6 khei blŭng sơnăm ou, tơdrong jang tĕch sâu riêng ăn teh đak đe đei pơhlom hloh 950 triu đôlar, tŏk hloh 31% pơtêng hăm khei năr ou sơnăm sơ̆. Truh đĭ khei 7 sơnăm ou, jơ̆p teh đak đei hloh 1200 kơsô̆ pơkăp tơring pơtăm păng 120 hơnih tah 'nŭng sâu riêng tŏk bŏk oei pơm jang. Lơ̆m 5 khei oei lăi kơ sơnăm 2026, kơsô̆ sâu riêng oei pơhlom 1,2 triu tâ̆n, lơ̆m noh gah tơring Tây Nguyên pơhlom 850 rơbou tâ̆n.

Hăm kơsô̆ pơkăp hlôi đei asong, tơdrong jang tĕch sâu riêng ăn teh đak kơ Việt nam pơtrŏ hăm tơdrong jang kăl tĕch ăn teh đak đe sơnăm 2026. Tơchơ̆t pơtôch năr pơm jang, Phŏ Thủ tướng Hồ Quốc Dũng ră hơdah, dôm tơdrong tơnap tap kơ tơring tĕch răt nhen vei ver tơdrong jang tĕch pơđro, dôm tơdrong pơgăn gah kih thuơ̆t, kăl băt hơdah gah tơm a la chă, tơdrong tơgar jang athei akŏm lơ hloh dơ̆ng lơ̆m tơdrong pơklaih tơnap tap vă tĕch sâu riêng ăn teh đak gơh đei yua lơ hloh dơ̆ng, hơdrin đei yua truh 4 tih đôlar lơ̆m sơnăm ou.