Tiô tối tơbleăng, troh nôkố tung lâp tơnêi têa hiăng pêi pro klêi, pơcháu lối 65 rơpâu toăng hngêi vâ mâu rơpŏng châ mot ối tung hngêi ki nếo; tơdrêng amê dế pro lối 56 rơpâu toăng. Sap ing klêi kơ’nâi Rôh hôp má 2 (tơdế khế 1) troh nôkố tâk vâ chê 16 rơpâu toăng hngêi hiăng pro klêi ƀă 18 rơpâu toăng hngêi nếo pơxiâm pro.

Tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa tối rơdêi kố cho môi tơdroăng pêi pro ai pơxúa rơkê plĕng khât dêi Đảng ƀă Tơnêi têa pin ăm kuăn pơlê; mơhno tơdroăng ki pâ mơnê kơ mâu ngế ki ai hnoăng hiăng hlâ xua rôh kăch măng dêi hdroâng mơngế, dêi tơnêi têa pin ing mâu chal; Mơhno hiâm mơno tŏng gum dêi rơpó, hiâm mơno tơrŭm tâi tâng hdroâng kuăn ngo.

Xua mê, pin pin bú tơpui ‘na tơdroăng ki pro, pôi tơpui tơdroăng ki pơtê, kố cho tơdroăng pơkâ thế dêi ing plâi nuih. Ki xiâm vâ pro ôh tá pơhlêh, troh hâi lơ 30 khế 10 hơnăm 2025 kô pro klêi tơdroăng kố, tơkéa vâ tối cho hdrối lối 2 khế tâng vâ pơchông ƀă túa pơkâ a rôh tơbleăng kơtăn kố 1 hơnăm.