâ Mô đô̆i gâk tơkăng kong kong pơlê Gia Lai tối ăm ‘nâi ‘nhê tah hngêi pơtân, hngêi xi kơchoh ôh tá xê to kum vâi krâ kuăn pơlê ai tíu ối krá kâk, tơniăn tơdroăng rêh ối mê ối gum mơjiâng tuăn pâ pơla khu lêng kuăn pơlê thăm tơrŭm, rơtế gâk kring krá tơniăn hnoăng pơkuâ gâk kring tơkăng kong.

‘’Tung mâu hơnăm hiăng hluâ, ngin tơtrŏng tơdroăng kố, vâ krếo tơdroăng veăng gum dêi kăn ƀô̆, mâu mô đô̆i ƀă mâu ngế ki tŏng gum mơngế pá puât. Ngin hlo hnoăng ƀă vâi krâ kuăn pơlê a tơkăng kong, vâ tơbâ tuăn pâ dêi vâi krâ kuăn pơlê ƀă khu lêng gâ kring tơkăng kong’’.

Nếo achê kố Khu xiâm pơkuâ mô đô̆i hiăng ai mơ-éa môi tuăn tơdroăng pơcháu Kuân khu 5, Kuân đoân 34, Ƀinh đoân 15 tŏng gum kuăn pơlê Gia Lai ‘nhê tah hngêi pơtân, xi kơchoh pro ăm hngêi nếo. Ngăn tiô tơdroăng ki ai nôkố, mâu đông lêng rế kum kuăn pơlê mơjiâng pro nếo, vêh rơnêu hngêi ton, rế pêi tiô tơdroăng pơkâ pêi cheăng ƀă tơniăn khât păng ‘nâng. Châ ‘nâi, ahdrối ai tơdroăng ‘nhê tah hngêi pơtân, hngêi xi kơchoh pro ăm hngêi nếo tung lâp tơnêi têa, khu lêng xuân hiăng ai troăng hơlâ tŏng gum kuăn pơlê pro hngêi.

Tiô tơbleăng, 5 hơnăm hiăng hluâ, Ƀinh đoân 15 ƀă Kuân đoân 34 hiăng tơrŭm ƀă khu râ kăn pơkuâ hnê ngăn Đảng, khu râ kăn pơkuâ kong pơlê, séa ngăn, mơjiâng, rơnêu, pro ăm krá lĕm ƀă pơcháu lối 1 rơpâu toăng hngêi ăm mâu rơpŏng kơtiê tung kong pơlê Gia Lai, Kon Tum.

Pơla kố nah, tơdroăng ‘’Khế Pái tơkăng kong’’ xuân châ tơkŭm po a tơring tơkăng kong Đức Cơ, kong pơlê Gia Lai, ƀă hên tơdroăng ki kơnâ, tung mê, ai tơdroăng tŏng gum kuăn pơlê ‘nhê tah hngêi pơtân, hngêi xi kơchoh pro ăm hngêi nếo. Ngoh Đỗ Đức Thanh, Phŏ kăn pơkuâ hnê ngăn cheăng Đoân Droh rơtăm kong pơlê Gia Lai tối ăm ‘nâi.

‘’Ngin xuân mơhnhôk tŏng gum hngêi, veăng tơdroăng tơdjuôm ‘nhê tah hngêi pơtân, hngêi xi kơchoh pro ăm hngêi nếo dế châ pêi pro. Tơdroăng hơnăm kố pakĭng tơdroăng môi tuăn dêi mâu tíu cheăng dêi pơlê kong kân Hồ Chí Minh mê xuân hiăng tơdah tơdroăng môi tuăn dêi mâu tíu cheăng a kong pơlê, ing mê ăm hlo tơdroăng tơmâng tŏng gum dêi mâu khu tơrŭm cheăng, ngế krê veăng kum ăm pơlê xiâm, mơjiâng pơlê xiâm rế hía rế kro mơdrŏng rơdêi’’.

Troh nôkố, kong pơlê Gia Lai hiăng pơxiâm mơjiâng pro nếo ƀă rơnêu lối 2 rơpâu toăng hngêi ối tung Tơdroăng ‘nhê tah hngêi pơtân, hngêi xi kơchoh pro ăm hngêi nếo. Ƀă pơkâ xiâm mơjiâng lối 8.400 toăng hngêi ăm mâu rơpŏng ối tung tơdroăng pêi pro hdrối rơnó mêi hơnăm kố, Gia Lai hiăng mơhnhôk hên kơxô̆ liăn pơlê pơla. Tung mê, môi khu tê mơdró hiăng tơbleăng ăm pêi pro Kơxô̆ liăn ‘’Kum mơngế kơtiê’’ kong pơlê, tŏng gum 10 rơtal liăn; Khu xiâm pơkuâ Kŏng an hiăng tŏng gum lối 201 rơtal liăn ƀă Vi ƀan kong pơlê Gia Lai hiăng xing xoăng 211 rơtal liăn. Vi ƀan mâu tơring, pơlê krâm, pơlê kong kơdrâm châ pơcháu tơrŭm ƀă Vi ƀan Măt trâ̆n Tơnêi têa Việt Nam kong pơlê tơdah ƀă pêi pro kơxô̆ liăn pơlê pơla, rĕng pêi kêi đeăng pơkâ ‘nhê tah hngêi pơtân, xi kơchoh pro ăm hngêi nếo tung kong pơlê. Jâ Nguyễn Thị Thanh Lịch, Kăn hnê ngăn Vi ƀan kong pơlê Gia Lai tối ăm ‘nâi:

‘’Ngin mơnhên pêi pro tơdâng tơ’mô, pá alâi tah a mê. Ngin mơnhên tơkŭm tâi tâng kơxô̆ liăn pêi pro tơdroăng kố. Pơtối mê pakĭng kơxô̆ liăn châ xing xoăng, kong pơlê mơhnhôk mâu khu râ ing khu mô đô̆i, kuăn pơlê, pơlê pơla, ƀă khu tê mơdró vâ rơtế dêi pó mơjiâng hngêi kân rơdâ ăm kuăn pơlê. Kong pơlê Gia Lai pơkâ pêi kơtăng, tiô tối hdrối troh khế 6/2026 kô kêi đeăng tơdroăng ‘nhê tah hngêi pơtân, xi kơchoh pro ăm hngêi nếo tung kong pơlê’’.