Vă jê̆ 20 sơnăm tơklep kơjăp hăm tơring sơlam teh đak, Thiếu tá, ƀak si Nguyễn Văn Quốc Trí atŭm hăm ƀô̆ đô̆i kơlong jơk Kơđông ƀô̆ đô̆i vei lăng sơlam teh đak Tr’hy, apŭng Tây Giang hlôi pơrô̆ pơrôp, pơtho tơbăt ăn kon pơlei Kơ Tu băt hlôh ƀôh hơdăh găh tơdrong răm đơ̆ng kơ̆m kơ yang pơ-‘nhang kơ hơdrĕ, xut hŭt dôm tơdrong joăt joe pă trŏ lăp lơ̆m kon pơlei.

Tih vơ̆ djơ̆ ‘lơ̆ng tơ̆ apŭng groi kông Núi Thành, dêh char Quảng Nam. Lăp đơ̆ng rŏng lĕch ‘măng khoă Hnam trương Đăi hŏk Y Dược Huế (Ðại học Huế) ƀak si Nguyễn Văn Quốc Trí vih bơ̆ jang tơ̆ Kơđông Ƀô̆ đô̆i vei lăng sơlam teh đak Đak Pring (apŭng Nam Giang). Truh khei 5/2021, ƀak si Trí đei pơjao năm bơ̆ jang dơ̆ng tơ̆ Hơnih Khăm jĭ jăn ƀô̆ đô̆i kon pơlei AXan, Kơđông ƀô̆ đô̆i vei lăng sơlam teh đak Tr’hy, apŭng Tây Giang, khăm, hơmet jĭ ăn kon pơlei 4 tơring sơlam teh đak kơ apŭng Tây Giang păng truh hloi mĭnh ƀar pơlei tơjê̆ hăm teh đak boăl Lào. Hloh lơ sơnăm tơklep kơjăp hăm tơring ou, Thiếu tá, ƀak si Nguyễn Văn Quốc Trí atŭm hăm dôm bơngai ƀô̆ đô̆i kơlong jơk hlôi pơrô̆ pơrôp, pơtho tơbăt ăn kon pơlei bơngai Kơ Tu ƀar păh tơring sơlam teh đak băt hlôh ƀôh hơdăh găh tơdrong răm đơ̆ng kơ̆m kơ yang pơ-‘nhang kơ hơdrĕ, xut hŭt dôm tơdrong joăt joe pă trŏ lăp lơ̆m kon pơlei.

20 sơnăm tơklep kơjăp hăm kon pơlei tơring sơlam teh đak, mă đơ̆ng dang yơ, mưh kon pơlei chă jĭ jăn, soai pơnhul sa pơmou, hla ngón, sut sôch, ƀih kăp, mă kăl hơnhơl kon hơ ‘lơ̆p ... kon pơlei jei lui kơjăp, năm tơchă ƀak si Nguyễn Văn Quốc Trí.  Tơjê̆ ou, lơ̆m gơmăng tơngiĕt hơheo, kơtơ̆ng mĭnh ‘nu drŏ kăn bơngai  Kơ Tu hơnăp tŏk bok jăl trong năm ba hnam pơgang ‘noh đĭ vă hơnhơl, jĭ klak tôch kơ dêh, pă kĕ hrơ̆ng vă hao gre bơ bĭt chơ năm tơ̆ hơnih khăm. Ƀak si Nguyễn Văn Quốc Trí atum hăm rim ƀok thây pơgang lơ̆m hơnih jang tĕnh koăng năm truh mă hiŏng hơnhơl ‘lơ̆ng hơ iă, pơ đĭ mĕ kon drŏ kăn hơnăp ou jei pran jăng grăng ‘lơ̆ng.

Dôm tơdrong ưh kơ kĕ kơ hiơt ‘moi kiơ̆ dôm sơnăm bơ̆ jang tơ̆ tơring groi kông hăm ƀak si Trí păng rim ƀok thây pơgang bôl boăl ‘nhŏng roi năr roi lơ. Đe sư hlôi jing dôm bơngai gơnang kơtang hloh kơ kon pơlei. Ƀak si Nguyễn Văn Quốc Trí tơroi: “Tơring mă Hơnih oei ‘noh tơ̆ tơring AXan tơring groi kông kơ apŭng Tây Giang, dêh char Quảng Nam, kon pơlei tơ̆ ou ‘noh bơngai Kơ Tu ngăl, tơdrong hơrih sa păng oei sa kơ kon pơlei oei mơmat tat kơna oei gei kơjăp dôm tơdrong joăt joe pă trŏ lăp. Bơ̆ jang pơrô̆ pơrôp, pơtho khan kon pơlei hŭt rim tơdrong pă trŏ lăp đei nhôn tơlĕch jang kơtang hloh, roi năr kon pơlei roi ƀôh hơdăh păng hlôh vao ƀiơ̆. Lơ̆m dôm sơnăm ou ki, ba hlôi tơƀơ̆p lơ bơngai jĭ tôch gĭt kăl nhen bơngai jĭ đơ̆ng ƀih choh, soai pơnhul sa pơmou, đơ̆ng noh bơngai hơnăp hơnhơl tŏk bŏk trong yak năm tơ̆ hnam pơgang. Lơ̆m ou ba jei hlôi ming hơmet ăn lơ bơngai yak hloh tơdrong lôch răm”.

Ƀak si Nguyễn Văn Quốc Trí hơnơ̆ng năm tơ̆ pơlei pơla dăr lăng hơlen jơhngơ̆m jăn, apĭnh jet gia pơma dơnuh, pơtho ăn kon pơlei tang găn hơlou jĭ jăn păng chă ming hơmet đĕch ăn kon pơlei. Adoi, pơtho tơbăt ăn kon pơlei tang găn hơlou rim tơdrong jĭ jăn, vei lăng rơgoh cham char păng chă pơtăm rim hơdrĕch ‘long pơgang git kăl vă vei lăng năng tông kơdih tơ̆ hnam. Ƀok Bling Mưr oei tơ̆ pơlei A Banh 1, tơring Tr'hy, apŭng Tây Giang hôn bơnê:“Ƀak si Nguyễn Văn Quốc Trí hơnơ̆ng chă pơtho khan tôch phăl hơlăng, lăng bơngai jĭ nhen lĕ bơngai lơ̆m ŭnh hnam. Đei ‘măng ƀak si Trĭ koa thoong đak năm truh pơlei vă chă ming hơmet ăn bơngai jĭ, bơngai kră hơrih sa tơnap tap ưh kơ đei rơvơn vă năm tơ̆ hnam pơgang chă khăm, ming hơmet jĭ jăn. ‘Ngoăih chă khăm ming hơmet jĭ ăn kon pơlei, Ƀak si Trĭ oei pơtho ăn kon pơlei pơm kiơ̆ trong tang găn tơpŭ hơ ‘lơ̆p lơ ăn rim klo hơkăn, pơtho tơbăt ăn găh trong tang găn jĭ jăn ou to dơ̆ng”.

Jô̆ hơtŏ lơ̆m mĭnh sơnăm, Hơnih Khăm ming hơmet jĭ jăn Ƀô̆ đô̆i kon pơlei AXan sơng đei đơ̆ng 6.000 truh 8.000 ‘nu bơngai jĭ đơ̆ng 4 tơring kơ apŭng Tây Giang, dêh char Quảng Nam păng rim pơlei pơla tơjê̆ sơlam teh đak kơ apŭng Kà Lừm, dêh char Sê kông teh đak boăl Lào năm khăm păng ming hơmet jĭ jăn. Đơng sơnăm 2016 truh dang ei, Hơnih khăm ming hơmet jĭ jăn đei lăng ba tơ iung pơjing ming hơmet roi năr roi tih să, pơlăp đei lơ kmăi kmŏk pơ yoa ăn jang ming hơmet ji jăn gơ̆h hơgei nhen kmăi phĭn X-quang kih thuơ̆t kơsô̆, kmăi khăm hơlen pham, kmăi pơjing đei oxy, kmăi hyup iŏk đak đuh kơdou hăm ŭnh hơyuh 2 kơƀĭnh, hơnih pơm tơnŏ ăn nge ‘nao hơnhơl, 10 tŏ giơng tep ăn bơngai jĭ păng mĭnh tong gre pơgang vă chă chơ bơngai jĭ. Thượng Tá Bùi Văn Đức, Kơdră chĕp pơgơ̆r Kơđông Ƀô̆ đô̆i vei lăng sơlam teh đak Tr'hy tơbăt:“ Ƀak si Nguyễn Văn Quốc Trí tơƀôh hơdăh hơnăp jang kơtang ‘noh jing bơngai pơm hơdăh ang rang ‘lơ̆ng ăn khul ƀô̆ đô̆i vei lăng sơlam teh đak dêh char pơma atŭm adoi nhen kơ hơnih kơđông bơ̆n dou pơma hơdrô̆. Kon pơlei tơ̆ ou oei đei mĭnh ƀar ‘nu bơngai tim gan hlôh vao, kơ yuơ trong chă hơnăm mơmat tat, tơdăh ming hơmet ưh kơ tom păng chơ ba năm tơ̆ hnam pơgang pơgang kơpal lei kơtĕch 2 truh 3 jơ ‘mơ̆i mă truh tơ̆ hnam pơgang apŭng. Kơ yuơ lơ loh, tơdăh ưh kơ đei ƀai si Trĭ chă ming hơmet tơtom lei tôch kơ hơmơt đei tơdrong truh lôch răm hloi. Ƀak si Nguyễn Văn Quốc Trí jĭ bơngai hơdăh ang rang ‘lơ̆ng kơ hơnih bơ̆n adoi nhen pơ đĭ lơ̆m khul Ƀô̆ đô̆i vei lăng sơlam teh đak dêh char Quảng Nam hloi”

Dôm tơdrong jang ‘lơ̆ng hơ iă đơ̆ng ƀak si Nguyễn Văn Quốc Trí tơƀôh hơdăh jơhngơ̆m đon ‘mêm kơ eng, tơgoăt tơgoăl kơjăp ƀar păh ƀô̆ đô̆i hăm kon pơlei, pơjing đei jơhngơ̆m đon lui yom kơtang đơ̆ng kon pơlei oei tơ̆ tơring sơlam teh đak.  Dôm ƀok thây pơgang “kơlong jơk” nhen ƀak si Trĭ hlôi tơgop pơm hơtŏk ‘lơ̆ng rŏ hơbŏ nhen hloh dơ̆ng tơdrong joăt joe ‘lơ̆ng liĕm kơ bơngai ƀô̆ đô̆i Ƀok Hô tơ̆ tơring sơlam teh đak dêh char Quảng Nam”.