Tơ̆ hop akŏm, dôm bơngai tang măt akhan, tơdrong ƀơk ăn kơsô̆ chih tơbăt tơring pơtăm păng kơsô̆ anih tăh hơmet tơmam 'noh jĭ tơdrong gĭt kăl vă tơmam choh jang xa đei gơ̆h tĕch mơdro tơ̆ teh đak đe kiơ̆ trong tơm. Mă lei, vă hơtŏk tơdrong đei yoa, rim tơring, hơp tak xah, anih tech mơdro păng bơngai choh jang xa athei vei kơ jăp tơdrong jang, vei lăng ‘lơ̆ng dôm tơmam phă 'long pơtăm, iŏk yua pơgang sơdrông mă trŏ hăm tơdrong hơgăt păng chih tơroi rơđăh rơđong trong jang xa.

Yă Hồ Thị Bích Kiều, Kơdră Anih jang Mŭk drăm xah Ea Knuếc, tơroi dôm tơdrong tơhlăk kăl đei sek tơlang hloi: "Hrei ‘nâu, xăh oei pơmat tat lơ̆m tơdrong chih hơdăh anih dôm pơgar kiơ̆ tơdrong hơgăt, yua ƀơm truh dôm kŏng ti, anih tĕch mơdro cheh phe. Lơ̆m tơring teh dang ei kơ dôm kŏng ti mă lơ ‘nŏh pơtăm cheh phe, mă lei mưh pơm hla ar ƀơk kơsô̆ chih tơbăt tơring pơtăm hơdrô̆ ăn kơ rim kơloăi 'long 'noh đei tơdrong tơhlăk găh hơnăn krao, hơdral hơlam kơ tơring pơtăm. Đơ̆ng dôm tơdrong mơmat âu, tơring kăl đei tơgŭm găh tơdrong jang, pơtho tơƀôh pơm kiơ̆ mă trŏ tơdrong hơgăt".

Dôm bơngai tang măt kŭm roi tơbăt tơdrong hlôh vao đơ̆ng kơdih mưh pơgơ̆r bơ̆ jang păng chă trong tĕch mơdro tơmam tơklep hăm kơsô̆ chih tơbăt tơring pơtăm. Bơngai tang măt anih tĕch mơdro, hơp tak xăh akhan, kơsô̆ chih tơbăt tơring pơtăm lăp đei yua mưh tơmât hơdai hăm tơdrong dăr hơlen đơ̆ng kơdih, chih răk rim tơdrong jang păng iŏk yua ‘lơ̆ng kơmăy chih tơbăt anih jang đei tơmam đĕch. Tơdrong pơm kiơ̆ trong jang 'noh jĭ tơdrong tôch gĭt kăl vă vei lăng đon lui hăm kơsô̆ chih tơbăt tơring pơtăm, găn ƀiơ̆ tơdrong krê kơ anih răt iŏk tơmam đơ̆ng teh đak đe tơkêng dăh mă iŏk pơdreu kơsô̆ chih tơbăt tơring pơtăm.

Ƀok Lê Quốc Thanh, Kơdră Anih pơtrŭt choh jang xa kơ teh đak, akhan, ƀơk kơsô̆ chih tơbăt tơring pơtăm 'nao lăp jing tơdrong mă blŭng đĕch; tơdrong kăl hloh ‘noh jĭ pơgơ̆r jang kiơ̆ păng vei kơjăp kơsô̆ chih tơbăt vă tơmam jang đei gơh hơnhăk tĕch sơđơ̆ng ‘lơ̆ng tơ̆ dôm anih tĕch mơdro: "Bơ̆n athei chih hơdăh đei tơdrong gơ̆h jang, tơdrong đei yua, hơnăp jang đơ̆ng rim bơngai lơ̆m trong jang hơdai. Kơdih kâu bơngai choh jang xa athei băt hơdăh hơnăp jang đơ̆ng kơdih mưh vang jang. Anih tĕch mơdro kŭm thoi noh mơ̆n, mă loi jĭ anih jang kơ teh đak, anih juăt jang, khul pơtrŭt choh jang xa. Thoi noh ‘mơ̆i mă gơ̆h pơjing đei kơsô̆ chih tơbăt tơring pơtăm vă gơh chơ tĕch lơ̆m anih tĕch mơdro".