Anih jang pơgang Đắk Lắk dang ei đei hlŏh 6.660 ‘nu kăn ƀô̆, bơngai jang, lơ̆m noh 20,5% kăn ƀô̆, ƀak si đei hŏk đăi hok păng đơ̆ng rŏng kơ đăi hŏk. Lơ̆m dêh char đei 92,3% hnam pơgang đei ƀak si păng đĭ đăng Hnam pơgang đei chô̆ kơmăy internet, phần mềm vei lăng jang pơgang. Mă loi, kơsô̆ hnam pơgang xăh lăp hăm dôm tơdrong Hơgăt kơ teh đak truh sơnăm 2030 đĭ lơ hlŏh kơsô̆ tơlĕch bơih.

Tơ̆hơnăp dôm tơdrong nol đơ̆ng tơdrong jĭ krê hơmơt nhen hơnơ̆k A H1N1, Ebola, MERS-CoV, SARS păng moi ‘nŏh jĭ COVID-19, anih jang pơgang Đắk Lắk jang hơdoi kơjăp hăm dôm anih jang kơpal, khul; grŭp, tơlĕch lơ trong tang găn ‘lơ̆ng tơdrong jĭ. Pơm lăp hăm tơdrong ‘mĕh vă vei lăng jơhngâm pran roi đunh roi tŏk đơ̆ng kon pơlei, Anih jang pơgang Đắk Lắk kơchăng tơmât yoa dôm ki thuơ̆t kơmăy kơmŏk ‘nao nhen kơmăy đei yoa vă răih hơmet jĭ plei nuih, hlŏng pham, kơdâu plei lĕn, răih tơ̆ lăm, pơm tơjur ƀiơ̆ hrăt hrot bơngai jĭ tơ̆ hnam pơgang kơpal. Hăm dôm tơdrong jang đei, anih jang pơgang Đắk Lắk đei hơpăh ăn lơ Mê đai bơ̆ jang rơgei, Hla kơ pơjei băl gơ̆h hơgei, kŭm hăm lơ Ƀăng khen đơ̆ng Thủ tướng teh đak, Anih tơm vei lăng jang pơgang; Lơ ƀok thây pơgang rơgei đei pôk pơ ư.