Kiơ̆ hla bơar tơbăt đơ̆ng Hơnih tơm Dăr lăng jĭ jăn dêh char Dak Lăk, jô̆ truh 12 jơ ‘năr dơ̆ng năr 31/3 lơ̆m dêh char hlôi ƀet vaccine bơ̆ng jĭ grŏnh đei 41.220 ‘nu lơ̆m akŏp 42.943 ‘nu mon. Jơnei 96%. Lơ̆m ou đei 3 apŭng ƀet bơ̆ng jơnei hloh ‘noh Buôn Đôn jơnei 98,7%, apŭng Cư Kuin jơnei 97,7% păng thĭ xah Buôn Hồ jơnei 97,3%. Ƀok Hoàng Hải Phúc, Kơdră chĕp pơgơ̆r Hơnih tơm Dăr lăng jĭ jăn dêh char Dak Lăk tơbăt, lơ̆m dôm năr kơnh, hơnih ou hơnơ̆ng dăr lăng hơlen dôm bơngai oei tim mă ƀet bơ̆ng vă ƀet bơ̆ng. Jô̆ truh năr 31/3, dêh char Dak Lăk đei 1.019 ‘nu bơngai pơlŏ lĕch đe păng 228 ‘nu bơngai jĭ grŏnh. Mă kăl, gơnơm atŏk kơtang ƀet vaccine, kơna lơ̆m giĕng ou ki, dêh char pă đei ƀôh dơ̆ng hơ ioh tơpoh jĭ grŏnh bơih.