Tơ̆ hop akŏm, dôm bơngai tang măt tơbăt, ‘ngoăih kơ đak yua hum hơrao, ‘nhao hơpĕch, sŏ nhă păng đak tơruih, tơring Tŏk bŏk păng Tây Nguyên đei truh 94 tu đak khoáng păng đak tŏ đei kơdih. Kiơ̆ kơ PGS.TS Nguyễn Văn Lâm, Kơdră Khŭl jang găh Teh hơyuh tŏ ‘mi kial Việt Nam, ‘nâu jĭ tơmam ‘lơ̆ng tôch kơ tih vă hơtŏk tơiung mŭk drăm. Vă hơtŏk tơmam jang âu, rim tơring kăl kơ jăh tơlĕch jang tơproh hơmet akŏm păng sơng đei tơmơ̆t jên jang kơmăy kơmŏk.

Hop akŏm “Vei lăng, iŏk yua păng pơtrŭt tơmơ̆t jên jang hơtŏk tơiung tơmam drăm đak tơklep hăm choh jang sa, tơring tơrang ‘nao păng ŭnh hơyuh rơgoh tơring Tŏk bŏk - Tây Nguyên” kŭm pơih ăn tơdrong hiôk pơtrŭt tơmơ̆t jên jang, sơng đei jên jang, tơmam ‘moi kiơ̆ tơdrong jang hơdai đơ̆ng teh đak - kơdih (PPP) vă hơmet pơ ‘lơ̆ng anih jang găh đak, hơmet pơ ‘lơ̆ng dôm tơdrong tơhlăk hrei ‘nâu, yak truh tơdrong hơgăt hơtŏk tơiung kơjăp ăn pơđĭ tơring.