Kiơ̆ nơ̆r tơroi, lơ̆m sơnăm 2023, Đắk Lắk ưh đei bơngai jĭ grŏnh, mă lei truh tŏk bŏk sơnăm 2024, bơngai jĭ tŏk vă jê̆ truh 900 ‘nu, kŭm hăm 31 ‘nu bơngai jĭ rubella. 3 khei blŭng sơnăm 2025, kơsô̆ bơngai jĭ grŏnh roi kơ tŏk, đĭ đei truh 206 ‘nu bơngai jĭ bơih, tŏk 100% pơting hăm khei âu sơnăm 2024, akŏm tơ̆ dôm apŭng Buôn Đôn, Krông Pắc, M’Drắk păng Ea Súp. 30% bơngai jĭ grŏnh tơ̆ Đắk Lắk jĭ đe hơioh đơ̆ng 1-4 sơnăm, mă lơ ‘nŏh tam mă đei ƀet vắc xin tang găn jĭ.

Sơnăm sơ̆, kơsô̆ bơngai ƀet vắc xin tang găn jĭ grŏnh tơ̆ Đắk Lắk đei 95%, mă lei 2 khei blŭng sơnăm ‘nâu kơsô̆ âu lăp đei truh 15%. Ƀok Võ Hải Sơn, Phŏ Kơdră Anih tang găn jĭ jăn tơroi, vă tơgĕch jên, tơmam pơ ‘nhŏ ăn tơdrong pơtruh vắc xin ăn dêh char Đắk Lắk, pơm ‘lơ̆ng vă ƀet tôm vắc xin tang găn jĭ grŏnh ăn hơioh.