Dôm năr ‘nâu, kon pơlei tơ̆ apŭng Cư Kuin, dêh char Đắk Lắk mât lơ̆m pơyan phĕ tiu sơnăm 2024-2025. Yă tiu đĭ tŏk vă jê̆ truh 160.000 hlak 1 kĭ (yă măk hlŏh iŏk đơ̆ng sơnăm 2016 truh dang ei) oei pơjing jơhngâm hưch hanh tơgŭm ăn kon pơlei hơđơ̆ng jơhngâm tơmât jên jang ăn kơloăi tơmam pơtăm âu.

Lơ̆m apŭng Cư Kuin dang ei đei dang 4.700 ha tiu đei plei, plei tiu jô̆ păh lăp hlŏh 3,2 tân/ha, 1 sơnăm phĕ đei hlŏh 15.000 tân tiu. Kiơ̆ ƀok Nguyễn Cảnh Danh, Phŏ Kơdră Anih vei lăng choh jang xa păng cham char apŭng Cư Kuin, dêh char Đắk Lắk, dôm sơnăm tơjê̆ âu, yă tiu tŏk kơjung tơgŭm ăn kon pơlei sơđơ̆ng jơhngâm tơmât jên jang xa. Hơdai hăm tơgŭm ăn kon pơlei chă pơtâp pơhrăm khoa hŏk ki thuơ̆t, khul kơdră  tơring oei tơtă ăn kon pơlei lê̆ pơih xă teh pơtăm kư̆ kă, mă lăp hơnơ̆ng choh jang lơ̆m hơgăt teh hlôi pơtăm, jang kiơ̆ trong tuh hăm mơ̆r kơjăp ‘lơ̆ng.