Jơnŭm kon pơlei jang mir dêh char Đăk Lăk dang ei đei hloh 102 Jơnŭm jang hăm jê̆ 300 rơbou 'nu bơngai jang. Đơ̆ng rŏng kơ hơgrop hơnih jang hanh chĭnh, pơm kiơ̆ pơkăp jơnŭm pơgơ̆r tơring 2 tăl păng hơgrop thôn, pơlei, kueng kơphô̆, tơchơ̆t tơplih kơmăi kơsô̆, hơtŏk mŭk drăm atŭm păng pơjing tơring tơrang 'nao kăl athei tơplih kơtang gah tơdrong jang, trong pơm jang kơ jơnŭm jang gơh đei jơnei hloh.

Tơ̆ jơ pơma đam, rim bơngai tang măt tơroi gah lơ trong jang 'lơ̆ng păng tơlĕch trong jang tơplih 'nao kơ jơnŭm jang kiơ̆ trong tơguăt hăm tơdrong kăl kơ bơngai jang, hơtŏk kơtang gah tơplih kơmăi kơsô̆ păng hơtŏk dôm jơnŭm jang tơguăt hăm pơm jang kiơ̆ pơkăp kơjă kăp gĭt. Yă Vũ Thị Thúy Hòa, Kơdră Jơnŭm Kon pơlei jang mir xah Ea Drăng tơroi gah tơdrong jang đei jơnei kơ tơring: “ 'Meh yak hơdoi hăm kon pơlei jang mir, hơdrol hloh noh athei hlôh vao đe sư kăl yă kiơ vă bơ̆n tơtom tơgŭm mă trŏ ƀlep păng trŏ hăm tơchơ̆t tơlĕch. Păng đơ̆ng rŏng kơ sơđơ̆ng trong pơm jang 'nao noh pơtho pơhrăm mă hơdah hloh, pơtho ăn rim kơdră jơnŭm jang, vă iŏk pơm jang păng vei lăng tôm hla bơ-ar chih lơ̆m kơmăi điên tư adoi đei tơmơ̆t tôm lơ̆m Google Form”.

Atŭm hăm dôm tơdrong jang đei jơnei, lơ bơngai tang măt adoi tơbang hơdah tơdrong tơnap tap lơ̆m pơm jang kơ jơnŭm đơ̆ng rŏng kơ hơgrop hơnih jang hanh chĭnh, mă kăl 'noh gah tơdrong tơplih kơmăi kơsô̆ hăm khŭl kang ƀô̆ tơ̆ tơring. Yă Châu Thị Hồng Thảo, Kơdră Jơnŭm Kon pơlei jang mir xah Hòa Mỹ pơtruh nơ̆r gah tơdrong đei ƀôh tơ̆ tơring: “Pơtruh nơ̆r hăm Jơnŭm kon pơlei jang mir dêh char dah pơih lăm pơhrăm tơplih kơmăi kơsô̆, pơih kơtă dôm lăm hŏk gah AI truh hăm rim jơnŭm jang tơ̆ tơring, vă rim kon pơlei tơ̆ xah băt truh păng iŏk yua kơmăi AI, mă kăl noh lơ̆m khei năr dang ei tơdrong pơhlŭ pơhlôm lơ̆m mạng tơpôl roi năr roi kơ dêh”

Rim bơngai tang măt drơ̆ng nơ̆r akhan, tơdrong tơplih 'nao tơdrong jang, hơtŏk 'lơ̆ng tơdrong jang kơ jơnŭm jang kăl hrôih jang hơdah hăm dôm trong pơm jang trŏ ƀlep hăm tơdrong đei ƀôh tơ̆ rim tơring, rim jơnŭm jang. Yă H’Giang Niê, Kơdră Jơnŭm kon pơlei jang mir dêh char Đăk Lăk ăn tơbăt, dôm nơ̆r tơgop, ƀai chih ưh hơdrô̆ tơroi kơ lơ tơdrong jang, trong pơm jang tơnăp mă oei đei lơ trong pơm jang kăp gĭt vă hơtŏk 'lơ̆ng tơdrong pơm jang kơ Jơnŭm jang: “Dôm tơdrong đei tơlĕch pơma đam drơ̆ng lăp 'noh atheo dah hrôih tơlĕch pơm jang kiơ̆ dôm tơdrong tơchơ̆t jang păng tơlĕch trong jang trŏ ƀlep hăm tơdrong đei kơ rim hơnih jang, rim jơnŭm jang. Yuơ noh, rim jăl Jơnŭm jang kon pơlei jang mir, athei kơchăng, iŏk yua tơdrogn hơgei kơ po, tơplih 'nao lơ̆m tơdrong pơgơ̆r pơm jang, pơjing tơdrong tơplih hơdah gah tơdrong jang 'lơ̆ng kơ jơnŭm jang. Nhôn gô akŏm tôm nơ̆r tơgop, vă chih hơlen, tơmơ̆t lơ̆m tơdrong tơlĕch pơm jang khei năr ou kơnh”