Tơ̆ chŭn mir kơtao să 17ha tơ̆ tơring Ea Sô, apŭng Ea Kar, dêh char Dak Lăk, ƀok Võ Quốc Dị atŭm hăm rơbou ‘nu bơngai jang tŏk bŏk koh kơtao. Ƀok tơbăt, tơklep kơjăp hăm jang pơtăm kơtao hloh 20 sơnăm, ŭnh hnam  jang sa iŏk yoa sơđơ̆ng. Hơdrô̆ 4 sơnăm kơ ou, lơ̆m 1 sơnăm ŭnh hnam jang sa iŏk đei hloh 1 ti hlak jên. Tơdrong jang iŏk đei ou mĭnh păh gơnơm trong tơgŭm răt iŏk hăm kơjă sơđơ̆ng đơ̆ng hnam kmăi rŏr ktao pơm sĭk, atŭm hăm jang kiơ̆ trong jang sa hle găh pơtăm kơtao dơ̆ng. Ƀok Võ Quốc Dị tơbăt:“Dang ei ŭnh hnam nhôn chă pơtăm hơdrech ktao K3. Găh tơdrong chă tơruih ‘noh ba tơruih hăm ƀek pruih kơdih păng ŭnh hơyuh, atŭm hăm răt răk kmăi đôh. Rim ‘măng koh đang lê̆ tơm so dăh mă pơtăm ‘nao nhôn jei chă tơruh đơ̆ng blŭng hloi, chă tơruih dang 3-4 khei blŭng sơnăm. Truh kơtao bluh kơjung ‘noh prôi phŏng, găh lơ phŏng NPK păng tuh hrou hăm phŏng Urê, tơgŭm ăn dơnơm kơtao blŭh vơ̆ tĕnh koăng klơ̆p krum hŭt ‘ngĕt.”

Jei tơklep kơjăp hăm jang ktao đơ̆ng hloh 20 sơnăm, ƀok Tô Bá Hồng, oei tơ̆ tơring Ea Sô, apŭng Ea Kar, tơbăt:“Bơ̆n đei 5ha ktao, hnam kmăi tơgŭm ăn lơ tơdrong nhen tơgum kon jên pruih đak 1 pơyan 3 triu hlak jên lơ̆m 1ha, koh ktao 2 triu hlak jên lơ̆m 1ha; đơ̆ng noh phŏng gômơ̆ng mir pơgar kơtao bơ̆n să dăh mă iĕ đei hnam kmăi tơgŭm ăn. Pơtih gia lơ̆m 1 ha ‘noh 1 tân, gômơ̆ng kơbơ̆n iŏk dơ̆ng. Ktao lơ sơnăm ou kơjă sơđơ̆ng jang sa iŏk yua kơjăp. Nhen sơnăm ou, ŭnh hnam nhôn koh tĕch lơ̆m 1 ha đei 70 - 80 tân, lơ̆m 1 tân đơ̆ng 1 triu 1 truh 1 triu 3 hlak jên, tơklăh pơđĭ kon jên jang ou to oei iŏk đei 1ha ‘noh 70 triu hlak jên.”

Tơring Ea Sô đei hloh 1.000ha ktao, ƀok Nguyễn Xuân Hữu, Kơdră chĕp pơgơ̆r tơring akhan, mă đơ̆ng tơdrong jang sa iŏk đei đơ̆ng jang kơtao tim mă đei lơ pơtêng hăm jang sâu riêng, vải, chehphe, tiu, mă lei ‘long pơtăm tơm kơ groi teh hrou chuơh ou, tơgum ăn lơ ŭnh hnam yak hloh dơnuh hin păng đei tơdrong hơrih sa sơđơ̆ng.“Kơdră tơring hơnơ̆ng pơma dơnuh hăm hnam kmăi pơm sĭk, hơlen hơdăh găh hơdrĕch pơtăm păng hnam kmăi hlôi păng tŏk bŏk tơlĕch jang kiơ̆ lơ hơdrĕch iŏk đei jơnei tơgŭm ăn kon pơlei pơtăm. Găh tơdrong phŏng, pơgang vei lăng ‘long pơtăm trŏ lăp, ‘noh nhôn ƀôh hnam kmăi rŏr kơtao pơm sĭk hơnơ̆ng dăr lăng kơjăp, tơgŭm djru kon pơlei lang să chă pơtăm kơtao vă tơlĕch jang kiơ̆ khoa hŏk kih thuơ̆t vă vei lăng năng tông ktao đei iŏk yua kơjăp hloh.”

Hrei ou dêh char Dak Lăk đei 15.000ha ktao, găh să akŏm chă pơtăm tơ̆ rim apŭng Buôn Đôn, Ea Súp, Ea Kar păng Mdrăk. Rim sơnăm koh iŏk đei truh 1 triu tân ktao.

Ƀok Lê Tuân-Kơ iĕng Kơdră chĕp pơgơ̆r Kong ty Ktao pơm sĭk 333 Dak Lăk tơbăt, hơnih ou hlôi tơgoăt jang hơdoi hăm hloh 21.000 ŭnh hnam kon pơlei oei tơ̆ rim apŭng Ea Kar păng Mdrăk, pơtăm 8.200ha ktao, lơ̆m 1 sơnăm koh iŏk đei dang 750.000 tân ktao. Kŏng ty hlôi iung jang hơdoi hăm kon pơlei păng kơdră tơring tơlĕch jang rim trong jang sa kơjăp ‘lơ̆ng:“Hnam kmăi tŏk bŏk tơlĕch jang pơm tơlĕch ‘lơ̆ng vă iŏk đei lơ đơ̆ng ior ktao, vei lăng ‘lơ̆ng tơdrong chă koh vă mưh ioi kơtao chơ ba năm tơ̆ hnam kmăi ‘lơ̆ng hloh. Adoi tơgĕch iŏk hloi dôm iă ktao ou to vă pơm tơlĕch phŏng vi sinh, iă ktao tĕch ăn rim hơnih rong kon tơrong, dăh mă trong jang hle hrei ou ‘noh pơm tơlĕch đei ŭnh hơyuh soh iă ktao mă lơ hnam kmăi hlôi iung jang. Nhôn jei tŏk bŏk hơlen pơtăm să rim hơdrĕch ktao ‘lơ̆ng, vă iŏk đei lơ đak ktao hloh dơ̆ng lơ̆m mĭnh hơgăt teh pơtăm ‘noh.”

Hăm tơdrong tơgoăt jang hơdoi kơjăp ƀar păh kon pơlei, hơnih mơdro sa păng kơdră tơring, hơnih jang ktao pơm sĭk Dak Lăk tŏk bŏk hơnơ̆ng atŏk tơ iung kơjăp, hơnhăk đei iŏk yoa sơđơ̆ng ăn rim pang păng tơgop lơ̆m tơdrong jang mŭk drăm tơring.