Tơbâ 78  hơnăm Hâi mâu lêng rong râ hlâ hía kơxo hâi lơ 24/7, a Hà Nội, Khu xiâm ngăn mơngế pêi cheăng tơrŭm ƀă Khu xiâm pơkuâ ngăn lêng, Khu xiâm kŏng an, Vi ƀan kuăn pơlê dêi pơlê kong kân Hà Nội ƀă mâu tíu pêi cheăng ai hnoăng, mơngế ki hlâ tung lâp tơnêi têa. Mâu kăn cho kăn ƀô̆ hơnăm hiăng krâ kăch măng, kăn ƀô̆ veăng lăm pơplâ nah, mơngế ki hlo tơdroăng tơplâ rôh nah hiăng tơbâ tơdroăng tơplâ khên tơnôu dêi hdroâng mơngế, tối mâu tơdroăng ki pơ’lêh tung rơxông mơnhông tơƀrê.

 Tơbleăng a rôh trâm mâ, pôa Tô Lâm - Kăn xiâm pơkuâ hnê ngăn Đảng tối tuăn loi mơnê khât kơ 1,2 rơtuh ngế ki hlâ ai hnoăng, mâu ngế kuăn ki khên tơnôu hiăng tơplâ ta troh hlâ xua vâ tŏng gum dêi tơnêi têa. Kăn xiâm pơkuâ hnê ngăn Đảng tối Đảng, Tơnêi têa đi đo tơmâng khât ‘na tơdroăng pâ mơngế ai hnoăng ƀă pơkâ thế mâu khu xiâm, kơvâ cheăng, kong pơlê pơtối séa ngăn, pê klêi, pêi tro luât pơkâ tŏng gum mâu ngế ai hnoăng, veăng tơbleăng troh lâp lu tơdroăng pêi pro ki lĕm “Ai tơdroăng niân tiah kố kơnôm ai hnoăng vâi krâ nah”  tung pơlê pơla.