- Ƀok ăi, kiơ̆ Tơdrong vă jang atŏk tơ iung jang chehphe kơjăp ‘lơ̆ng truh sơnăm 2030, dêh char Dak Lăk sơkơ̆t hơdăh hơgăt teh pơtăm dang 200.000ha, hăm đei plei jô̆ hơtŏ 2 tân 5 tă. Mưh lei vă iŏk đei trong tơlĕch jang ou, dêh char hlôi đei dôm trong jang hơdăh lơ liơ hŏ ƀok?

Ƀok Nguyễn Thiên Văn: Lơ̆m tơlĕch jang kiơ̆ Tơdrong vă jang atŏk tơ iung tơdrong jang chehphe, dêh char Dak Lăk gô akŏm jang kiơ̆ ‘lơ̆ng lơ̆m choh jang sa. ‘Moi kiơ̆ hla kak choh jang sa, groi teh, dêh char gô pơtrŭt păng pơtho pơkă ăn kon pơlei rơih dôm groi teh trŏ lăp vă chă pơtăm păng pơtăm ming chehphe. Nhôn gô pơjing rim tơring să pơtăm ngăl chehphe, akŏm lơ̆m choh jang sa rơgoh ‘lơ̆ng, choh jang sa đei hla bơar pơkăp ‘lơ̆ng, hăm trong tơlĕch jang 80% hơgăt teh jang chehphe kiơ̆ trong ‘nou. ‘Ngoăih kơ ‘noh, dêh char gô tơmơ̆t jên jang ming man hơboong thoong đak vă sơđơ̆ng măh mai đak chă pruih ăn ‘long pơtăm. Dêh char hơnơ̆ng tơlĕch jang rim trong jang chă phĕ, vei lăng năng tông đơ̆ng rŏng phĕ, sơđơ̆ng 95% plei chehphe đei sơ̆k hơdrĕng ƀlep hăm tơdrong tơchơ̆t.

- Ŏ ah, hrei ou rim tơdrong pơkoel găh tơdrong tơchơ̆t ‘lơ̆ng roi năr roi kơhret, kơtang, mă kăl hăm tơmam drăm choh jang sa tĕch mơdro tơ̆ teh đak đe nhen chehphe, mưh lei vă trŏ lăp hăm dôm tơdrong pơkoel đơ̆ng hơnih tĕch răt, khei năr ou kơnh dêh char Dak Lăk gô lăng kơjăp truh tơdrong ‘nou lơ liơ hŏ ƀok?

Ƀok Nguyễn Thiên Văn: Nhôn sơkơ̆t kăl đei tơring pơtăm să, đei plei lơ. Mă ƀar ‘noh jang kiơ̆ rôm tropng trong choh jang sa gơ̆h hơgei, sơđơ̆ng ‘lơ̆ng hơ iă hăm cham char păng pơkom lơ̆m tơmơ̆t jên jang vă pơjing đei tơmam drăm đei tơdrong tơchơ̆t ‘lơ̆ng trŏ ƀlep hăm dôm tơdrong pơkoel đơ̆ng hơnih răt iŏk lơ̆m teh đak păng teh đak đe. ‘Moi kiơ̆ dôm tơmam drăm ‘lơ̆ng lơ loh, nhôn akŏm lơ̆m tơ iung pơjing hnam kmăi pơm tơlĕch vă krao hơvơn rim hơnih mơdro sa vang iung jang pơm tơlĕch tơmam drăm lơ̆m rim hơnih jang kmăi kmŏk pơm tơlĕch tơmam drăm kơ dêh char. Đơ̆ng noh gô pơm tơlĕch đei tơmam drăm ‘lơ̆ng hăm tơmam drăm choh jang sa tech mơdro tơ̆ teh đak đe tŏk măt hloh dơ̆ng. ‘Ngoăih kơ ‘noh, tơ iung pơjing rim hơnăn tơmam drăm adoi nhen tơgŭm djru vei lăng năng tông nơ̆r tơbăt groi teh chehphe Buôn Ma Thuột vă tĕch mơdro tơmam drăm bơ̆n hăm tơmam drăm ‘lơ̆ng, hăm trong pơm tơlĕch păng kmăi kmŏk gơ̆h hơgei lơ loh tĕch mơdro ăn lơ̆m teh đak păng tơ̆ teh đak đe.

- Ƀok ăi, vă atŏk tơ iung tơdrong jang chehphe kơjăp ‘lơ̆ng lei oei kăl đei vang iung jang hơdoi kơjăp kiơ̆ trong tŏk kơjă ‘lơ̆ng. Mưh lei, dêh char gô đei trong jang tơgŭm djru lơ liơ vă tơgŭm ăn kon pơlei jang păng hơnih mơdro sa lơ̆m tơdrong atŏk tơ iung  choh jang sa, vă pơm hơtŏk kơjă pơ̆ih să hơnih tĕch mơdro kiơ̆ trong jang ou?

Ƀok Nguyễn Thiên Văn: Dêh char Dak Lăk gô tơlĕch rim trong jang vang yak hơdoi hăm kon pơlei choh jang sa, hơnơ̆ng hơmet pơ ‘lơ̆ng rim hơnih jang tơgŭm djru kon pơlei, nhen Hơnih mong jên, Hơnih tơm chă tơchĕng hơlen, hơnih tơm khoa hŏk, vă tơgŭm kon pơlei băt hlôh ƀôh hơdăh jang kiơ̆ khoa hŏk kih thuơ̆t păng kon jên tơmơ̆t jang tơgŭm ăn choh jang sa. Adoi, pơtrŭt hơnih mơdro sa găh tơdrong jang chehpe atŏk kơtang atŏk tơ iung tơmam drăm, pơm hơtŏk kơjă, trŏ lăp hăm tơdrong ‘meh vă atŏk tơ iung mŭk drăm-tơpôl. Dêh char Dak Lăk gô akŏm rim trong jang hơmet pơ ‘lơ̆ng tơhlăk tơhlĭn, đei trong tơlĕch jang ‘lơ̆ng hơ iă pran kơtang păng atok kơtang pơjao jang adoi nhen vang yak hơdoi hăm hơnih mơdro sa truh tơmơ̆t jên jang tơ̆ Dak Lăk, adoi tơgoăt jang hơdoi hăm rim khul kon pơlei choh jang sa vă iung jang kiơ̆ tơgoăt jang hơdoi pơm tơlĕch tơmam drăm tĕnh koăng hloh vă ba tơmam drăm kơ dêh char Dak Lăk truh hăm hơnih tĕch răt adoi nhen vang pơm tơlĕch ‘lơ̆ng tơmam drăm choh jang sa dêh char, lơ̆m ou đei chehphe.

- Lei ah, bơnê kơ ih ƀok hơ!