Dôm năr tơjê̆ âu, tơ̆ dêh char Đắk Lắk đei ƀôh dôm ‘măng ‘mi ưh kơ trŏ pơyan. ‘Mi ƀơ̆t kơplăh ‘long pơtăm tŏk bŏk lơ̆m khei ‘năr lĕch pơkao kơ tĕn plei pơm ăn lơ kon pơlei tơtăm gô ƀơm ưh kơ ‘lơ̆ng truh plei ưh kơ lơ păng ưh kơ ‘lơ̆ng, mă loi ‘noh jĭ ‘long cheh phe păng sầu riêng - dôm kơloăi ‘long tơm hơnhăk ăn kơjă mŭk drăm lơ kơ tơring.

Tơ̆ hơnăp tơdrong tŏ ‘mi kial ưh kơ sơđơ̆ng nhen hrei ‘nâu, anih vei lăng choh jang sa dêh char Đắk Lắk pơtho tơtă kơ tơring păng ŭnh hnam jang chŭn mir hơnơ̆ng dăr lăng chŭn na, kơchăng bơ̆n tơmam vă tơ jră hăm ‘măng ‘mi ƀơm ưh kơ ‘lơ̆ng truh ‘long pơtăm. Hăm cheh phe, sầu riêng tŏk bŏk lĕch pơkao, kơtĕn plei lăng kăl tang găn 1,2 tơdrong jĭ nhen thán thư, yă de, vŏng vĭl ƀrê. Dang ei, dôm anih joăt jang pơtho kon pơlei dôm trong jang ki thuơ̆t choh pơtăm ‘lơ̆ng vă tơ jră hăm tơdrong ‘mi đunh lơ năr, tang găn tŏ sĕt hloh tơdrong ƀơm ưh kơ ‘lơ̆ng truh tơ̆ plei păng tơdrong ‘lơ̆ng đơ̆ng tơmam choh jang sa.