Vă đei đăi tơdrong hơrih mah mai nhen năr ‘nâu, klo kăn ‘nhŏng Đường păng mŏ Nẫm tơ̆ thôn 4, xăh Trà Tân, dêh char Lâm Đồng hlôi athei yak hloh dôm khei ‘năr gleh hrat, mơmat tat chă jang sa. Tơdrong tôch kơ hiă tơ̆ klo kăn ‘nhŏng Đường păng mŏ Nẫm, ‘noh jĭ jơhngơ̆m yak hloh mơmat tat, tơdrong vang drơ̆ng kiơ̆ băl păng hơdrin jang chŭn mir roh vă klăih đơ̆ng dơnuh hin păng yak tŏk sơđơ̆ng tơdrong hơrih sa.

Đơ̆ng 2,3 sao teh blŭng a đơ̆ng mĕ ƀă 2 pah chĕng song ăn, bre klo kăn sư hơdrin tơplih ‘long pơtăm vă hơtŏk iŏk yua. Đơ̆ng pơtăm ƀa, tiu, cheh phe, truh pơtăm điều, rơngâu, hơƀo,... ƀôh ‘long hơyơ đei kơjă ‘noh măr sư pơtăm, hơmet ming teh, hơtŏk plei lơ hai, pơm jên iŏk yua ăn unh hnam hai.

‘Ngoăih kơ choh pơtăm, klo kăn măr sư oei rong bơ̆n nhŭng, rơmo, pơbe,... Ƀơ̆t đei tơmam sa, tơmam ‘măn, măr sư răt dơ̆ng teh vă pơih să choh jang sa. Dang ei unh hnam bre sư đei 6 hek tar điều tŏk bŏk đei plei, 1 hek tar chŭn na, 2 hek tar teh pơtăm kơđeh năr nhen hơƀo, rơngâu, tơh,... ăn iŏk yua sơđơ̆ng vă jê̆ kơhrĕng triê̆u hlak jên rim sơnăm.

Mŏ Võ Thị Nẫm tơbăt, ƀôh kơjă cheh phe tơjê̆ âu tŏk hơlơ̆k dơ̆ng, unh hnam sư hlôi pơtăm hơlam ‘long cheh phe lơ̆m pơgar điều păng vă pơtăm dơ̆ng tiu tơdăh kơjă tĕch sơđơ̆ng.

 “Ƀơ̆t hơdrol kơ pơtăm tiu, cheh phe kŭm đei iŏk yua lơ, mă lei tiu ưh kơ đei tơdrong kơjăp nhen ‘long cheh phe hăm ‘long điều, kơna klo kăn nhi tơplih jing pơtăm điều đĭ. Păng dang ei tŏk bŏk ăn iŏk yua. Klo kăn nhi kŭm jô̆ hơlen lăng bơih mă pơtăm thim ‘long cheh phe hloh 1 hek tar lơ̆m pơgar điều. Tơdăh hiôk hiăi ‘noh đơ̆ng rŏng âu gô phă điều pơtăm hơlen tiu lơ̆m ‘long cheh phe”.

Vă jang sa đei iŏk yua, klo kăn măr sư hơdrin vang năm hŏk dôm lăm pơhrăm, iŏk yua dôm khoa hŏk ki thuơ̆t ‘nao kŭm hăm ‘noh jĭ chă hơlen lăng păng băt hơdăh anih răt rim kơloăi tơmam đơ̆ng choh jang sa đei hrei ‘nâu vă đei trong tơplih ‘long pơtăm trŏ lăp, hơnhăk ăn iŏk yua mŭk drăm lơ.

‘Nhŏng Võ Văn Đường tơroi, klo kăn sư hơdrol sơ̆ kŭm pơtăm tiu, cheh phe mă lei đơ̆ng rŏng khei ‘năr tiu, cheh phe tă kơ jur kơjă ngăl, kơna mă phă tiu, cheh phe tơplih jing pơtăm hơƀo, điều, yua kơ ƀơ̆t kơplăh doh điều đei kơjă.

“Dang ei ĭnh jang kiơ̆ pơtho đơ̆ng kang ƀô̆ choh jang sa jang kiơ̆ tơdrong jang pơtăm điều rơgoh, ưh kơ gan yua phŏng hoă hŏk, găh lơ yua mơ̆r, hơnong,... ƀôh kŭm đei iŏk yua. Pơma atŭm, hrei ‘nâu jang kiơ̆ khoa hŏk păih anih pơtrŭt choh jang sa pơtho ăn ĭnh jang ƀôh đei iŏk yua hloh”.

Vă hơtŏk iŏk yua choh jang sa, klo kăn măr sư ưh kơ đei lai yơ ăn teh pơdơh, tơdrong jang mir roh hrăt hrot prăt sơnăm, đĭ kăt yuă ƀa, điều truh hơƀo, rơngâu. ‘Nhŏng Đường tơbăt dơ̆ng, pơyan rơngâu âu ki đei kơjă hloh 60 rơbâu hlak jên 1 kĭ, unh hnam sư đei iŏk yua tôch kơ sơđơ̆ng.

“Kŭm ‘meh vă Teh đak bơngơ̆t truh, păh anih jang choh jang sa pơhrăm dôm hơdrĕch ‘long pơtăm trŏ lăp, đei iŏk yua hai kĕ tơjră tŏ phang, đei đei kơjă sơđơ̆ng hơnhăk ăn iŏk yua mŭk drăm lơ hloh hai”.

Ưh khan lăp jang mŭk drăm hơgei, unh hnam bre sư oei pơm jŭk yŭk trong hơlâu lơ̆m dôm tơdrong jang tơ̆ pơlei, xăh, nhen: vang jang pơjing tơring tơrang ‘nao, pơjing unh hnam oei sa ‘lơ̆ng hơiă, băt 1 jơhngơ̆m đon, tơgŭm kon pơlei vă vang hơdai băl hơtŏk tơiung. Tơroi găh jơhngơ̆m đon khŏm yak hloh mơmat tat jang tŏk đơ̆ng klo kăn ‘nhŏng Đường păng mŏ Nẫm, ƀok Lâm Văn Nhu, Bơngai pơgơ̆r thôn 4, xăh Trà Tân, dêh char Lâm Đồng tơbăt:

“Lơ̆m thôn 4 đei klo kăn Võ Văn Đường jĭ unh hnam kon pơlei jang mŭk drăm hơgei, ƀơ̆t blŭng, unh hnam kŭm tôch kơ mơmat tat, mă lei truh dang ei muk drăm unh hnam hlôi hơtŏk tơiung sơđơ̆ng, gơnang đơ̆ng pơtăm điều, rơngâu, hơƀo, ƀa,... Kon sư đei 1 ‘nu năm pơm linh kŏng an, 1 ‘nu năm pơm ƀô̆ đô̆i. Pơđĭ bre klo kăn sư tă hơdrin jang sa ngăl, hnam đei 5-6 hek tarđiều, mŭk drăm tôch kơ sơđơ̆ng”.

Klo kăn ‘nhŏng Đường păng mŏ Nẫm jĭ dôm kon pơlei jang chŭn mir pơnam, hơdrin jang tơ̆ groi teh kơdih, kơna ưh khan lăp klăih đơ̆ng dơnuh hin đĕch mă oei yak tŏk jing unh hnam đei ƀôh, đei lơ kon pơlei lơ̆m pơlei đĭ jơhngơ̆m pơ ư, lăng jĭ bơngai jang ‘lơ̆ng vă hŏk pơhrăm păng jang kiơ̆.