Pơma găh tơdrong jĭ pơlŏ lĕch đe sơnăm ‘nâu, PGS.TS Trần Đắc Phu, sơ̆ pơm Kơdră Anih jang pơgang tang găn tơdrong jĭ jăn akhan, tơdrong jĭ ‘nâu hrei ‘nâu ưh pă đei kiơ̆ pơyan bơih. Tơdăh adrol sơ̆ jĭ đa đei lơ̆m pơyan ‘mi đang kơ ‘nŏh roi jur ƀiơ̆, ‘nŏh dang ei kơsô̆ bơngai jĭ đei hơnơ̆ng prăt sơnăm, jô̆ hloi lơ̆m pơyan phang, ăn ƀôh tơdrong krê kơ tơpŏh jĭ oei đei hơnơ̆ng lơ̆m tơpôl: “Tơdrong hơmơt đei jĭ tơpoh ‘nŏh hrei ‘nâu pơtơm đei dêh ƀiơ̆ pơting hăm khei âu sơnăm sơ̆, nơ̆r akhan ưh gơ̆h băt hơdrol ‘nŏh roi trŏ ƀiơ̆ yoa ưh pă đei kiơ̆ khei pơyan vă bơ̆n gơ̆h tơdra hơdrol nhen adrol sơ̆. Sơnăm ‘nâu đei lơ tơdrong ưh kơ ‘lơ̆ng, nhen tŏ ‘mi kial, tơdrong yak vih vât đơ̆ng kon pơlei kŭm tŏk lơ. Păng mưh ‘năr tŏ dêh ‘nŏh, gô đei ‘mi lơ, hơyuh ‘năr tŏ kơpal kơ 25 đô̆ jing tơdrong ‘lơ̆ng ăn hơngĕnh chĕp ba pơrang jĭ pơlŏ lĕch đe chek lar.”

Tơ̆ plt Hồ Chí Minh đei bơngai jĭ pơlŏ lĕch đe lơ hlŏh lơ̆m teh đak, jô̆ truh khei 6/2026, đĭ đei 18 rơbâu ‘nu bơngai jĭ păng 4 ‘nu bơngai lôch. Bơngai jĭ pơlŏ lĕch đe đei tơ̆ đĭ đăng tơring lơ̆m plt. Kiơ̆ Anih jang pơgang plt, jĭ pơlŏ lĕch đe sơnăm ‘nâu nhen roi vă tŏk ƀiơ̆, hrôih ƀiơ̆ kơ adrol ki. Mĭnh tơdrong krê dơ̆ng ‘nŏh grŭp bơngai đei jĭ kŭm roi tơplih. Hrei ‘nâu, hlŏh 1 puăt kơsô̆ bơngai jĭ ‘nŏh jĭ bơngai ‘lŏ, lơ̆m noh grŭp đơ̆ng 11 truh 30 sơnăm đei tôch lơ. Tơdrong ‘nâu ăn ƀôh jĭ pơlŏ lĕch đe ưh kơsĭ tơdrong jĭ lăp đei lơ tơ̆ đe hơioh nhen lơ bơngai juăt tơchĕng đĕch.

Tiến sỹ, ƀak si Trương Hữu Khanh, Phŏ Kơdră vei lăng Khul jang pơgang tang găn jĭ tơpŏh plt Hồ Chí Minh, đei nơ̆r tơtă: “Tơdrong krê đơ̆ng jĭ pơlŏ lĕch đe ‘nŏh ƀât pă đei chĕp yuh bơih mă lei oei gơ̆ hơkâu. Kơna bơngai jĭ ‘nŏh mưh pă đei yuh bơih mă lei athei hiôk rơhău, hơkâu jăn hiôk ‘lơ̆ng thoi hmă, pă đei ƀôh lap kiơ ‘mơ̆i mă gơ̆h năng jĭ sơđơ̆ng ‘lơ̆ng. Oei tơdăh bơngai ‘nŏh pă đei yuh bơih mă lei oei ưh kơ prăih jĭ, đa tơtok vinh măt, jĭ klak dăh mă lap, sŏng xa kơ lŭ ‘nŏh oei tôch hơmơt jĭ gơ̆ đĕch. Kơna bơ̆n athei hơlen năng pơ ‘nơ̆k, pơtŏ lăng huyêt âp. Đang kơ ‘nŏh năm khăm dơ̆ng mă đơ̆ng pă đei yuh bơih ră.”

Dôm bơngai juăt jang pơgang akhan, lơ kon pơlei oei lăng pơhơi hăm tơdrong jĭ ‘nâu. Đei bơngai chă răt pơgang hơmet kơdih tơ̆ hnam mă ưh ‘nŏh năm tơ̆ hnam pơgang klui yoa akhan ‘nâu jĭ tơdrong jĭ chĕp pơlŏ, tŏ hơkâu hmă đĕch. Kơplăh ‘nŏh jĭ pơlŏ lĕch đe tôch ƀônh đei jĭ ăl, gơ̆ hơkâu, lĕch pham, rơmơ̆n lơ̆m hơkâu jăn jing lôch răm tơdăh ưh đei băt hrôih, năm hơmet tơtom.

Ƀok Võ Hải Sơn, Phŏ Kơdră Anih jang pơgang tang găn jĭ jăn, Anih tơm vei lăng jang pơgang ăn tơbăt, kon pơlei athei sut hŭt lê̆ dôm đon tơchĕng ưh kơ trŏ nhen akhan, hơngenh pơm tơpŏh jĭ lăp đei tơ̆ tơring đak ‘mê̆ ‘mach đĕch dăh mă bơngai arih tơ̆ hnam chung cư, hnam tơ̆ng ưh gan đei jĭ. Mă tơpă, hơngĕnh brônh đa chek lar lơ̆m dôm kơthŭng mong đak rơgoh kơtă lơ̆m hnam nhen kơƀĭnh pơkao, kơchâ̆u ‘long pơrŏ, kơchŏk mong đak lơ̆m hơtuh tơngiĕt dăh mă dôm tơmam mong đak iơ iĕ nai: “Nơ̆r tơbăt đơ̆ng sơnăm ‘nâu ‘nŏh ưh đei klanh ưh đei jĭ pơlŏ lĕch đe. Kơna nhôn kŭm hơpơi ‘mĕh rim unh hnam, rim giĕng ‘măn dang 10 pơnĭt vă hơlen năng anih đei klanh, phă hŭt lê̆ tơdăh đei lơ̆m hnam.”

Jĭ pơlŏ lĕch đe ‘nŏh jĭ tơdrong jĭ tôch hơmơt mă lei gơ̆h tang găn hơdrol tơdăh rim bơngai đei đon kơchăng vei lăng ‘lơ̆ng jơhngâm pran kơdih kâu păng tơpôl; hơnơ̆ng tơplih đak lơ̆m kơƀinh pơkao; mong akŏm râm rĕk păng kơlơ̆p lê̆ dôm tơmam ưh đei yoa. Atŭm hăm ‘nŏh, kon pơlei tep athei chô̆ kơmŭng, pơm kiơ̆ dôm trong tang găn hơngĕnh kăp păng jang hơdoi hăm anih jang pơgang lơ̆m dôm tơdrong jang vei lăng rơgŏh cham char, pơlôch hŭt klanh lơ̆m hnam păng tơpôl./.