Ŭnh hnam yă Nguyễn Thị Mai, oei tơ̆ pơlei Phú Yên 1, xăh Ia Hiao, dêh char Gia Lai ‘nao koh đang 3 hek tar kơtao, iŏk đei hloh 240 tấn. Đơ̆ng rŏng kơ jô̆ đĭ jên jang, ŭnh hnam yă Mai lơi dang 100 triệu hlak jên. Tơdrong chơt hơiă pơyan jang đei hơtŏk ƀơ̆t đei kơtao lơ, kơjă măk hai, đei hnam kơmăy tơgŭm jên păng pơgơ̆r koh iŏk hrôih hai.

“Tơdrong chơt hơiă tih hloh sơnăm ‘nâu ‘noh jĭ hnam kơmăy tơgŭm koh iŏk klĕch têt vă vei sơđơ̆ng jang hrĕnh ăn kon pơlei. Hnam kơmăy pơm sĭk tơgŭm koh iŏk 30 rơbâu 1 tấn vă kon pơlei đei hiôk jơhngơ̆m”.

Iŏk đơ̆ng vang jang hơdai hăm hnam kơmăy pơm sĭk, ŭnh hnam ƀok Đinh Kot, oei pơlei Ó, xăh Chư Krey, dêh char Gia Lai đei tơgŭm hơdrĕch ‘nao, pơtho trong pơtăm vei lăng păng hơnhăk kơmăy kơmŏk lơ̆m choh teh, pơtăm klĕp truh koh tĕch. Hăm trong jang ‘nao, iŏk yua kơtao đĭ tŏk đơ̆ng 70 tấn lơ̆m 1 hek tar tŏk vă jê̆ 90 tấn lơ̆m 1 hek tar. Jang hơdai kơjăp kŭm tơgŭm sư ưh kơ đei hoach dơ̆ng jên thuê bơngai jang nhen hơdrol. Gơnang đơ̆ng noh, 5hek tar pơyan ‘nâu hlôi hơnhăk ăn đei lơi hloh 200 triệu hlak jên ăn ŭnh hnam ƀok Đinh Kot:

“Kon pơlei nhôn pơtăm kơtao ‘noh sơđơ̆ng ƀiơ̆ pơting hăm tơm ƀum, hơƀo, tơh... gơnang đơ̆ng tơm kơtao mă tơdrong hơrih sa hơđơ̆ng ƀiơ̆”.

Tơdrong jang hơdai pơtăm kơtao hlôi tơgop tơplih ‘lơ̆ng tơdrong hơrih sa lơ ŭnh hnam kon pơlei pơlei Ó, xăh Chư Krey pơma hơdrô̆, pơm tơdrong tơplih ‘lơ̆ng lơ̆m trong tơchĕng, trong jang đơ̆ng kon pơlei tơring kon kông dêh char Gia Lai pơma atŭm. Ƀok Đỗ Minh Sơn, Kơdră chĕp kơ̆l Anih vei lăng kon pơlei xăh Chư Krey, dêh char Gia Lai tơbăt, kon pơlei lơ̆m xăh tŏk bŏk ƀrư̆ ƀrư̆ tơplih dôm hơgăt ‘long ưh kơ đei iŏk yua jing pơtăm kơtao, trŏ lăp hăm teh, tŏ ‘mi kial tơ̆ tơring:

“Dôm sơnăm tơ jê̆ âu, kon pơlei lơ̆m xăh hlôi tơplih ‘long pơtăm, hơnhăk dôm ‘long đei kơjă iŏk yua lơ nhen kơtao mơ̆t pơtăm. Iŏk đơ̆ng pơtăm kơtao hlôi pơm tơplih mŭk drăm kon pơlei, đei tơdrong hơrih sa hơđơ̆ng ƀiơ̆, um ai kơ xăh kŭm đei ‘lơ̆ng ƀiơ̆”.

Gia Lai dang ei ‘noh jĭ tơring pơtăm kơtao xă hloh tơring Tŏk bŏk - Tây Nguyên, hăm teh să dang 40.000 hek tar. Dêh char đei 2 hnam kơmăy pơm tơlĕch sĭk, akŏm kŏng suơ̆t iŏk đei hloh 26.000 tấn kơtao lơ̆m 1 năr. Dôm sơnăm tơ jê̆ âu, hnam kơmăy hlôi kơchăng pơjing trong jang hơdai hăm kon pơlei, pơjing tơring tơmam hơđơ̆ng păng kơjăp. Iŏk yua kơtao pơvei tơ̆ kơsô̆ hloh 80 tấn lơ̆m 1 hek tar; lơ hơgăt teh pơtăm, đei kơmăy tơruih kơdih păng iŏk yua hơdrĕch ‘nao đei hloh 90 tấn lơ̆m 1 hek tar.

Ƀok Nguyễn Xuân Phước, Phŏ Kơdră vei lăng Hnam kơmăy pơm Sĭk An Khê (dêh char Gia Lai) tơbăt, anih mơdro sa tŏk bŏk pơjing kơdơ kơtao xă, tŭn pran jang hăm kơmăy kơmŏk, iŏk yua kơmăy kơmŏk lơ̆m vei lăng iŏk yua păng rŏl kơtao, pơm tơdrong đei yua hơdai ăn pơđĭ kon pơlei păng hnam kơmăy.

“Hrei ‘nâu, teh pơtăm kơtao ‘meh vă tôch kơ să. Mă loi ‘noh jĭ tơdrong hnam kơmăy hơtŏk kŏng suơ̆t hlôi hơmet pơ ‘lơ̆ng hrĕnh kơsô̆ kơtao tơ̆ ‘ngoăih mir, tơgop pơm hơđơ̆ng tơdrong hơrih sa kơ kon pơlei tơ̆ tơring”.

Mưh tơdrong jang hơdai đơ̆ng kon pơlei păng anih mơdro sa roi ‘năr roi kơjăp, kơtao tŏk bŏk tơgŭm sơđơ̆ng tơdrong hơrih sa kơ dôm jĭt rơbâu ŭnh hnam kon pơlei tơ̆ Gia Lai. Tơdrong vei lăng hơđơ̆ng kơjă răt iŏk ‘lơ̆ng, tơgŭm ki thuơ̆t, kơmăy kơmŏk păng pơ gơ̆r pơm tơlĕch ‘lơ̆ng hlôi tơgŭm bơngai pơtăm kơtao hơđơ̆ng jơhngơ̆m tơklep hăm chŭn na, tơ jur ưh kơ pŭn ai, hơtŏk iŏk yua mŭk drăm, tơgop hơtŏk tơiung choh jang sa kơjăp kơ tơring.