Đơ̆ng hơtuch khei 3/2026 truh dang ei, ‘năr tŏ đunh hlôi pơm ăn 757 ha ƀa phang tơ̆ dôm tơring găh Hơlĕch tơ̆ dôm xăh Hòa Thịnh, Hòa Mỹ, Tây Hòa păng Phú Hòa 2 ưh kơmăh đak. Sơnăm sơ̆, ‘mi tih đak lip phă pơrăm lơ hơbong đak kơna năr rei pơtăm ƀa phang 2025-2026 klui ƀiơ̆ 1 khei pơting hăm rim sơnăm, pơm ăn pơyan ƀa hnông, huăt trŏ ƀât khei tŏ phang pơđang.

Vă dŏng ba, hơnơ̆ng 10 năr âu ki, Công ty vei lăng dơnâu đak Đồng Cam pơgơ̆r ăn 7 tŏ hnam kơmăy ƀôm đak, ƀôm hơtŏk đak tơ̆ chŭn. Kŭm hăm ‘nŏh dôm Hnam kơmăy ƀôm đak, hơbong đak hlôi đei hơmet ‘lơ̆ng vang ƀôm hơtŏk đak tơ̆ chŭn ‘năi. Đak tơ̆ dôm đak krong đei ƀôm hơtŏk tôch ai vă pơro tơ̆ rim hơbong lơ̆m kơdơ. Ƀok Nguyễn Văn Nhành, Phŏ Kơdră Công ty vei lăng Dơnâu đak Đồng Cam ăn tơbăt:

"Hăm chŭn na ưh kơmăh đak loi 700 ha găh dôm hơbong đak tơ̆ Pơbăh ‘nŏh ƀôm hơtŏk đak mă tơtom vă huei pơm ưh ‘lơ̆ng truh tơ̆ ƀa hnông, huăt. Kiơ̆ tơdrong tơdra đơ̆ng dang ei truh đĭ khei 4 ‘năr tôch tŏ kơna giĕng ‘nâu păng giĕng đơ̆ng rŏng kơnh dơ̆ng ‘nŏh tôch mơmat, công ty oei pơgơ̆r ƀôm hơtŏk đak hơnơ̆ng, mưh ƀa pơtơm hnông huăt, rong găr bơih ‘nŏh công ty vă tơjur ƀiơ̆ tơdrong ƀôm đak."

Vă gơ̆h ƀôm pơro đak sơđơ̆ng ‘lơ̆ng, dôm khul jang vei lăng đak bơ̆ jang prăt măng, prăt năr, 1 păh ‘nŏh ăn dôm hnam kơmăy ƀôm đak kơdâu vă tang găn phang pơđang, 1 păh ‘nŏh jang hơdoi hăm khul vei lăng đak đơ̆ng dôm HTX choh jang xa tơlĕch trong pơro đak mă lăp kiơ̆ trong pơro đak ăn chŭn na hơtăih adrol, găn ƀiơ̆ tơdrong kon pơlei jang chŭn pơngơ̆t, chă iŏk đak kơdih jing ƀơm ưh ‘lơ̆ng truh trong pơchoh đak. Ƀok Đặng Quốc Hoàn khul vei lăng đak tơring Hòa Đồng, Hòa Mỹ ăn tơbăt: "Tang găn tŏ phang pơđang, ‘nhŏng oh athei trư̆k prăt măng prăt năr vă pơro đak truh tơ̆ chŭn kông, hơtăih păng tơ̆ chŭn na ưh kơmăh đak adrol."

Tơdrong krê kơ đei tŏ phang pơđang roi dêh hăm tơring groi kông găh hơlĕch dêh char Đắk Lắk, mưh lơ dơnâu đak đĭ hrơ̆ bơih. Vă jê̆ 1 khei âu ki, hơnơ̆ng 5 năr dôm unh hnam tơ̆ plei Hoà Sơn, xăh Sơn Hòa athei năm tơ̆ chŭn ƀôm đak đơ̆ng dôm sơlŭng kuay khuan, tơ̆ mât đak lơ̆m chŭn vă dŏng ba. Kiơ̆ kon pơlei tơ̆ âu, đak tơ̆ dơnâu ưh pă đei bơih, lăp pôm ƀôm iŏk đak đơ̆ng đak kuay khuan đĕch vă gơ̆h dŏng ƀa, mă băt sư tôch huach jên ră: "Ƀôm đak 1 vât bơih, dang ei ƀôm dơ̆ng jing 2 vât, tơdăh ưh ‘nei, ƀa bo đĭ."

Tơ̆ hơnăp tŏ phang pơđang tôch dêh hrei ‘nâu, Anih vei lăng choh jang xa păng cham char Đắk Lắk athei dôm anih jang kơpal, khul grŭp chă hơlen, chih hơdăh mă trŏ đak tơ̆ rim dơnâu kŭm nhen tơlĕch trong iŏk yoa đak mă ‘lơ̆ng, đei yoa, pơm ‘lơ̆ng ăn tơdrong ‘mĕh yoa đak tơ̆ rim tơring, mă loi tơ̆ dôm tơring đei nơ̆r khan hơdrol gô ưh kơmăh đak; atŭm hăm ‘nŏh đei trong jang lăp ‘lơ̆ng, pơm tơjur ƀiơ̆ hiong răm yoa đơ̆ng tŏ phang pơđang pơm tơlĕch./.