Lăp oei pă hloh 1 giĕng dơ̆ng, Lêh Sầu riêng Đắk Lắk 2026 gô pơtơm pơgơ̆r pơih blŭng hăm 17 tơdrong jang pơgơ̆r tih. Đắk Lắk yak truh pơjing Ki lŭk Guinness hăm khŭl gre tih chơ sầu riêng kơjung hloh apŭng plĕnh teh, pơm tơdrong ‘lơ̆ng roi tơbăt, roi tơƀôh hơnăn sầu riêng Đắk Lắk lĕch tơ̆ anih tĕch mơdro apŭng plĕnh teh. Đon tơchĕng pơjing đei Ki lŭk Guinness apŭng plĕnh teh đei ƀôh đơ̆ng ‘meh vă hơtŏk ‘lơ̆ng tơdrong lăng băt đơ̆ng sầu riêng Đắk Lắk lơ̆m anih tĕch mơdro apŭng plĕnh teh.

Tơdrong jang pơjing đei Ki lŭk Guinness apŭng plĕnh teh ưh khan lăp chih tơƀôh 1 tơdrong ‘nao mă oei pơm tơdrong ‘lơ̆ng roi tơbăt, sơng đei tơdrong bơngơ̆t truh đơ̆ng khŭl chih kơtơ̆ng ang păng bôl buăl apŭng plĕnh teh, kiơ̆ đơ̆ng noh roi tơƀôh um rup sầu riêng kŭm nhen tơring teh Đắk Lắk. Ƀok Đào Mỹ, Phŏ Kơdră Anih vei lăng kon pơlei dêh char Đắk Lắk, Kơdră Khŭl pơgơ̆r Lêh Sầu riêng Đắk Lắk 2026 tơbăt, lơ̆m khei ‘năr sầu riêng tŏk bŏk tơ jră hăm lơ long nol, lêh jing tơdrong jang joh ayŏ hai, jing tơdrong hiôk roi tơƀôh hơnăn, hơtŏk ‘lơ̆ng kơjă kăp gĭt păng anih dơ̆ng sầu riêng Đắk Lắk lơ̆m apŭng plĕnh teh hai.