VOV4.Bahnar - Jang kiơ\ tơchơ\t tơjur yua jên măt lơ\m kla jên, Anih jang unh hơyuh Đak Lak hlôi hăt hot jang hadoi hăm dôm anih mong jên păng anih io\k jên yua unh hơyuh tơ\ unh hnam kon pơlei. Mă lei, tơdrong jang âu dang ei oei đei lơ tơnap tap, yuơ lơ bơngai yua unh noh kon pơlei jang mir tam mă juăt hăm tơdrong yua tài khoản pơkăp tơ\ anih ‘măn jên, lơ\m kơplăh dôm anih io\k jên tơ\ unh hnam tam mă tơpă tơre\k truh tơring ataih yaih kơ dêh char.

            Kơtă ăh plei tơm Buôn Ma Thuột, mă lei rim khei, [ok  Lê Ngọc Hải oei tơ\  phường Ea Tam duh athei hao gre hloh 4km năm truh Anih jang unh hơyuh Đak Lak vă kla jên yua unh hơyuh. ‘Nguaih kơ unh yua lơ\m hnam, unh hnam [ok Hải oei yua kơmăi [ôm đak ruih ăn tơm cà phê păng ‘nhot pơtăm, rim khei athei kla pơhlom 400 truh 500 rơbâu hlak jên yua unh. Mă ưh hiôk, lơ khei tơhăt kơ jang mir pơgar, hiơt năm kla jên, noh đe tơpăt unh, mă lei [ok Lê Ngọc Hải duh oei yua jên măt vă kla kơtă tơ\ Anih jang unh hơyuh: “Hơnơ\ng truh ăh năr pơkăp noh ba athei năm kla. Kiơ\ kơxo# yua lơ dăh mă to\ xe\t, mă lei rim khei kla đơ\ng 400 truh 500 rơbâu hlj. Đe pơkăp đơ\ng năr 19 noh kla jên. Mưh klui, ba ưh kla jên noh đe truh tơpăt le# unh. Ba ưh đei pơih tài khoản tơ\ anih mong jên kơlih hăp tơnap, hrat dơ\ng, ba ưh đei gơih jên lơ\m tài khoản pơm yă kiơ ăi?”

            Tơring kơdra#m thoi ăi bơih, tơdrong io\k jên yua unh hơyuh tơ\ tơring pơxe\l, hăm bơngai yua unh noh kon pơlei jang mir roi tơnap hloh dơ\ng. {ok Nguyễn Văn Sỹ – Kơdră Anih jang unh hơyuh Ea Sup ăn tơbăt, tơring xơlam teh, adro# đei minh anih mong jên pơm jang, oei anih io\k jên yua unh tơ\ unh hnam duh adro# anih Bưu điện vang jang. Yuơ noh, tơdrong kla jên yua unh hơyuh athei kla hăm jên măt đe\ch: “Tơdrong kla jên yua unh hơyuh tơ\ apu\ng Ea Soup âu noh tơnap tap hloh. Mă kăl, io\k jên kiơ\ anih mong jên noh tơ\ âu nhôn adro# đei anih mong jên Agribank đe\ch. Anih ATM duh ưh đei, adro# 2 anih  ATM. Noh tơdrong mă kon pơlei pơih tài khoản duh tơnap. Tơring tơnap tap, kon pơlei erih răh rai tơ\ âu tơ\ to noh chă io\k kiơ\ unh hnam duh ưh đei tơnăp. Tơ\ âu adro# đei Bưu điện”.

Hăm tơring xă, Anih mong jên Choh jang xa păng Hơto\k tơring pơxe\l dêh char Đak Lak dang ei đei pơhlom 130.000 tơmoi pơm jang hăm anih mong jên tơ\ âu, lơ\m noh 60.000 tơmoi to\k io\k jên păng 70.000 tơmoi gơih jên, jing tơdrong hiôk ăn tơdrong klă jên kiơ\ pơkăp tài khoản. Yuơ noh dang ei pơtơm đei tơ\ hơla 30.000 tơmoi kla jên yua unh hăm pơkăp tài khoản. {ok Phan Thông Thái – Pho\ kơdră Anih mong jên Choh jang păng Hơto\k tơring pơxe\l dêh char Đak Lak ăn tơbăt, anih jang gô pơtoi pơm trong hiôk hloh vă tơmoi kla jên yua unh hăm trong âu: “Nhôn hơ iă, tơnăp hăm tơdrong kla jên yua unh kiơ\ anih mong jên. Nhôn tơle\ch jang tôm tơ\ dôm anih jang, pơm thoi yơ vă kon pơlei pơih tài khoản kla jên yua unh đơ\ng anih mong jên. ‘Nguaih kơ noh, nhôn oei pơtruh ăn Trung ương minh tơdrong pơkăp to\k io\k hăm dôm unh hnam kon pơlei jang mir vă pơm jang hăm Anih mong jên choh jang xa dêh char Đak Lak đơ\ng 1 truh 2 triu hlak jên vă kla jên yua unh âu. Mưh tơmoi  đei tài khoản noh rim khei nhôn io\k pơkăp lơ\m 6 ‘măng. Lai yơ tơmoi đei jên noh nhôn io\k jên jơ noh”.

Anih jang unh hơyuh Đak Lak dang ei vei hơlen, te\ch unh ăn hloh 500.000 tơmoi yua, lơ\m noh đei 440.000 tơmoi yua unh tơ\k hơdăh. Anih jang k^ pơkăp io\k jên yua unh hăm unh hnam hăm 14 anih mong jên păng 6 anih io\k jên rim khei. {ok Lê Hoài Nhơn – Pho\ kơdră Anih jang unh hơyuh Đak Lak xơkơ\t tơdrong kla jên hăm tài khoản anih mong jên dăh mă io\k jên kiơ\ unh hnam ưh adro# tơgu\m ăn anih jang unh tơjur bơngai jang io\k jên tenh kuăng, hơdăh hloh mă oei pơm trong hiôk ăn tơmoi yua unh kla jên, tang găn [iơ\ tơdrong tơpăt unh: “Jơnu\m pơgơ\r teh đak xơkơ\t tơjur [iơ\ yua jên măt vă kla, noh nhôn duh jang atu\m hăm dôm anih mong jên vă pơih tài khoản, ăh kla jên ăn nhôn noh gô kơdih io\k jên kla. Hăm dôm anih io\k jên kiơ\ unh hnam noh pơkăp hăm nhôn, anih jang io\k jên đei axong tơ\ tơring kon pơlei oei, hăm tơdrong vă tơmoi yua unh kla jên hiôk hloh”.

Hơdăh noh tơdrong kla jên yua unh hăm trong io\k jên kiơ\ tài khoản tơ\ anih mong jên jing minh tơdrong hiôk. Mă oei lơ tơnap tap, mă lei Anih jang unh hơyuh Đak Lak pơtoi dru\t kơtang tơdrong tơroi vă tơmoi yua unh lăp đon pơm kiơ\ trong jang âu đơ\ng Jơnu\m pơgơ\r teh đak, hăm pơkăp truh đ^ xơnăm âu gô đei pơhlom 60% tơmoi kla jên yua unh hăm tơdrong kla jên kiơ\ tài khoản dăh mă kla jên kiơ\ unh hnam nai.

Lan chih păng rapor