Hloh 1 hec-ta sầu riêng kơ ŭnh hnam yă Nguyễn Thị Hồng, tơ̆ xăh Ea K’nuếc, dêh char Đắk Lắk tŏk bŏk mơ̆t lơ̆m khei ‘năr pơ kao rơnôp, khei ‘năr gĭt kăl tơchơ̆t đei plei lơ. Mă lei, tŏ ‘mi kial kơnê̆ athei ŭnh hnam măh tơplih pơđĭ tơdrong oei sa vă vei lăng pơgar ‘long. Yă Hồng tơroi:

“‘Năr tŏ hang thoi âu nhôn athei iung đơ̆ng 3 jơ pơgê jang, tơruih đang ƀơ̆ih dang 8–9 jơ pơgê ‘noh pơdơh. Tŏ dêh, ưh kơ kĕ, tôch kơ gleh hrat hăm bơngai jang chŭn mir”.

Ưh khan lăp hơdrô̆ sầu riêng, dôm ‘long pơtăm tơm lơ̆m noh đei 210.000 hec-ta cheh phe, vă jê̆ 29.000 hec ta tiu, kŭm tŏk bŏk pŭ kơhret tih đơ̆ng tơdrong ưh kơ măh đak. Lơ kon pơlei jang chŭn mir hlôi kơchăng tơplih đơ̆ng tơruih ayôm jing tơruih ‘mơ ‘met vă pơm lăp. Ƀok Nguyễn An Sơn, tơ̆ xăh Cư Mgar, tơbăt, ŭnh hnam sư hlôi tăh đing tơruih ‘mơ ‘met đơ̆ng 2 sơnăm kơ âu, tơgŭm tơjur 1/3 kơsô̆ đak pơting hăm hơdrol.

“Tơplih yua kơ nhen hơdrol nhôn tơruih hăm đing pruih tôch kơ hoach đak, hiong jơ năr dơ̆ng. Dang ei yua đing tơruih kơtoh ‘mơ ‘met đak hai, tơ jur năr jang hai, iŏk yua mŭk drăm kŭm lơ ƀiơ̆”.

Kŭm hăm tơdrong kơchăng đơ̆ng kon pơlei, khŭl kơdră tơring păng anih choh jang sa kŭm tŏk bŏk tơlĕch jang lơ trong jang tơ jră hăm tơdrong tŏ hang pơdui đunh, hơmơt kơ phang pơđang roi dêh. Tơ̆ dôm xăh, hơbong thong đak đei dăr hơlen, pơchoh đak trŏ lăp, hơdai hăm tơtă kơ kon pơlei yua đak ‘mơ ‘met, iŏk yua kơmăy tơruih ‘nao. Ƀok Nguyễn Văn Kiên, Phŏ Kơdră Anih pơtruh pơvih pơvăn tơdrong jang teh đak kơ xăh Ea Knốp, dêh char Đắk Lắk tơbăt:

“Anih vei lăng kon pơlei xăh hlôi pơjao kơ dôm khŭl joăt jang dăr hơlen hơbong thong đak vă pơro đak trŏ lăp. Hơdai hăm, tơtă kơ kon pơlei yua đak ‘mơ ‘met, iŏk yua kơmăy tơruih ‘nao vă vei sơđơ̆ng đak pơyua ăn jang sa lơ̆m khei ‘năr tŏ phang”.

Kiơ̆ tơdra hơdrol, tŏ phang tơ̆ Đắk Lắk oei hơnơ̆ng kơ đei tơ̆ hơnăp kơnh, hơmơt ưh kơ măh đak gô đei ƀôh, mă loi ‘noh tơ̆ dôm tơring hơtăih tu đak dăh dơnâu đak tam mă pơm lăp hăm ‘meh vă. Yă Đặng Thị Thủy, Phŏ Kơdră Anih vei lăng găh Choh jang sa păng Cham char dêh char Đắk Lắk tơbăt, dêh char hlôi hơmet ăn dôm trong jang tang găn tŏ phang, pơgơ̆r choh jang sa trŏ lăp ăn pơyan đơ̆ng rŏng dơ̆ng:

“Rim anih joăt jang tŏk bŏk jang hơdai răp hơlen tơplih tŏ ‘mi kial lơ̆m pơyan Phang păng tơ̆ hơnăp kơnh vă pơro đak trŏ lăp. Hơdai hăm hơmet ăn choh jang sa pơyan tŏ ‘mi, pơtho tơring hơmet ming trong jang ‘long pơtăm trŏ lăp hăm tơdrong hơtŏ đơ̆ng tu đak. Hơdai hăm ‘noh, hơnơ̆ng dăr hơlen dôm dơnâu mong đak, kơchăng trong jang pơtruh đak ăn choh jang sa păng oei sa”.