Drêng ‘nâi ‘na hlá mơ-éa sôh chêh mâu mố đô̆i ki hlâ dêi on veăng y sih – cho thái pơkeăng Đào Ngọc Thạnh ƀă dược sih Mai Thị Kim Ngân a bêng Cẩm Thành, Quảng Ngãi, rơpŏng jâ Trần Thị Sô a cheăm Tịnh Khê, pơlê kong kơdrâm Quảng Ngãi hiăng lăm troh a tíu vâ séa mơnhên ngăn. A kơxô̆ ki pơxá 46 tung hlá mơ-éa sôh, inâi “Trần Thị Lê” hlo amê, gá bô bối ƀă mâu hlá mơ-éa chêh inâi hlâ ki rơpŏng jâ Sô dế rak ‘măn. Tơdroăng ki vâ ‘nâi sap ing kơtâ hlá mơ-éa ki hiăng vâ prá prăng ôh tá nhên xếo hiăng pro tơdroăng tơngah kân klêi kơ’nâi hên hơnăm tí tăng dêi nhŏng o rơpŏng hngêi. Jâ Trần Thị Sô, o xiâm dêi mố đô̆i ki hiăng hlâ Trần Thị Lê ƀriê lo têa mâ tối:

“Á ro khât drêng tâng tối tơbleăng tăm mơhno tung măng pơlê pơla. Tăng nhên châ inâi Trần Thị Lê mê á ƀriê lo têa mâ xua á phiu luâ râ. Á tơkôm kơnôm nhŏng o dế po tơdroăng cheăng pêi thâ, tăng châ kơxêng kiâ mố đô̆i nâ vêh vâ ‘mế a ilâng kiâ mố đô̆i dêi cheăm”.

Hơnăm kố hiăng 96 hơnăm, la y sih Đào Ngọc Thạnh tuăn ngoâ xuan ối chôu, chôu nhên tíu cheăng dêi Hngêi pơkeăng B23 ƀă tíu ki ‘mế hên mâu vâi pú hơnăm ki mê nah. Pôa ăm ‘nâi, mơ-éa sôh chêh tŭm pơlê xiâm, tíu pêi cheăng, hâi hlâ ƀă hlá mơ-éa chêh pơlât dêi 181 ngế mố đô̆i. Hâi hlâ chêh tung mơ-éa sôh cho rôh ki tơtro mâu mố đô̆i kơtê ihiâm a hngêi pơkeăng, xua mê gá ôh tá tro tâng vâ pơchông ƀă mơ-éa chêh tối ki hiăng hlâ dêi tíu pro đông. Vêh tối nếo ‘na mố đô̆i Trần Thị Lê, pôa Đào Ngọc Thạnh chôu pâ môi tiah in tung ngoâ:

“Trần Thị Lê, tâng ôh ai klâi pơhlêh dêi lêng tơring Trà Bồng mê gá ối a Cà Đam. Mê cho tro khât, á cho ngế ki pêi, tơbleăng ăm rơpŏng vâi i ‘nâi”.

Mâu tơdroăng ki chêh ‘măn rơtế ƀă tơdroăng ton nah dêi pôa Thạnh dế chiâng tơdroăng ki kal khât, gum ăm cheăng pêi thâ 500 hâi măng dêi kong pơlê Quảng Ngãi. Lăm pôu rơpŏng ƀă châ ngăn sôh ki mê, Đăi tă Trịnh Công Sơn, Phŏ pơkuâ hnê ngăn Đảng lêng Khu pơkuâ ngăn lêng kong pơlê Quảng Ngãi ƀriê lo têa mâ drêng hlo tơrêm troăng chư chêh xuân ối môi tiah ton:

“Tung tơdroăng ki tối tơbleăng kố, Khu hnê mơhno dêi kong pơlê Quảng Ngãi kô pơtối séa ngăn, pơchông ngăn ƀă mâu tơdroăng ki hiăng châ tối tơbleăng ƀă pơchông ngăn a lơgât tơnêi tíu. Malối cho séa ngăn tung tơdroăng mơgêi tíu ối ƀă tơdroăng ton nah dêi kong pơlê Quảng Ngãi tung roh tơplâ vâ rah ngăn, pơtối séa ngăn a tíu ki ê”.

Hlá mơ-éa sôh chêh inâi dêi y sih Hngêi pơkeăng B23 hơnăm ki mê nah ôh tá xê cho tơmeăm ki kơnía tung rôh tơplâ, mê dế pêi pro chiâng “plá on” djâ troăng tăng mâu vâi pú. Mâu tơdroăng ki kơnía mê kô pơtối châ khu ki ai tơdjâk troh séa ngăn, mơnhên; veăng pro nhên mâu tơdroăng kal, vâ rĕng djâ mâu vâi ngoh mố đô̆i ki hlâ mê châ rĕng vêh dêi ƀă rơpŏng hngêi ƀă pơlê xiâm.