Dơnâu Ia Lâm, xăh Gào jĭ 1 lơ̆m dôm dơnâu pơtruh đak tơruih gĭt kăl ăn kon pơlei, dang ei đĭ hrơ̆ ƀôh teh hloi bơih. Vă dŏng lơ pơgar ‘long ưh kơmăh đak ƀât tŏ phang oei tôch dêh âu, lơ unh hnam athei thuê kơmăy kôch teh, sir kôch lơ̆m dơnâu đak vă chă đak ngâm lơ̆m dơnâu. Mă lei đak lăp tŏ sĕt âu kŭm hrơ̆ pơđĭ. ‘Nhŏng Nguyễn Phát, tơ̆ plei O Grang, xăh Gào, tơlĕch nơ̆r pơma ƀât pă băt vă jang thoi yơ: “Dang ei chă gô găi đak lĕch, gơ̆h pruih ăn 5,7 tơnơm ‘nŏh pruih, tơgar băl pruih đak vă dŏng ‘long. Đak sơnăm ‘nâu roi đunh roi hrơ̆ hrĕnh”.

Ưh lăp tơ̆ dơnâu Ia Lâm đĕch, pơđĭ 5 dơnâu đak tơ̆ xăh Gào đak đĭ hrơ̆ ƀôh teh hloi bơih. Ƀok Bùi Văn Thỏa kŭm hăm lơ unh hnam kon pơlei oei ƀôm đak đơ̆ng dơnâu Ku Tong ăn tơbăt, mih ma duch nă oei ƀôm iŏk đak pă sĕt sot vă tơruih ăn ‘long pơtăm. Kiơ̆ ƀok Thỏa, tơdăh tŏ hơnơ̆ng dơ̆ng, ‘nŏh ưh pă đunh kiơ dơnâu đak ‘nâu gô hrơ̆ đĭ: “Mih ma duch nă dang ei tôch pơngơ̆t, ưh đei đak tơruih, tôch mơmat. Mĭnh kơsô̆ unh hnam kon pơlei tơ̆ âu đei đak kuay khoan mă lei ưh kơ đei đak ‘năi”.

Tơdrong ưh kơmăh đak tơruih ăn ‘long pơtăm tơ̆ Gia Lai oei đei roi dêh tơ̆ lơ tơring găh Pơmât kơ dêh char. Ƀok Rơ Mah Hêng, Phŏ Kơdră vei lăng kon pơlei xăh Ia Tôr ăn tơbăt, tơ̆ hơnăp dang ei tơring akŏm jơhngâm roi tơbăt, krao hơvơn kon pơlei jang kiơ̆ trong ‘mơ ‘met đak vă pơm ‘lơ̆ng ăn tơdrong jang xa: “’Năr tŏ lơ lou ưh jor gô ưh kơmăh đak, yoa đak dang ei lăp gơnơm đơ̆ng đak kuay păng đak tơ̆ thong đĕch, ưh đei dơnâu tih kiơ. Nhôn hơnơ̆ng roi tơbăt, krao hơvơn kon pơlei jang kiơ̆ trong ‘mơ ‘met đak, vei lăng ‘lơ̆ng đak tơruih ăn ‘long pơtăm.”

Mă tơpă ăn ƀôh, tơdrong ưh kơmăh đak tơruih ăn ‘long pơtăm tơ̆ Gia Lai hơnơ̆ng kơ đei lơ̆m rim pơyan phang, mă loi hăm tơring găh pơmât kơ dêh char. Ƀât ‘nao đei tơmât hơdai, kơdră chĕp kơ̆l Đảng dêh char Gia Lai athei tơlĕch trong man hơmet dơnâu đak mă ‘lơ̆ng, hăm kơsô̆ jên jang truh 17 rơbâu ti, lơ̆m jăl jang đơ̆ng 2025-2030. Oei kơplăh dang ei, dôm xăh athei hơtŏk tôch ai tơdrong iŏk yoa đak tơ̆ dôm dơnâu hlôi đei. 

Ƀok Nguyễn Văn Phương, jang tơ̆ Anih jang mŭk drăm xăh Gào ăn tơbăt: “Xăh athei dêh char tơgŭm jên vă hơmet ming dôm dơnâu đak tơ̆ tơring. Thoi nŏh bơ̆n gô bơ̆ jang kôch hơmet bơ̆n hơbong, dơnâu đak vă gơ̆h đei mah mai đak tơruih ăn ‘long pơtăm lơ̆m tơring. Găh đunh đai ning mônh kơnh, dôm thong đak gô đei bơ̆ găn pơm dơnâu iĕ vă mong đak, pơjing anih đei măh mai đak tơruih ăn ‘long pơtăm tơ̆ xăh”.