Ƀok Bùi Đức Quỳnh (48 sơnăm), oei tơ̆ thôn Đắk Tăng, xah Rờ Kơi, dêh char Quảng Ngãi  đei pơgar teh vă jê̆ 20 héctar, pơtăm chehphe păng sâu riêng; lơ̆m noh, sâu riêng đei pơhlom 15 hectar. Sơnăm ou, đei yua đơ̆ng sâu riêng kơ pơgar unh hnam ƀok đei truh 80 tấn, đei xa yua đơ̆ng sâu riêng pơhlom 4 ti hlj. Ƀok Bùi Đức Quỳnh ăn tơbăt, pơtăm sầu riêng athei vei lăng hơnơ̆ng, mă kăl 'noh lơ̆m khei năr pơtơm đei plei: "Sầu riêng đei kơsô̆ pơkăp tơring pơtăm 'noh bơngai răt, hơnih jang mŭk drăm kŭm sơđơ̆ng hloh, kơlih băt đei tơm a la chă tơmam drăm. Ƀơ̆t sầu riêng đei kơsô̆ pơkăp, kơjă tĕch kŭm măt hloh đơ̆ng 1 truh 2 kơjă pơtêng hăm pơgar tam mă đei kơsô̆ pơkăp".

Đơ̆ng minh ƀar unh hnam pơtăm sầu riêng, truh dang ei teh pơtăm sâu riêng tơ̆ xah Rờ Kơi, dêh char Quảng Ngãi brư̆ brư̆ pơih să hăm pơhlom 355 hectar. Atŭm hăm pơih să teh pơtăm, tơring tŏk bŏk oei jang hơdoi hăm hơnih jang mŭk drăm, pơjing mã kơsô̆ tơring pơtăm păng chă hơnih tĕch tơlĕch sơđơ̆ng.

'Nou đei lăng jĭ tơdrong kăp gĭt vă tơm sầu riêng hơtŏk kơjăp sơđơ̆ng. Ƀok Nguyễn Minh Thuận, Kơdră Hơnih vei lăng kon pơlei xah Rờ Kơi, dêh char Quảng Ngãi ăn tơbăt, tơ̆ hơnăp tơring jang hơdoi hăm hơnih jang mŭk drăm vă pơm sơđơ̆ng tơdrong tĕch tơlĕch chehphe păng sâu riêng: “Vă hơmŏ đei hơnih tĕch tơlĕch tơmam drăm pơtăm ăn kon pơlei, tơring oei pơm jang hăm rim hơnih jang mŭk drăm, vă chă răt akŏm, sơđơ̆ng gah tĕch tơlĕch chehphe păng sâu riêng. Mă lei, vă vei sơđơ̆ng 'lơ̆ng, 'noh hơpơi 'meh rim hơnih jang tĕch mơdro păng Hơnih vei lăng kon pơlei dêh char Quảng Ngãi dah đei trong jang kơtang hloh, hơvơn hơnih jang tĕch răt tơmam pơtăm đei, mă kăl noh dôm hơdrĕch 'long xa plei lơ̆m tơring gah Pơmơ̆t, vă vei sơđơ̆ng ăn kon pơlei gơh tĕch tơlĕch tơmam drăm jang đei”

Sâu riêng tŏk bŏk jing minh lơ̆m dôm hơdrĕch 'long pơtăm pơyua lơ gah mŭk drăm tơ̆ tơring Pơmơ̆t kơ dêh char Quảng Ngãi. Dêh char Quảng Ngãi dang ei đei pơhlom 4.150 hectar sâu riêng, lơ̆m noh đei hloh 1.000 hectar hlôi đei plei. Truh dang ei, jơ̆p dêh char đei 23 kơsô̆ pơkăp tơring pơtăm sâu riêng tĕch ăn teh đak đe, hăm teh pơtăm să truh 392 hectar. Kơsô̆ pơkăp tơring pơtăm tơgŭm hiôk hian hloh lơ̆m tơdrong chă dăr lăng trong tơlĕch choh pơtăm, vei lăng 'lơ̆ng tơdrong yua pơgang hơdrông păng hơlen băt tơm a la chă tơmam drăm, pơtrŏ hăm tơdrong tơchơ̆t tơlĕch đơ̆ng hơnih răt tơmơ̆t. Ƀok Nguyễn Hoài Tâm, Kơdră Hơnih jang gah Choh jang xa, Vei lăng 'long pơtăm păng Vei lăng tơdrong 'lơ̆ng kơ dêh char Quảng Ngãi ăn tơbăt, tơchơ̆t jang 'noh ưh kơ đei pơih să teh pơtăm ôh, mă athei tơchĕng truh tơdrong pơm tơlĕch tơmam drăm athei đei hơnih tĕch tơlĕch sơđơ̆ng: "Teh pơtăm sầu riêng dang ei akŏm mă lơ noh tơ̆ dôm tơring gah Pơmơ̆t nhen: Mô Rai, Rờ Kơi, Ia Tơi, Bờ Y, dôm tơring ou jing dôm tơring sơlam. Tơdrong 'noh ăn ƀôh tŏ 'mi kial, teh tơ̆ ou trŏ hăm 'long sầu riêng. Mă lei, ou jĭ 'long pơtăm athei asong jang lơ, athei trŏ hăm ki thuơ̆t choh jang păng athei đei đak ruih sơđơ̆ng, 'noh kon pơlei athei băt hơdah ki thuơ̆t 'noh mă gơh hơtŏk jang kơjăp sơđơ̆ng”.