Kiơ̆ đơ̆ng Hơnih vei lăng Mơdro sa Đăk Lăk, lơ̆m 9 khei ou ki, akŏp iŏk đei tĕch mơdro tơ̆ teh đak đe kơ dêh char dang 2 ti 300 triu USD, tŏk hloh 6% pơtêng hăm dôm khei ou lơ̆m sơnăm hơdrol. Hơdrô̆ sâu riêng iŏk đei hloh 262 triu USD, tŏk hloh 61 triu USD pơtêng hăm lơ̆m sơnăm 2025. Tơ̆ pơgơ̆r, hơnih mơdro sa pơma tơbăt dôm tơdrong tơnap tap lơ̆m ƀơk ăn kơsô̆ pơkăp tơring pơtăm păng tơdrong chă răt tim mă hơlen kiơ̆ trong pơkoel hơlen băt tơm a la chă. Ƀok Huỳnh Văn Kiều, Kơdră chĕp pơgơ̆r Kŏng ty tĕch mơdro tơ̆ teh đak đe tơmam drăm choh jang sa Hoa Kiều ăn tơbăt:  “Kon pơlei hrei ou tŏk bŏk tơƀơ̆p tôch tơnap tap lơ̆m tơdrong pơm kơsô̆ pơkăp tơring pơtăm lơ̆m mă răt iŏk plei sâu riêng hăm dôm bơngai hlôi đei kơsô̆ pơkăp tơring pơtăm păng dôm bơngai tim mă đei kơsô̆ pơkăp tơring pơtăm adoi nhen lĕ kơjă ưh kơ măh pleh ploh dih băl dôm yơ. Kơyuơ lơ loh ưh kơ lei lăi dih băl lơ̆m tơdrong tĕch tơlĕch tơ̆ teh đak đe, kơ yuơ kơsô̆ pơkăp tơring pơtăm đei ƀơm truh băt hơnih pơtăm, tơm a la chă kơ plei sâu riêng”.

‘Ngoăih tơhlăk tơhlĭn găh kơsô̆ pơkăp tơring pơtăm, hơnih hnam mong sơngieo, vei lăng păng pơm tơlĕch tơ̆ Đăk Lăk oei tim mă gan ‘lơ̆ng. Tơgoăt jang hơdoi ƀar păh tơring pơtăm, hơp tak xah, hơnih tăh ‘nŭng păng hơnih mơdro sa tĕch tơlĕch tơ̆ teh đak đe tim mă kơjăp ‘lơ̆ng; sâu riêng găh lơ tĕch tơ̆ teh đak đe kiơ̆ tĕch plei. Vă hơmet pơ ‘lơ̆ng tơnap tap, bơngai tang măt athei hơmet pơ ‘lơ̆ng tơgoăt jang hơdoi, pơm hơtŏk jang ‘lơ̆ng vei lăng kơsô̆ pơkăp tơring pơtăm păng dăr lăng hơlen tơdrong ‘lơ̆ng; atŏk kơtang tơƀơ̆p dih băl kơtă hăm teh đak đe răt tơmơ̆t vă pơjing đei lơ hơnih răt iŏk.

Vang năm ‘măng pơgơ̆r chehphe bơngai mơdro sa, ƀok Đỗ Hữu Huy, Kơdră chĕp pơgơ̆r Hơnih vei lăng kon pơlei dêh char Đăk Lăk athei rim hơnih bơ̆ jang hơnơ̆ng tơgoăt iŏk nơ̆r tơgop, tơgŭm djru hơnih mơdro sa atŏk tơ iung tơdrong jang sâu riêng kơjăp ‘lơ̆ng: “Dêh char lăng kơjăp truh tơdrong pơm tơlĕch tơmam drăm. Sơnăm ou dêh char hlôi kĭ tơlĕch jang rim hơnih jang kmăi kmŏk pơm tơlĕch tơmam drăm, kơchơ tơm tơ̆ rim hơnih jang kmăi kmŏk pơm tơlĕch tơmam drăm. Lơ̆m khei năr kơnh kăl đei vang iung jang hơdoi đơ̆ng Khul jang sâu riêng lơ̆m tơdrong răt akŏm plei sâu riêng, pơm tơlĕch dăh mă blăh iŏk lom tĕch mơdro tơ̆ teh đak đe dăh mă pơm tơlĕch đei tơmam drăm ‘lơ̆ng hơ iă hloh dơ̆ng, bơ̆n ưh kơ gơh lăp hơnơ̆ng pơtăm đơ̆ng noh tĕch hơyoh plei sâu riêng hơnơ̆ng lơ loh ‘noh ưh kơ đei iŏk jơnei kơtang ôh”.