Pơjing sơnăm 2021 hăm 7 ‘nu bơngai vang jang, truh dang ei, Hơp tak xăh Pơm tơlĕch - Tĕch mơdro - Pơvih pơvăn Mắc ca Ea H'leo đĭ đei hloh 30 ‘nu bơngai vang jang, vei lăng dang 140 hek tar cheh phe păng mắc ca. Sơnăm 2025, tơmam mắc ca kơ hơp tak xăh đei tĕch tơ̆ teh đak đe kiơ̆ trong tơm tơ̆ Hàn Quốc, hơdai hăm iŏk đei hơnăn Tơmam kơmăy kơmŏk tơring tơrang ‘lơ̆ng kơ teh đak, đơ̆ng rŏng kơ iŏk đei Tơmam hơpăh Mai An Tiêm sơnăm 2024.

Kiơ̆ kơ ƀok Nguyễn Trọng Huê, Kơdră vei lăng Hơp tak xăh, jơnei ưh khan lăp truh đơ̆ng tơdrong pơih să tơring tơmam dăh mă hơtŏk ‘lơ̆ng tơmam mă oei đơ̆ng tơplih đơ̆ng đon tơchĕng vei lăng, rơđăh lơ̆m vei lăng păng hơtŏk hơnăp jang đơ̆ng rim bơngai jang lơ̆m khŭl.

“Tơdrong jang hơp tak xăh ‘noh jĭ tơdrong jang hơtŏk tơiung hơnat hloh, mă lei tơdăh iŏk yua trŏ gô hơtŏk tơiung hrĕnh păng kơjăp. Vă bơ̆jang ‘lơ̆ng hloh kăl kơ đei tơdrong jang hơdai păng rơđăh găh tơdrong roi tơbăt jên hu, klăih song kơchư̆k jang, klăih song hơnăp jang ăn kơ rim bơngai ‘noh hơp tak xăh gô ‘lơ̆ng hloh”.

Kŭm hăm tơplih ‘nao vei lăng, lơ hơp tak xăh tơ̆ Đắk Lắk tŏk tơƀôh hơdăh iŏk yua đơ̆ng tơdrong jang hơdai pơm tơlĕch. Tơ̆ Hơp tak xăh Choh jang - Pơvih pơvăn Hơtŏ hơnơ̆ng Ea Tu, phường Tân Lập, 49 ‘nu bơngai vang jang, lơ̆m noh đei 90% ‘noh jĭ bơngai kon kông, tŏk bŏk vei lăng hloh 250 hek tar cheh phe. Gơnang đơ̆ng pơm tơlĕch kiơ̆ pơkăp ‘lơ̆ng, cheh phe kơ Hơp tak xăh ling lang tĕch kơjă lơ ƀiơ̆ anih tĕch mơdro đơ̆ng 2 truh 2,5 triệu hlak jên 1 tấn, tơgŭm rim ŭnh hnam jang lơ̆m khŭl tŏk dơ̆ng đơ̆ng 10 truh 25 triệu hlak jên 1 sơnăm. Vang tơroi tơdrong hlôh vao bơ̆jang, ƀok Nguyễn Đình Trọng, Kơdră vei lăng Hơp tak xăh tơbăt:

“Hơp tak xăh kăl kơ chă krao hơvơn kơdih, ưh kơ gơh pơ mơ̆ng, mă hơdrol bơ̆n athei jang ‘lơ̆ng, tơnăp lơ̆m pơm tơlĕch ‘noh đơ̆ng noh dôm tơmoi răt tơmam đe sư gô tơchă truh tơ̆ bơ̆n, ‘noh jĭ tơdrong kăl bơ̆n athei jang hơdrol, oei Teh đak tơgŭm lăp jing 1 păh đĕch vă pơm tơdrong hiôk ăn kơ bơ̆n năm hrĕnh ƀiơ̆ mă ưh kơ sĭ răp gô  lơ̆m tơdrong tơgŭm pơđĭ đơ̆ng teh đak”.

Tơ̆ xăh Ea Nuôl, dêh char Đắk Lắk, Hơp tak xăh Choh jang sa păng Pơvih pơvăn Chă tơmang lăng Phú Nông Buôn Đôn ‘noh rơih iŏk trong năm đơ̆ng hơtŏk tơiung tơdrong pran kơ tơring ƀơ̆t jang hơdai choh jang sa hăm chă tơmang lăng vă kơbăt. Pơjing sơnăm 2019, truh dang ei Hơp tak xăh hlôi đei 46 ‘nu bơngai vang jang tơgop jên, tơgop jơhngơ̆m hơtŏk tơiung tơdrong jang choh jang sa - chă tơmang lăng jum dăr dơnâu đak ŭnh điên Sêrêpốk 3. Ƀok Trần Văn Toàn, Kơdră vei lăng hơp tak xăh tơbăt, tơdrong jang đei jơnei ưh khan lăp jing jên jang đĕch mă jing tơdrong tơgoăt hơdai păng vang tơgŭm băl hơnăp jang đơ̆ng dôm bơngai jang lơ̆m khŭl, hơlen lăng trŏ lơ̆m tơdoă păng hơtŏk tơmam đei hơdrol kơ tơring kơdih.

“Nhôn kơchăng tơgop jên đơ̆ng dôm bơngai jang lơ̆m khŭl, jên kơđeh năr vă tơmơ̆t jên jang dôm tơdrong jang mă hơp tak xăh hlôi rơih iŏk, iŏk 2 tơdrong jang tơm pơm tơdrong ‘lơ̆ng hơtŏk tơiung ‘noh jĭ pơm tơlĕch choh jang sa hơdai hăm chă tơmang lăng vă kơ băt jum dăr dơnâu đak ŭnh điên Sêrêpốk 3. Iŏk đơ̆ng ƀơ̆t kơplah pơjing tơring ‘noh oei hmă lơ pơgar, lơ hơnih teh hŭt hoh truh dang ei hlôi pơm đei 1 hơnih bri brăh tôch kơ ‘lơ̆ng, sơng đei tơmam chă tơmang lăng”.

Đắk Lắk dang ei đei hloh 1.220 Hơp tak xăh hăm hloh 185.000 ‘nu bơngai vang jang. Tơring đei lơ tơdrong ‘lơ̆ng vă pơjing dôm hơp tak xăh tih lơ̆m tơdrong jang choh jang sa, bri ‘long, ka hơdang, chă tơmang lăng tơpôl, kơmăy kơmŏk pơm tơlĕch păng logistics. Mă lei, tơ̆ Đắk Lắk ‘nao lăp dang 20% Hơp tak xăh vang jang dôm tơdrong jang hơdai, ƀơ̆t mă dang 80% oei bơ̆jang hơdrô̆ le, chă kơdih anih tĕch ăn tơmam. ‘Nâu jĭ tơdrong pơgăn tih pơm ăn mŭk drăm tơpôl tam mă hơtŏk đĭ tơmam ‘lơ̆ng.

Tơdrong tơchơ̆t Hop akŏm Đảng bộ dêh char Đắk Lắk jăl jang 2025 – 2030 băt hơdăh, mŭk drăm tơpôl jing 1 lơ̆m dôm tơdrong ‘lơ̆ng vă bơ̆jang kiơ̆ tơdrong hơgăt jang tŏk GRDP đơ̆ng 11% 1 sơnăm tơ̆ kơpal lơ̆m lơ sơnăm truh. Ƀok Lương Nguyễn Minh Triết, Bơngai jang lơ̆m Trung ương Đảng, Bí thư Anih jang Đảng dêh char Đắk Lắk tơroi tơdrong jang, Jơnŭm hơp tak xăh kăl kơ akŏm hơtŏk ‘lơ̆ng bơ̆jang, hơtŏk tơiung kiơ̆ tơdrong jang hơp tak xăh trong ‘nao, tơklep hăm khoa hŏk kơmăy kơmŏk, tơplih ‘nao hơgei, tơplih kơsô̆, mŭk drăm rơgoh, choh jang sa ‘lơ̆ng păng jang hơdai hơtŏk kơjă tơmam.

“Jơnŭm Hơp tak xăh dêh char kăl kơ akŏm hơtŏk ‘lơ̆ng đei yua bơ̆jang đơ̆ng dôm hơp tak xăh, lăng truh găh kơsô̆ tơmam sa, lăng kăl tơdrong ‘lơ̆ng hai, akŏm pơjing dôm tơdrong jang hơp tak xăh trong ‘nao, mă loi ‘noh jĭ lơ̆m tơplih trong jang vei lăng, vei lăng tơchă băt anih pơm tơlĕch, tĕch mơdro lơ̆m điện tử păng jang hơdai anih tĕch mơdro; tơklep hăm iŏk yua khoa hŏk kơmăy kơmŏk, tơplih ‘nao, mŭk drăm rơgoh, choh jang sa bri brah, choh jang rơgoh păng jang hơdai hơtŏk tơjă tơmam”.

Đơ̆ng dôm tơdrong jang Hơp tak xăh bơ̆jang đei yua tơ̆ Đắk Lắk gơh ƀôh, hơp tak xăh hrei ‘nâu ưh pă jing tơdrong jang pơm tơlĕch kiơ̆ trong so. Ƀơ̆t iŏk vei lăng ‘nao pơm tơdrong ‘lơ̆ng, jang hơdai hơtŏk kơjă tơmam pơm tưk tơiung păng đei yua bơngai jang lơ̆m khŭl pơm tơm, dôm hơp tak xăh tŏk bŏk jing gơng tơƀưh hơnhăk tơmam đơ̆ng choh jang sa Đắk Lắk yak lĕch tơ̆ anih tĕch mơdro, tơgop roi ‘năr roi rơđăh ‘lơ̆ng lơ̆m hơtŏk tơiung mŭk drăm tơring.