‘Moi kiơ̆ rim tơdrong jang pơtrŭt tĕch mơdro đei pơgơ̆r lơ̆m jơnăr Hop akŏm pơtrŭt tơmơ̆t jên jang dêh char Đắk Lắk sơnăm 2026 âu ki, hloh 150 kơdeng tơmam kơ 80 anih mơdro sa, hơp tak xăh păng anih pơm tơlĕch lơ̆m, ‘ngoăih dêh char hlôi roi tơƀôh lơ tơmam pran nhen cheh phe, ca cao, mắc ca, tiu, đak kơdrot, tơmam sa pơm tơlĕch, tơmam pơrŏ pơm hăm ti kŭm hăm lơ tơmam OCOP păng tơmam kơmăy kơmŏk tơring tơrang ‘lơ̆ng. ‘Nâu jĭ tơdrong hiôk vă kơ rim tơ ‘ngla pơm tơlĕch roi tơƀôh hơnăn, tơchă anih jang hơdai, pơih să anih tĕch răt tơmam đơ̆ng choh jang sa đei. Tang măt 1 hơp tak xăh, ƀok Nguyễn Duy Hùng tơbăt, đei dêh char pơm tơdrong hiôk vang jang dôm tơdrong jang pơtrŭt tĕch mơdro hlôi tơgŭm dôm tơ ‘ngla OCOP gơh tơjê̆ lơ tơmoi păng bơngai tĕch mơdro hloh.

"Jơnŭm kơchơ âu pơgơ̆r ‘lơ̆ng dêh. Dôm tơ ‘ngla OCOP lăng tôch kơ ‘lơ̆ng đơ̆ng tơdrong pơgơ̆r păng tơdrong roi tơƀôh. Păng mă kăl ‘noh jĭ ƀlep ƀơ̆t 1 ‘măng mă dêh char Đắk Lắk tơbăt hơdăh trong tơproh jang păng tơmơ̆t jên jang kơ dêh char lơ̆m khei ‘năr âu ‘noh sơng đei lơ tơmoi truh tơ̆ âu vang tơroi tơdrong hlôh vao păng nhôn kŭm hlôi roi tơƀôh đei lơ tơmam”.

Hơdai hăm tơgoăt tĕch mơdro kiơ̆ trong joăt joe, dêh char Đắk Lắk oei tơgŭm anih mơdro sa, hơp tak xăh iŏk yua tơplih kơsô̆ lơ̆m roi tơƀôh păng tĕch tơmam. Dôm ‘măng tĕch tơmam trực tuyến, jang hơdai lơ̆m kơmăy kơsô̆ tơgŭm tơmam tơring gơh tơjê̆ hăm tơmoi hrĕnh hloh, să hloh, tơgop hơtŏk ‘lơ̆ng đei yua tĕch mơdro. Vang tĕch tơmam tơ̆ kơmăy kơsô̆, yă Lê Thị Hồng Thơm, tang măt anih mơdro sa pơm tơmam ngă đơ̆ng bơ̆n hla ‘long xăh Cư Prao, dêh char Đắk Lắk tơbăt:

"‘Măng âu ‘noh jơnŭm kơchơ tơplih kơsô̆ mă blŭng kơ dêh char Đắk Lắk đơ̆ng rŏng tơmơ̆t hơdai. Kŭm hăm tơdrong hơnhăk tơmam truh jơnŭm kơchơt hăm dôm trong jang jang joăt joe vă tĕch kơtă ‘noh păih kŏng ti nhôn oei vang akŏm dôm ‘măng tĕch lơ̆m kơmăy kơsô̆ yua đơ̆ng păh Anih pơtrŭt Tĕch mơdro kơ dêh char tơgŭm. ‘Meh vă ‘noh jĭ roi tơƀôh đei tơmam đơ̆ng kơdih kiơ̆ lơ trong pha ra băl păng gơh tơjê̆ hăm tơmoi lơ trong pha ra băl, dôm hơnih pha ra băl.”

Kiơ̆ kơ ƀok Nguyễn Hải Triều, Phŏ Kơdră Anih vei lăng găh tĕch mơdro dêh char Đắk Lắk, tơdrong tơm kơ dêh char ưh khan lăp dơ̆ng tơ̆ tơdrong hơtŏk ‘lơ̆ng tơmam mă oei vang yak hơdai kŭm anih mơdro sa, hơp tak xăh păng kon pơlei lơ̆m pơjing hơnăn, tơgoăt tĕch mơdro, pơtrŭt tĕch mơdro păng hơtŏk tơiung anih tĕch mơdro. ‘Nâu jĭ trong jang gĭt kăl vă hơtŏk ‘lơ̆ng kơjă tơmam đơ̆ng choh jang sa đei, hơtŏk jơhngơ̆m pơjei păng sơng đei tơmơ̆t jên jang lơ̆m tơdrong jang pơm tơlĕch, tĕch tơmam đơ̆ng choh jang sa đei kơ tơring.

“‘Meh vă tơlĕch ăn đơ̆ng dêh char hăm dôm anih mơdro sa ưh khan lăp jing tơdrong jang pơm tơlĕch dôm tơmam iŏk đei pơkăp ‘lơ̆ng đĕch, mă oei athei pơgơ̆r ‘lơ̆ng dôm tơdrong jang hơdai tĕch mơdro, pơtrŭt tĕch mơdro păng pơjing hơnăn hơtŏk tơiung anih tĕch mơdro. Kơlih thoi noh ‘moi kiơ̆ jơnŭm kơchơ, dêh char Đắk Lắk kŭm ‘meh vă roi tơƀôh 1 trong ‘lơ̆ng hơiă, lăng ƀôh dôm jơnei hơtŏk tơiung lơ̆m tơdỏng jang kơmăy kơmŏk tơring tơrang kơ dêh char. Hơdai hăm gô pơm tơdrong hiôk tơgoăt hơdai păng roi tơƀôh hơnăn, tơchă anih jang hơdai păng yak truh jang hơdai tơmơ̆t jên jang”.

Đơ̆ng tơgŭm hơtŏk ‘lơ̆ng tơmam truh jang hơdai anih tĕch mơdro, tơplih kơsô̆ păng pơjing hơnăn, tơdrong vang yak hơdai đơ̆ng khŭl kơdră tơring kŭm hăm dôm anih jang kơpal tŏk bŏk tưk tơiung dơ̆ng tơdrong ‘lơ̆ng vă kon pơlei, hơp tak xăh păng anih mơdro sa hơtŏk ‘lơ̆ng kơjă tơmam đơ̆ng choh jang đei kơ tơring. ‘Nâu kŭm jing tơdrong gĭt kăl vă choh jang sa Đắk Lắk hơtŏk tơiung kiơ̆ trong ‘nao, kơjăp păng hơtŏk ‘lơ̆ng jơhngơ̆m pơjei lơ̆m anih tĕch mơdro lơ̆m teh đak kŭm nhen apŭng plĕnh teh.