Hơnih pơtăm sầu riêng Dona hloh 14ha kơ 10 unh hnam kon pơlei tơ̆ thôn 19/5, xah Krông Pắc đei yua pơhlom 350 tấn đei akŏm tĕch pơlong kơjă pơtơm noh 55.000 hlj 1 kĭ. Vang năm akŏm tĕch pơlong kơjă đei 10 hơnih jang mŭk drăm răt tơmơ̆t păng tĕch tơmam choh pơtăm ăn teh đak đe. Kŏng ti tĕch răt tơmam Choh pơtăm hăm teh đak đe Nguyên Thuận (pơlei tơm Hồ Chí Minh) jĭ hơnih jang tĕch pơlong kơjă keh kong hăm pơkăp truh 68.000 hlj 1 kĭ, hơtŏ hăm kơjă tơlĕch pơhlom  23,8 ti hlj. Ƀok Mai Đình Thọ, Hơp tak xah choh jang xa rơgoh 'lơ̆ng Krông Pắc, dêh char Đăk Lăk sơkơ̆t hơdah, tơdrong tĕch pơlong kơjă ưh hơdrô̆ tơgŭm ăn plei  sâu riêng kăp gĭt hloh, mă oei pơjing jơhngơ̆m pran vă bơngai pơtăm jang hơtŏk tơdrong 'lơ̆ng ăn tơmam drăm pơm tơlĕch:  “Kiơ̆ đơ̆ng pơlong kơjă ou, bơngai răt đei adoi hơ-iă kơlih rơih đei dôm pơgar pơtăm 'lơ̆ng hloh, vă tĕch tơlĕch ăn bơngai răt yua. 'Nguaih kơ noh, bơngai răt yua adoi hmach bơnê, thoi noh ưh hơdrô̆ pơm hơtŏk pơyua gah mŭk drăm mă oei hơtŏk đei jơhngơ̆m pran ăn rim bơngai pơtăm sâu riêng.” 

Tơdrong tĕch pơlong kơjă tơ̆ pơgar sâu riêng jĭ minh lơ̆m dôm tơdrong 'nao kơ Lêh akŏm Sâu riêng Đăk Lăk sơnăm 2026, tơgop pơjing hơnăn sầu riêng kơ dêh char kiơ̆ pơkăp 'lơ̆ng, hơdah păng hơtŏk jơhngơ̆m pran chă tơgar jang lơ̆m tơring. Kiơ̆ Jơnŭm pơgơ̆r, đơ̆ng dang ei truh năr 20/8 gô pơtoi pơgơ̆r 2'măng tĕch pơlong kơjă. Kơchĕng pơhlom 200ha sâu riêng, đei yua pơhlom 4.600 tâ̆n, trŏ nhen tơchơ̆t tơlĕch păng đei pơkăp kơsô̆ tơring pơtăm gô đei akŏm tĕch pơlong kơjă, pơjing đei hơnih tơguăt kơtă đơ̆ng hơnih jang mŭk drăm hăm tơring pơtăm.

Ƀok Lại Đức Đại, Kơdră Hơnih vei lăng kon pơlei xah Krông Pắc ăn tơbăt, tơdrong đei yua đơ̆ng 'măng tĕch pơlong kơjă 'noh hloh kơ tơdrong hơpơi đei đơ̆ng Jơnŭm pơgơ̆r, pơm trong vă tơring pơtoi keh đang tơdrong tĕch pơlong kơjă păng hơtŏk 'lơ̆ng ăn tơdrong jang sâu riêng: “Tĕch pơlong kơjă 'năr ou 'noh hloh kơ tơdrong hơpơi đei đơ̆ng Jơnŭm pơgơ̆r. Đei tơdrong pơgơ̆r đơ̆gn Hơnih vei lăng kon pơlei dêh char lơ̆m tơdrong pơjing trong pơm jang gah sầu riêng, nhôn sơkơ̆t hơdah, pơgơ̆r tĕch pơlong kơjă jĭ minh tơdrong jang vă brư̆ brư̆ pơm ăn hơnăn sầu riêng Krông Pắc pơma hơdrô̆ păng sầu riêng Đăk Lăk pơma atŭm gơh dơ̆ng kơjăp lơ̆m tơdrong jang tĕch răt. Kon pơlei pơtăm gô ưh hơdrô̆ tĕch tơlĕch tơmam pơtăm đei mă oei tĕch đei hăm kơjă măt, tơgăl hăm đak pơ-uh hlôi pơm jang”

Dêh char Đăk Lăk dang ei đei pơhlom 45.000ha sâu riêng. Sơnăm 2025, đei yua hloh 390.000 tâ̆n, đei yua hloh 1,1 ti đôlar. Sơnăm ou, hơmŏ gô đei yua hloh 500.000 tâ̆n. Kiơ̆ Hơnih Choh jang xa păng Cham char dêh char Đăk Lăk, tơdrong đei yua đơ̆ng tĕch pơlong kơjă ƀơ̆t blŭng đĭ đăng jĭ trong vă tơring pơtoi keh đang trong pơm jang, pơih să tơdrong tĕch pơlong kơjă ăn dôm pơyan jang sâu riêng đơ̆ng rŏng kơnh.