Tơ̆ Anih jang pơgang Lĭnh kon pơlei tơring gĭt kăl Phú Quý, rim năr đei kơ hrĕng ‘nu kon pơlei truh khăm păng hơmet dôm tơdrong jĭ hmă. Dôm sơnăm tơ jê̆ âu, anih jang pơgang tơ̆ achon đak dơsĭ hlôi đei lơ tơplih rơđăh hăm tơdrong tơmơ̆t jên jang răt dơ̆ng bơ̆n tơmam, kơmăy kơmŏk, pơih să lơ tơdrong pơvih pơvăn ki thuơ̆t păng hơtŏk ‘lơ̆ng khăm hơmet jĭ kơtă hơnih. Lơ bơngai jĭ hơdrol ki athei chơ tŏk tơ̆ kông ‘noh dang ei đĭ gơh hơlen lăng, hơmet blŭng a păng hơmet hloi tơ̆ achon đak dơsĭ, tơgŭm kon pơlei tơ jur jên hơmet, jơ năr năm vih vơ̆t. Ƀok Nguyễn Văn Hai, tơ̆ thôn Quý Hải tơbăt, pơting hăm hơdrol ki, tơdrong khăm hơmet jĭ đĭ hiôk hloh bơih, khŭl y ƀak si jang tơnăp, pơm đei đon lui ăn kon pơlei.

“Dang ei bơ̆n truh khăm ‘noh đe ƀak si khăm ‘lơ̆ng, chơt rơhâu, khăm jĭ đang ‘noh asong pơgang ăn kơ kon pơlei. Lăp đei dôm bơngai jĭ ăl ‘noh athei chơ tơ̆ hnam pơgang nai đĕch, yua kơ tơ̆ achon đak dơsĭ oei mơmat tat”.

Tơdrong jang khăm hơmet jĭ hmă tơ̆ tơring gĭt kăl Phú Quý dang ei pơm lăp hăm ‘meh vă đơ̆ng kon pơlei. Mă lei, hăm dôm bơngai jĭ ăl nhen pơ̆k, pham bluh tŏk tơ̆ plei nuih dăh mă jĭ rơka lơ, tơdrong kơ̆p kư̆u păng hơmet kơtă anih oei tam mă ‘lơ̆ng. Lơ̆m kơplăh ‘noh, tơdrong chơ bơngai jĭ tŏk tơ̆ kông pơmơ̆ng lơ lơ̆m tŏ ‘mi kial păng năr duk, thŏng nan kơdâu, ƀơ̆t lăp đei jơ năr măh hơvơn gre vơ vêl vă tơ gar iŏk tơdrong hơrih ăn bơngai jĭ.

Kiơ̆ kơ ƀak si Bùi Thị Hảo, Phŏ Kơdră vei lăng Anih jang pơgang Lĭnh kon pơlei tơring gĭt kăl Phú Quý, ‘meh vă kăl hloh hrei ‘nâu ‘noh jĭ hơtŏk ‘lơ̆ng tơdrong hơmet kơ̆p kư̆u kơtă hơnih hloi vă tơ gĕch iŏk “jơ măih” dŏng hơrih hơngai jĭ. Dang ei anih jang oei ưh kơ măh dôm bơngai jang hơgei, mă loi ‘noh jĭ hơmet bơngai jĭ ăl, hơmet jĭ plei nuih păng jĭ kơ̆l ‘ngok. Vă hơmet pơ ‘lơ̆ng mơmat tat âu, Anih jang hlôi jang hơdai hăm Hnam pơgang Bạch Mai hơvơn dôm bơngai joăt jang kơtă năm tơ̆ achon đak dơsĭ pơhrăm kơ̆p kư̆u kơ tĕch jơhngơ̆m ưh kơ ê, hơdai hăm tơgŭm pơtho găh hơmet jĭ pơ̆k ăn khŭl jang pơgang tơring.

“Hrei ‘nâu anih jang hlôi đei Hnam pơgang Bạch Mai tơgŭm pơtho đĕch ăn kơ 1 khŭl joăt jang vă kơ̆p kư̆u jĭ pơ̆k, lơ̆m noh đei 1 ‘nu ƀak si păng 1 điều dưỡng. Âu ki đei Anih vei lăng găh jang pơgang bơngơ̆t truh tơmơ̆t jên jang răt 1 pôm kơmăy CT phĭn kơ̆p kư̆u jĭ pơ̆k. Hnam pơgang Bạch Mai kŭm tơgŭm ăn anih jang hơlen lăng tơdrong jĭ  trực tuyến, đŏk tơdrong đei jĭ đơ̆ng hơtăih, hơlen lăng vă kơ trŏ tơgŭm hơmet hrĕnh dôm bơngai jĭ kơ̆p kư̆u”.

Yă Huỳnh Thị Phương Duyên, Kơdră Anih vei lăng găh jang pơgang Lâm Đồng tơbăt, tơring gĭt kăl Phú Quý dang ei đei 121 ‘nu kang ƀô̆, bơngai jang pơgang, lơ̆m noh đei 29 ‘nu ƀak si, jĭ tơring đei kơsô̆ ƀak si kiơ̆ đei hơgăt lơ̆m kon pơlei lơ hloh dêh char. Hăm khŭl jang âu, anih jang pơgang pơm lăp hăm ‘meh vă khăm hơmet jĭ ăn kon pơlei tơ̆ achon đak dơsĭ, khŭl lĭnh ƀô̆ đô̆i păng kon pơlei jang ka bơ̆jang kiơ̆ đak dơsĭ.

Mă lei, tơ̆ hơnăp ‘meh vă hơtŏk tơiung roi ‘năr roi lơ, mă loi ‘noh lơ̆m khei ‘năr Phú Quý tŭn pran sơng đei chă tơmang lăng, anih jang pơgang Lâm Đồng hơnơ̆ng tơgŭm hơdrol hơtŏk ‘lơ̆ng tơdrong khăm hơmet jĭ, mă loi ‘noh hơmet jĭ ăl kơ̆p kư̆u. Kiơ̆ kơ yă Huỳnh Thị Phương Duyên, Anih vei lăng găh jang pơgang tŏk bŏk tơlĕch apĭnh hơmet ming, pơm ming anih jang, tơmam drăm păng tơmơ̆t dơ̆ng bơ̆n kơmăy kơmŏk vă pơm lăp ‘lơ̆ng hloh dơ̆ng ‘meh vă khăm hơmet jĭ lơ̆m tơdrong hơdrô̆ kơ tơring đak dơsĭ, achon đak dơsĭ.

“Tơdrong tôch kơ hơiă ‘noh jĭ đĭ đăng kang ƀô̆ jang pơgang kơ Phú Quý đĭ đei Anih jang kơ̆p kư̆u jĭ Pơ̆k Hnam pơgang Bạch Mai kơtă pơhrăm hơmet kơtĕch jơhngơ̆m ưh kơ ê păng hlôi đei asong hla ar pơkăp. Hơdai hăm ‘noh, Hnam pơgang Bạch Mai kŭm pơkăp tơgŭm đĕch pơđĭ jên pơtho pơhrăm ăn Phú Quý truh sơnăm 2028”.

Tơdrong hơtŏk loi dơ̆ng bơngai jang, pơhrăm joăt jang gơh hơgei păng răt bơ̆n tơmam kơmăy kơmŏk ưh khan lăp tơgŭm hơtŏk ‘lơ̆ng khăm hơmet jĭ ăn kon pơlei tơring gĭt kăl Phú Quý mă oei tơgop vei sơđơ̆ng ăn kon pơlei jang ka păng tơmoi chă tơmang lăng tŏk bŏk tơring đak dơsĭ, achon đak dơsĭ hơtăih kơ kông. ‘Nâu kŭm jing hơyak hơmet ăn gĭt kăl vă anih jang pơgang Phú Quý pơm lăp ‘lơ̆ng hloh dôm tơdrong kơ̆p kư̆u dei dei lơ̆m tơdrong đei hơdrô̆ tơ̆ đak dơsĭ, achon đak dơsĭ.