Mĭnh lơ̆m dôm tơdrong jang tơm lơ̆m Lêh cheh phe Buôn Ma Thuột ‘măng mă 9, sơng đei lơ bơngai pơtăm chĕh phe lơ̆m teh đak tơrek truh ‘nŏh jĭ Tơdrong thi Bơngai jang chun mir rơgei sơnăm 2025 hăm hơnăn “Jang chĕh phe rơgei". Vang thi đei 4 khul truh đơ̆ng dêh char: Đắk Lắk, Kon Tum, Bình Phước, Sơn La. ‘Nâu jĭ dôm khul rơgei đei rơih kiơ̆ đơ̆ng dôm vŏng thi adrol kơ ‘nŏh vă chă rơih đei kon pơlei jang chĕh phe rơgei hlŏh vang mât lơ̆m gơmăng thi mă hơtuch. Hăm hơnăn “Jang chĕh phe rơgei”, dôm bơngai thi vang thi găh 4 tơdrong đei: Nơ̆r hmach kơkuh đơ̆ng bơngai jang chŭn mir, bơngai jang chŭn mir rơgei, bơngai jang chŭn mir vang jang hơdoi păng bơngai jang chŭn mir yak hlŏh tơdrong nol.

Mŏ H’roda Ayun (bơngai Rađe) – găh khul Đắk Lắk tơroi: Kiơ̆ đơ̆ng tơdrong thi, kơdih kâu mŏ hlôh vao dơ̆ng lơ tơdrong ‘nao mưh jang chĕh phe ‘lơ̆ng: “Jang chĕh phe rơgei gơ̆h pơm tơjur ƀiơ̆ kơchơ̆t ‘mê̆ pơm tơtŏ plei teh păng vei lăng ‘lơ̆ng đak yoa, cham char. Kiơ̆ đơ̆ng tơdrong thi âu kơdih kâu inh vă roi tơƀôh dơ̆ng ăn mih ma duch nă dôm tơdrong mă inh hŏk đei vă kon pơlei vei rong pơgar chĕh phe da ƀiơ̆ huach lơ jên jang păng đei yoa lơ, tơgŭm ăn kon pơlei jang tŏk, da ƀiơ̆ huach lơ jên jang”.

Tơdrong thi Bơngai jang chŭn mir rơgei sơnăm 2025 hăm hơnăn “Jang chĕh phe rơgei" đei pơgơ̆r ƀât Cham xă 10/3, plt Buôn Ma Thuột, dêh char Đắk Lắk sơng đei tơdrong tơrek đơ̆ng lơ kon pơlei jang chŭn mir. Ƀok Y Mơi M’Lô (bơngai Rađe) truh đơ̆ng xăh Cư Né, apŭng Krông Búk năm lăng thi ăn tơbăt, tơdrong arih xa kơ kon pơlei đơ̆ng rŏng kơ iŏk rơngei truh dang ei mă lơ ‘nŏh gơnơm đơ̆ng cheh phe. Mă loi đơ̆ng sơnăm sơ̆ truh dang ei, yă chĕh phe tŏk kơjung kơna tơdrong arih xa roi đei ƀôh ƀiơ̆.

Kiơ̆ ƀok Y Mơi M’Lô tơdrong thi “Bơngai jang chŭn mir rơgei” lơ̆m lêh chĕh phe oei tơgŭm ăn mih ma duch nă hơtŏk đei đon jang chĕh phe ‘lơ̆ng vă tĕch tơ̆ teh đak đe: “Tơdrong arih xa kơ kon pơlei roi tŏk, yoa hrei ‘nâu chĕh phe đei yă. Đei lơ tơdrong tơplih, tơdrong arih roi tŏk pơdrŏng, đei jên răt bơ̆n gre kŭm gơnơm chĕh phe đei yă, kon pơlei hơiă dêh. Hlŏh đơ̆ng lêh chĕh phe âu, sư kŭm tơgŭm vă kon pơlei lơ̆m apŭng plenh teh băt truh chĕh phe Buôn Ma Thuột ‘lơ̆ng mưh tĕch tơ̆ teh đak đe. Hơpơi ‘mĕh đơ̆ng rŏng kơnh chĕh phe đei yă hlŏh dơ̆ng vă kon pơlei đei tơdrong arih xa ‘lơ̆ng ƀiơ̆”.

Tơ̆ tơdrong thi Bơngai jang chŭn mir rơgei sơnăm 2025 hăm hơnăn “Jang chĕh phe rơgei", dôm bơngai thi tơƀôh hơdăh đon hlôh vao, tơdrong juăt jang păng băt trong jang kiơ̆ khoa hŏk ki thuơ̆t mưh jang chĕh phe rơgei ‘moi kiơ̆ tŏ ‘mi kial tơplih păng dôm tơdrong đei ƀơm truh tơdrong hơdrĕch, ot, tĕch mơdro, jang hơdoi, jang kiơ̆ hla ar pơkăp, pơjing păng atŏk tơiung trong jang hơdoi lơ̆m anih jang chĕh phe Việt Nam.

Jĭ bơngai đei măt lơ̆m Khul Bình Phước, ƀok Nguyễn Văn Nhân akhan, tơdrong thi jĭ anih ngôi pơchơt tôch đei yoa ăn bơngai jang chĕh phe: “Nhôn tôch hơiă mưh đei truh tơ̆ âu vă roi tơƀôh dôm tơdrong hlôh vao, vă kon pơlei jang chŭn mir băt trong jang xa đei yoa lơ păng jang đei tơmam ‘lơ̆ng. Yoa tơdrong ‘mĕh vă răt yoa tơ̆ anih tĕch mơdro hrei ‘nâu đe ưh kơ kăl lơ, mă đe ‘mĕh răt đei tơmam ‘lơ̆ng vă gơ̆h tĕch mơdro tơ̆ teh đak đe lơ ƀiơ̆”.

Tơrek truh hơnăn “Jang chĕh phe rơgei", ƀok Lê Đình Tư, Kơdră pơgar xă Aeroco Coffee, plt Buôn Ma Thuột, dêh char Đắk Lắk ăn tơbăt: dôm sơnăm tơjê̆ âu, tơ̆ tơring đei lơ trong jang hơdoi vă pơjing anih jang chĕh phe ‘lơ̆ng, khŏm jang đei tơmam ‘lơ̆ng hlŏh, lăp hăm tơdrong hơgăt tĕch mơdro tơ̆ teh đak đe: “Nhôn vang jang chĕh phe ‘lơ̆ng đơ̆ng dêh char, truh dang ei chĕh phe nhôn jang đei hlôi đei 1,2 anih tĕch mơdro răt tơmam tôch hơlen răt iŏk bơih. Dang ei nhôn kăl đei tơgŭm roi tơbăt chĕh phe ‘lơ̆ng đơ̆ng Buôn Ma Thuột pơma hơdrô̆ păng Việt Nam pơma atŭm. ‘Nŏh jĭ 1 lơ̆m dôm tơdrong gĭt kăl vă dôm bơngai juăt jang, dôm bơngai hơdrĕng, bơngai huch chĕh phe ‘mĕh huch chĕh phe ‘lơ̆ng truh chă, đơ̆ng noh bơ̆n roi tơbăt dôm tơmam chĕh phe ‘lơ̆ng hlŏh đơ̆ng Việt Nam hăm apŭng plenh teh”.

Lơ̆m lêh chĕh phe Buôn Ma Thuột ‘măng mă 9 oei pơgơ̆r hloi hop akŏm tĕch mơdro hăm apŭng plenh teh hăm hơnăn “Tơguăt, pơm hơtŏk tơiung tơdrong ‘lơ̆ng ăn chĕh Việt”. Hop akŏm pơma nuh tôch hơlen găh dôm tơdrong ƀơm truh anih jang cheh phe, nhen: Tơdrong tĕch mơdro cheh phe lơ̆m apŭng plenh teh, trong răt yoa chĕh phe; Trong tơlĕch dôm tơdrong tơgŭm kiơ̆ tơdrong hơgăt EUDR hăm anih jang chĕh phe Việt Nam; Dôm tơdrong hơgăt ‘lơ̆ng hăm tơring pơtăm chĕh phe… Kŭm hăm ‘nŏh, dôm bơngai tang măt oei pơma nuh găh hơnăp jang đơ̆ng anih tĕch mơdro vă hơtŏk tơdrong ‘lơ̆ng ăn cheh phe Việt Nam păng pơjing hơnăn chĕh phe Buôn Ma Thuột – anih truh đơ̆ng chĕh phe apŭng plenh teh; Tơdrong tĕch mơdro chĕh phe tơ̆ teh đak đe, hơlen năng trong tĕch mơdro xa păng dôm tơdrong găn trong tĕch mơdro chĕh phe lơ̆m apŭng plenh teh hrei ‘nâu, tơlĕch trong tĕch mơdro kơjăp ‘lơ̆ng ăn anih jang chĕh phe Việt Nam.