‘Năr 5/2, Kŏng ti Banana Brothers Farm, apŭng M’Đrắc, dêh char Đắk Lắk pơm lêh tĕch tơlĕch 5 container (100 tấn) prit tơ̆ anih tĕch mơdro Trung Quốc păng Hàn Quốc. Yă Lê Thị Mỹ Hạnh, Kơdră vei lăng kŏng ti roi tơbăt, sơnăm sơ̆, kŏng ti hlôi tĕch tơlĕch hloh 10.000 tấn prit tơ̆ dôm teh đak Hàn Quốc, Trung Quốc, Nhật Bản, Mông Cổ… Sơnăm ‘nâu, kŏng ti gô pơih să dơ̆ng dang 500 hec-ta vă hơtŏk kơsô̆ prit păng tĕch tơ̆ dôm anih tĕch mơdro ‘nao:

“Lơ̆m sơnăm 2025, nhôn tôch kơ hơmŏ gô pơih să dơ̆ng farm ‘nao păng hơtŏk kơsô̆ tơmam tĕch tơ̆ teh đak đe truh bơngai răt yua lơ hloh dơ̆ng, yua kơ ‘meh vă bơngai răt yua roi ‘năr roi tih”.

Hăm Kŏng ti Ban Mê Green Farm, pơlei tơm Buôn Ma Thuột, dêh char Đắk Lắk, iŏk đơ̆ng blŭng sơnăm 2025, hlôi đei hla ar ƀiên ƀan chih tơƀlŏk păng pơm hla ar hăm bơngai jang hơdai hloh 100 container sầu riêng, hơtŏ hloh 2.700 tấn lom sầu riêng pơkrăl tơngiĕt tĕch tơ̆ teh đak đe. Ƀok Nguyễn Văn Công, Kơdră vei lăng Kŏng ti, roi tơbăt.

“Sơnăm 2025 hlôi iŏk đei lơ tơdrong ƀôh hơiă ‘lơ̆ng, vă rim  bơngai jang hơdai hlôi pơm hla ar đang găh tơdrong jang hơnih jang 1 păng kŏng ti tŏk bŏk athei tơlĕch jang dôm tơdrong jang vă jang hơdai pơih să dơ̆ng hơnih jang păng dôm hơnih mong răk hơdai nai hai”.

Mĭnh tơdrong đei ƀôh chơt hơiă nai lơ̆m tĕch tơmam đơ̆ng choh jang sa tơ̆ teh đak đe tơ̆ Đắk Lắk ‘noh jĭ klăih song cheh phe ‘lơ̆ng, cheh phe tôch kơ ‘lơ̆ng hơnơ̆ng đei dôm anih tĕch mơdro apŭng plĕnh teh bơngơ̆t truh. Hơdai hăm cheh phe pơm tơlĕch hmă, dôm tơmam cheh phe pơm tơlĕch ‘lơ̆ng kơ dêh char kŭm ƀrư̆ ƀrư̆ tơƀôh hơdăh đei anih dơ̆ng mưh đei măt tơ̆ lơ teh đak. Lơ̆m noh đei dôm anih tĕch mơdro tôch kơ hơken mă lei ƀĕnh tơmam ‘lơ̆ng nhen: Mi, Nhật Bản, Hàn Quốc, châu Âu… Ƀok Lê Đình Tư, Kơdră vei lăng Kŏng ti Minodo Farm Care, pơlei tơm Buôn Ma Thuột, akhan: sơnăm 2025 hơnơ̆ng pơkă jing 1 sơnăm yak hơtăih đơ̆ng tơmam choh jang sa Đắk Lắk tơdăh đei tơmơ̆t jên jang, bơngơ̆t truh ƀlep trong.

“ Dôm anih mơdro sa pơm tơlĕch ‘lơ̆ng păng pơm cheh phe tôch kơ ‘lơ̆ng, mă hơdrol athei đei tơdrong tơgŭm găh trong jang tơgŭm. Mă 2 ‘noh găh jên hu vă tơplih găh kơmăy kơmŏk, maketing vang akŏm dôm jơnŭm kơchơ apŭng plĕnh tĕh jên tôch kơ lơ athei đei tơdrong tơgŭm đơ̆ng trung ương truh tơring”.

Ƀok Nguyễn Hoài Dương, Kơdră Anih vei lăng găh Choh jang sa păng Hơtŏk tơiung tơring tơrang dêh char Đắk Lắk roi tơbăt: sơnăm 2025, dêh char hơnơ̆ng pơm ‘lơ̆ng tơmam đơ̆ng choh jang sa, pơm lăp hăm tơdrong hơgăt ‘lơ̆ng tĕch tơ̆ teh đak đe.

“Nhôn tôch kơ bơngơ̆t truh păng pơm tơdrong hiôk vă dôm anih mơdro sa pơm đei trong pơm tơlĕch akŏm, đei hla ar pơkăp, đei hơnăn păng pơjei đei hăm dôm anih tĕch mơdro. Mă loi ‘noh jĭ dôm anih tĕch mơdro athei tơmam mă ‘lơ̆ng, roi ‘năr roi hơlen. ‘Noh jĭ tơdrong ‘lơ̆ng vă gơh hơtŏk kơjă kăp gĭt tơmam đơ̆ng choh jang sa tơ̆ Đắk Lắk pơma hơdrô̆, Tây Nguyên pơma atŭm”.

Hăm dôm tơmam ‘lơ̆ng đei yua tih păng tơdrong hơdrin ưh kơ đei pơdơh đơ̆ng dôm anih mơdro sa, hơmŏ sơnăm 2025, tơmam đơ̆ng choh jang sa Đắk Lắk hơnơ̆ng hơtŏk hơnăn, pơih să anih tĕch mơdro tơ̆ teh đak đe vă iŏk đei lơ jơnei ‘nao. Tơdrong ‘nâu tơgop pơm hơtŏk ‘lơ̆ng iŏk yua ăn kon pơlei, anih mơdro sa păng pơtrŭt hơtŏk tơiung mŭk drăm - tơpôl kơ dêh char, yak truh jang đei tŏk hrĕnh tŏk 2 kơsô̆ lơ̆m jăl jang truh.