Dôm ŭnh hnam pơtăm sầu riêng tơ̆ xăh Krông Pắc, dêh char Đắk Lắk tơbăt tơdrong răt iŏk tŏk bŏk tơplih đơ̆ng pơjei băl kơdih jing jang hơdai kiơ̆ trong jang, tơgŭm hơdrol dôm tơring pơtăm đei mã kơsô̆, vei lăng ‘lơ̆ng hloi đơ̆ng blŭng bơ̆jang.

Ƀok Mai Hữu Sơn, tang măt anih mơdro sa joăt kơ răt iŏk plei sầu riêng tĕch tơ̆ teh đak đe tơbăt, ƀơ̆t anih mơdro sa păng kon pơlei vang tơgŭm băl hơnăp jang lơ̆m kơplăh pơm tơlĕch, tơdrong pơm lăp hăm dôm tơdrong pơkăp ‘lơ̆ng đơ̆ng anih mơdro sa răt tơmơ̆t đơ̆ng teh đak đe gô hiôk hloh, hơdai hăm pơm tơdrong ‘lơ̆ng ăn tơdrong jang hơdai đunh đai, dă ƀiơ̆ kơ ưh kơ pŭn ai lơ̆m răt iŏk.

"Anih mơdro sa hlôi dơ̆ng iŏk jang hơdai hăm kon pơlei tơ̆ 4-5 mã kơsô̆ tơring pơtăm. Dôm mã kơsô̆ âu yua kơ dih grŭp jang, kon pơlei iŏk yua, anih mơdro sa lăp jang hơdai răt iŏk tơmam đĕch. Tơdrong gĭt kăl ‘noh đon lui, anih mơdro sa jang sa tơpăt ‘noh kon pơlei gô lui ngeh păng vang yak hơdai”.

Găh păih Khŭl jang sầu riêng, ƀok Lê Anh Trung, Kơdră Khŭl jang Sầu riêng Đắk Lắk pơma hơdăh, tơdrong dơ̆ng lê̆ đơ̆ng tĕch mơdro hơdrol kơ pơyan phĕ tĕch ‘noh jĭ đei ƀôh ‘lơ̆ng. Mưh anih mơdro sa ưh pă luh lah ăn jên hơdrol đơ̆ng hrôih, dôm tơdrong đei ƀơm nhen mong răk, phă ăn jên hơdrol, tơgar băl răt, tơ gar tĕch kŭm ƀrư̆ ƀrư̆ đei dă ƀiơ̆.

“Tơdrong răt tơ̆ pơgar hrôih nhen hơdrol sơ̆ đei hơmơt ưh kơ pŭn ai tôch kơ lơ. Tơdăh kơjă tĕch roi jur, 2 pah ƀônh kơ đei ƀôh ưh kơ lăp băl hơnhăk truh phă ngơ̆r jang hơdai. Yua thoi noh, tơdrong pơjing dôm trong jang hơdai kơhret gô tơgŭm rơih iŏk đei dôm anih mơdro sa răt iŏk tơpăt, vei sơđơ̆ng pơm lăp hăm ‘meh vă hla ar pơkă răt tơmam”.

Dôm tơdrong tơplih âu đei đăi gơnang đơ̆ng tơdrong mơ̆t jang hloi đơ̆ng blŭng pơyan đơ̆ng khŭl kơdră tơring. Ƀok Lại Đình Đại, Kơdră Anih vei lăng kon pơlei xăh Krông Pắc, dêh char Đắk Lắk tơbăt xăh hlôi pơjing Khŭl pơgơ̆r, proh hơmet, vei lăng păng Grŭp dăr lăng, jang hơdai hăm anih joăt jang, Khŭl jang Sầu riêng păng dôm anih hơlen lăng pơtho kon pơlei pơm tơlĕch trŏ trong jang; dăr lăng tơdrong iŏk yua tơmam choh jang sa, iŏk kơmâu hơlen lăng kơsô̆ rơkăh Cadimi păng pơgang vei lăng ‘long pơtăm, hơdai hăm vei lăng kơjăp mã kơsô̆ tơring pơtăm.

Tơring kŭm kơchăng jang hơdai hăm anih mơdro sa răt iŏk, tĕch tơ̆ teh đak đe iŏk đơ̆ng blŭng pơyan vă băt hơdăh ‘meh vă tĕch mơdro. Tơchĕng hơdrol hơtuch khei 7, xăh gô pơgơ̆r ‘măng chă bơngai răt hăm kơjă lơ mă blŭng hăm hloh 14,5 hek tar sầu riêng đei mã kơsô̆ tơring pơtăm, kơsô̆ tơmam dang 300 tấn hăm tơdrong vang jang đơ̆ng lơ anih mơdro sa. Ƀok Lại Đình Đại tơbăt dơ̆ng:

"Sơnăm ‘nâu ăn tơmơ̆t lơ̆m vei lăng kiơ̆ sơđơ̆ng, bu đei asong ăn ‘noh mă gơh răt iŏk, păng dôm anih răt iŏk kŭm thoi noh, anih hơyơ đei asong ăn ‘noh gơh răt tơmam. Tơdrong mă 2 dơ̆ng dôm hơnih ‘măn răk athei vei sơđơ̆ng ‘lơ̆ng ki thuơ̆t, sơđơ̆ng găh vei lăng rơgoh ‘lơ̆ng tơmam sa. Mă 3 dơ̆ng athei đei tơdrong vei lăng asong ăn đơ̆ng tơring ‘noh mă gơh bơ̆jang. Ƀrư̆ ƀrư̆ gô hơnhăk tơdrong sơđơ̆ng răt iŏk tơmam sầu riêng lơ̆m tơring yak mơ̆t lơ̆m trong jang sơđơ̆ng hloh ‘lơ̆ng hloh”.

Đắk Lắk dang ei đei dang 44.000 hek tar sầu riêng, lơ̆m noh hloh 33.000 hek tar tŏk bŏk đei plei, kơsô̆ tơmam pơyan 2026 jô̆ pơhlom dang 500.000 tấn. Đơ̆ng rŏng lơ sơnăm tơjră hăm tơdrong răt iŏk kơdih, tơ gar băl răt, tơ gar băl tĕch păng phă ngơ̆r jang hơdai, tơdrong tĕch mơdro plei sầu riêng Đắk Lắk tŏk bŏk ƀrư̆ ƀrư̆ đei pơjing dơ̆ng sơđơ̆ng ‘lơ̆ng. Mưh khŭl kơdră chĕp kơ̆l vei kơhret tơdrong vei lăng, anih mơdro sa pơjing jang hơdai kơjăp păng kon pơlei pơm kiơ̆ trong jang pơm tơlĕch, anih jang sầu riêng tŏk bŏk đei dơ̆ng tơdrong ‘lơ̆ng vă hơtŏk tơiung sơđơ̆ng, pơm lăp ‘lơ̆ng hloh ‘meh vă đơ̆ng anih tĕch mơdro tơ̆ teh đak đe tơ̆ hơnăp kơnh.