‘Nâu jĭ tơdrong tôch hơiă, pơih dơ̆ng tơdrong ‘lơ̆ng vă hơnhăk plei sầu riêng Đắk Lắk tĕch tơ̆ Trung Quốc kiơ̆ trong tơm. 140 kơsô̆ chih tơbăt tơring pơtăm đei ƀơk akŏm đĭ đăng teh xă hlŏh 4.300 ha; păng 31 anih tăh hơmet plei sầu riêng hơdrih, akŏm đĭ đăng hnam xă hlŏh 91.000 m², đei kơsư̆h tăh dang 5.500 tân 1 năr. Dang ei Đắk Lắk đei dang 44.000 ha sầu riêng, plei phĕ đei sơnăm 2026 dang 500.000 tân.

Adrol kơ ‘măng kĭ ăn ‘nao, dêh char đei 280 tơring pơtăm hăm teh xă dang 7.500 ha păng 41 anih tăh hơmet plei ‘long hơdrih đei ƀơk ăn kơsô̆ vă tĕch tơ̆ teh đak đe. Tơdrong ƀơk thim 140 kơsô̆ tơring pơtăm păng 31 anih tăh hơmet vang tơgŭm ‘lơ̆ng ăn tơdrong tĕch mơdro tơ̆ tĕh đak đe kiơ̆ trong tơm, atŭm hăm ‘nŏh pơjing dơ̆ng tơdrong ‘lơ̆ng vă dôm tơring pơtăm, anih tĕch mơdro pơm lăp hăm nơ̆r athei roi đunh roi kơhret đơ̆ng anih tĕch mơdro păih Trung Quốc.