Lơ nơ̆r tơgop lơ̆m pơma đam akhan, tơplih jơk păng pơm kiơ̆ pơkăp ESG dang ei noh tơdrong gĭt kăl, vă hơnih jang mŭk drăm pơtoi chih măt, pơih să tơring tĕch răt păng hơtŏk tơdrong tơgar jang. Vă jang gơh tơdrong ou, hơnih jang mŭk drăm athei tơjur tơdrong tơlĕch rơm rĕk 'mê̆ 'mach, vei lăng hơdah tơdrong 'lơ̆ng, iŏk yua tơnăp mŭk drăm hlôi đei, hơtŏk 'lơ̆ng tơdrong pơm jang ăn bơngai jang păng chih hơdah yư lĭu kăl...

Kiơ̆ rim bơngai juăt jang, hơnih jang mŭk drăm kăl lăng tơdrong tơplih jơk jĭ minh tơdrong hơtŏk tơ-iung kơjăp sơđơ̆ng, nĕ kơ lăng ou jĭ tơdrong pơhuach atăm. Dang ei, hơnih jang mŭk drăm gơh pơtơm đơ̆ng dôm trong jang hăm jên huach tŏ sĕt, đei yua kơjung nhen mong ƀiơ̆ unh hơyuh, vei lăng tơnăp gah pơchoh đak djah, chih tơmơ̆t lơ̆m kơmăi kơsô̆ dôm tơdrong jang păng hơtŏk hơgei hloh tơdrong jang vei lăng kơpal.

Ƀok Nguyễn Thành Long, juăt jang gah vei lăng pơkăp jang ESG akhan, rim tơring kăl đei rim hơnih jang kŏng ngĭp rơgoh 'lơ̆ng hăm unh hơyuh sơđơ̆ng 'lơ̆ng, pơchoh đak păng hơmet rơm rĕk mă tơnăp, pơjing tơdrong tơm vă hơnih jang mŭk drăm pơm kiơ̆ ESG kơjăp 'lơ̆ng păng tơjur ƀiơ̆ jên huach tơplih pơm jang: “Hăm tơmam drăm tĕch tơlĕch truh tơring Châu Âu, đei 6 khŭl dơnơm tŏk bŏk ƀơm răm kơtă noh thép, xi măng, nhôm, phŏng rei hidro. Dang ei hlôi đei pơkăp hơdah jên hăm cacbon păng athei pơkă hơdah lơ̆m tơmam drăm pơm tơlĕch, hơlen băt tơm a la chă cacbon lơ̆m rim tơmam drăm đei pơm tơlĕch. Rim hơnih jang mŭk drăm athei hơmet tơtenh vă tom pơm jang”.

Ƀok Phạm Anh Tuấn , Kơdră Hơnih jang vei lăng kon pơlei dêh char Gia Lai sơkơ̆t hơdah: jăl jang 2026-2030, tơring athei tơchơ̆t gô hơtŏk kơtang tơdrong jang tơplih kơsô̆, tơplih jơk, hơtŏk jang kŏng ngĭp pơm tơlĕch tơmam drăm, unh hơyuh rơgoh 'lơ̆ng păng choh jang xa kiơ̆ trong 'nao. Dang ei, dêh char đei lơ tơdrong hiôk vă hơtŏk mŭk drăm jơk hăm mŭk drăm hlôi đei tih tên gah unh hơyuh rơgoh, tơdrong hơtŏk tơ-iung kơmăi kơmŏk pơm jang sơđơ̆ng. Kơdră Hơnih jang vei lăng kon pơlei dêh char Gia Lai pơkăp, jơnŭm pơgơ̆r tơring gô tơplih kơtang đơ̆ng đon tơchĕng jing trong pơm jang hơdah, yak hơdoi atŭm hăm hơnih jang mŭk drăm vă iŏk jang dôm tơdrong tơlĕch jang: “Dêh char Gia Lai gô pơtơm jang hơdoi hăm hơnih jang mŭk drăm lơ̆m tơlĕch jang tơplih jơk. Teh đak gô tơgŭm dôm tơdrong jang hơdah kiơ̆ minh ƀar tơchơ̆t tơgŭm jang. Mă lei kăp gĭt hloh noh tơdrong rơchăm đơ̆ng bơngai chĕp kơ̆l kơ jơnŭm pơgơ̆r tơring, hơnih jang mŭk drăm athei ƀôh hơdah ou jĭ tơdrong athei tơplih vă gơh hơrih jang xa. Dêh char gô pơtoi pơgơ̆r jang,  khŏm mă pơm kiơ̆ pơkăp jang tơplih jơk tơ̆ dêh char hăm trong jang tĕnh hloh, kơjăp hloh păng đei jơnei hloh”.