Kiơ̆ hla bơar tơbăt đơ̆ng Hơnih vei lăng kon pơlei dêh char Dak Lăk, truh khei 12/2024, dêh char hlôi iung jang hloh 103% teh choh jang sa, hloh 65% teh jang tơdrong anai kiơ̆ trong tơmơ̆t dơ̆ng păng vat tơring groi teh pơdrŏ jang kơ dêh char. Dêh char Dak Lăk apĭnh hơmet ming tơdrong ‘meh vă iŏk yua teh truh sơnăm 2030 găh tơdrong pơm tơjur teh choh jang sa 5.200 ha, teh ăn ming man tơdrong jang ŭnh hơyuh 1.800 ha; lang să teh jang tơdrong anai 5.200 ha păng teh trong gre 6.000 ha…Găh jang kiơ̆ Khôi luơ̆t Groi teh sơnăm 2024, dêh char Dak Lăk hlôi pơjing 13 hla bơar tơchơ̆t khôi luơ̆t. Mă lei, dêh char tơƀơ̆p tơnap tap kơ yuơ khôi luơ̆t tơchơ̆t dôm kơ loăi teh hle, mă lei ưh kơ đei trong tơchơ̆t ayơ ăn gơ̆h tơplih. ‘Ngoăih kơ ‘noh, tơdrong sơkơ̆t hơdăh 62 trong tơlĕch ăn iŏk yua teh tim mă đei trong hơdăh pơm ăn truh tơnap tap lơ̆m hơmet ming pơprŏ jang. Tơ̆ jơ bơ̆ jang, yă Đoàn Thị Thanh Mai, Kơdră chĕp pơgơ̆r Hơnih bơ̆ jang Mŭk drăm Kuô̆k hô̆i hôn bơnê kơtang trong jang đơ̆ng dêh char Dak Lăk lơ̆m tơlĕch jang kiơ̆ rim tơdrong pơjao ăn.