‘Nâu jĭ 1 lơ̆m dôm tơdrong jang tơm kơ Lêh Sầu riêng Đắk Lắk sơnăm 2026, đei vă jê̆ 400 kơdeng tơmam đơ̆ng hloh 140 anih mơdro sa lơ̆m teh đak, 20 anih mơdro sa apŭng plĕnh teh.

Tơ̆ hơnih pơdă, tơdrong kăl kơ lăng truh lơ̆m dôm tơmam kiơ̆ trong hơtŏk tơiung choh jang sa rơgoh păng kơjăp, kŭm jing trong vă jang đơ̆ng anih jang sầu riêng Đắk Lắk. Lơ anih jang hlôi hơnhăk truh dôm trong jang ‘lơ̆ng, iŏk yua kơmăy kơmŏk rơgoh vă tơgŭm kon pơlei choh pơtăm sơđơ̆ng kơtă hloi đơ̆ng tơdrong vei lăng. Ƀok Nguyễn Thanh Điền, tang măt 1 anih mơdro sa pơtruh trong jang rơgoh lơ̆m choh jang sa, tơbăt anih jang vang jang tơdrong jang hăm ‘meh vă tơroi dôm tơdrong hlôh vao lơ̆m vei lăng hơdrông, pơrang jĭ pơrăm tơ̆ ‘long sầu riêng.

“‘Moi kiơ̆ jơnŭm kơchơ, kon pơlei gô hlôh hơdăh hloh găh dôm trong jang mă nhôn hơnhăk truh, mă loi ‘noh jĭ dôm trong rơgoh lơ̆m vei lăng hơdrông pơrang jĭ pơrăm. Kiơ̆ đơ̆ng noh, tơgŭm kon pơlei sơđơ̆ng jang sa, hơtŏk ‘lơ̆ng tơmam đơ̆ng choh jang sa đei păng tơgop pơjing tơdrong jang choh jang sa Việt Nam hơtŏk tơiung kơjăp ‘lơ̆ng”.

Tơdrong vang jang đơ̆ng 20 anih mơdro sa apŭng plĕnh teh kŭm pơm dơ̆ng 1 trong jang hơdai ăn tơdrong jang. Đơ̆ng dôm kơdeng tơmam, bơngai jang hơdai teh đak đe đei tơdrong hiôk chă hơlen lăng kơtă tơmam, oei anih mơdro sa Việt Nam đei tơdrong hiôk gơh băt dôm tơdrong ‘meh vă hơdăh đơ̆ng dôm anih tĕch mơdro răt tơmơ̆t. Kŭm hăm sầu riêng, dôm tơmam OCOP păng tơmam ‘lơ̆ng tơring kŭm đei roi tơƀôh tơ̆ tơdrong jang, pơm tơdrong hiôk vă kơ dôm tơ ‘ngla pơm tơlĕch roi tơƀôh hơnăn păng pơih să anih tĕch mơdro.

Yă Nguyễn Thị Thu An, Kơdră Anih vei lăng găh Kơmăy kơmŏk mơdro sa dêh char Đắk Lắk, tơbăt, ‘moi kiơ̆ dôm tơdrong jang hơdai kơtă, tơring ‘meh vă kơjă tơmam đơ̆ng choh jang sa đei ưh khan lăp oei tơ̆ kơsô̆ tơmam tĕch đei lơ, mă oei đei hơtŏk gơnang đơ̆ng tơmam ‘lơ̆ng, hơnăn ‘lơ̆ng, trong pơm tơlĕch păng tơdrong kĕ pơm lăp hăm ‘meh vă đơ̆ng anih tĕch mơdro. ‘Nâu jĭ trong năm vă sầu riêng kŭm hăm dôm tơmam OCOP kơ Đắk Lắk ƀrư̆ ƀrư̆ vang jang jrŭ hloh lơ̆m tơdrong jang kơjă kăp gĭt lơ̆m teh đak păng apŭng plĕnh teh.

“Mă hơdrol ‘noh jĭ athei roi tơƀôh đei sầu riêng Đắk Lắk truh hăm bơngai răt yua, jang hơdai đei hăm dôm hơnih răt iŏk păng păr ang nơ̆r pơma dêh char ling lang pơm tơdrong hiôk ăn dôm anih mơdro sa bơ̆jang tĕch mơdro, kŭm nhen jang hơdao, tơchă hơlen jrŭ hloh găh tơdrong ‘lơ̆ng păng anih tĕch mơdro vă kĕ hơnhăk tơmam sầu riêng âu păr kơjung, păr hơtăih hloh”.