Trong man iĕ găn hloh koeng kơphô̆ Đại Lộc, phương Bình Thuận, dêh char Lâm Đồng (sơ̆ ‘noh tơring Hàm Hiệp, apŭng Hàm Thuận Bắc, dêh char Bình Thuận). ƀar păh jih trong dôm mir pơgar ‘long pơkao rung reng chôh rang krao hơvơn Puih mak vih. Đơ̆ng rŏng têt, mưh pơkao rung reng hơlŭng tơ̆ cham, jei jing jơ ‘năr lơ ŭnh hnam ba kon hơ ‘lơ̆p năm jang tơ̆ hơtăih, pơkă ăn pơyan pơgou dih băl sơnăm đơ̆ng rŏng. Ŭnh hnam yă Trần Thị Nhẽ đei 8 ‘nu kon, rim ‘măng 30 dơnơm ‘long pơkao rung reng tơ̆ cham hnam chôh blang ‘noh mĭnh ‘măng jơhngơ̆m đon chơt hơ iă ‘nă hal hloh:“Puih mak ƀôh pơkao rung reng ‘noh chhôk dêh. ‘Long rung reng ba pơtăm lơ lou ‘noh kôn mon kon sou ba jang hơtăih brok vih tôm ‘noh chhôk dêh”.

Pơkao rung reng chôh pơkao, Têt vih. Pơkao rung reng hơlŭng, Têt đĭ. Hăm dôm bơngai pơtăm ‘long pơkao rung reng tơ̆ Hàm Hiệp, phương Bình Thuận, dêh char Lâm Đồng tơdrong hơrih sa ưh khan jô̆ hăm khei ‘năr, mă lei jô̆ hăm dơnơm ‘long pơkao rung reng ou đĭ dôm yơ sơnăm.

Ŭnh hnam ‘nhŏng Hồ Đắc Thuận, pêng jơhnơr tơklep kơjăp hăm chă pơtăm vei lăng, dang ei vei lăng năng tông vă jê̆ 1.000 dơnơm ‘long pơkao rung reng tih iĕ lơ̆m mir pơgar să vă jê̆ 1 ha. ‘Nhŏng Hồ Đắc Thuận chăm rim dơnơm ‘long dôm sơnăm, lơ̆m ou đei dơnơm ‘long pơkao rung reng tih sot hloh 80 sơnăm - khei ‘năr nhap ƀok ‘nhŏng pơjing hnam oei lơ̆m groi teh ou:“Rim sơnăm jei hơnơ̆ng ƀôh pơkao ‘long rung reng ‘noh ƀôh Têt bu bu jei chơt hơ iă ‘nă hal găh sơnăm ‘nao. Chăl nhap ƀok hlôi đei ‘long pơkao rung reng lơ̆m hơgăt teh ou bơih. Tơdrong joăt pơtăm pơkao rung reng kơ pơlei bơ̆n ‘noh ba tôch hưch hanh hơmanh bơnê găh hơdrĕch ‘long pơkao rung reng. Pơkao rung reng bơ̆n tơ̆ ou đei 5 truh 18 hlak pơkao, ƀou phu tôch kơ ‘lơ̆ng. Rim sơnăm đe đơ̆ng Bình Định, Huế, Đà Nẵng, đơ̆ng miền Tây luh năm tơ̆ ou răt ‘long pơkao rung reng tôch kơ lơ”.

Pơlei pơkao rung reng Hàm Hiệp, phương Bình Thuận, dêh char Lâm Đồng hlôi đei kơhrĕng ŭnh hnam kơ mơjĭt sơnăm ou ki tơklep kơjăp hăm tơdrong jang pơtăm ‘long pơkao rung reng. Têt Nguyên đán Bính Ngọ 2026 hlôi lĕch đơ̆ng pơlei ‘long pơkao rung reng Hàm Hiệp, tơdrong hơrih vih hơlơ̆k dơ̆ng lơ̆m năr hmă hăm dôm kon pơlei hơngŭr vei lăng năng tông, kăt hơmet sơdrai, pơtăm ming. Dôm hlak pơkao hơlŭng ưh khan pơtôch mĭnh pơyan akŏm ŭnh hnam, mă oei pơih ăn jơhngơ̆m đon lui lơ̆m ‘măng chôt vih dơ̆ng lơ̆m Pơyan Puih mak sơnăm truh ou kơnh.