Đơ̆ng blŭng sơnăm truh dang ei, dêh char Đắk Lắk chih iŏk 1.518 ‘nu bơngai jĭ pơlŏ lĕch đe tơ̆ 14 hơnih đei jĭ, tŏk 154% pơting hăm khei ‘nâu sơnăm 2025. Kăl kơ lăng truh, lăp lơ̆m giĕng âu ki đĭ đei hloh 210 ‘nu jĭ pơlŏ lĕch đe măh năm hơmet tơ̆ dôm anih jang pơgang lơ̆m tơring. Rim tơring chih iŏk lơ bơngai jĭ hloh ‘noh phường Tuy Hòa, Buôn Ma Thuột păng dôm xăh Phú Hòa, Đồng Xuân, Sông Hinh, Krông Ana, Ea Súp, Ea H’leo...

Ƀak si Lê Phúc, Phŏ Kơdră Anih vei lăng tơdrong jĭ jăn dêh char Đắk Lắk (CDC Đắk Lắk), tơbăt tơ̆ hơnăp đei ƀôh tŏk đơ̆ng kơsô̆ bơngai jĭ lơ̆m dôm năr tơ jê̆ âu, anih jang tŏk bŏk jang hơdai hăm khŭl jang pơgang tơ̆ rim xăh, phường tơlĕch jang hrơ̆ch dôm trong jang tang jĭ pơlŏ lĕch đe.

Lơ̆m noh, akŏm tŭn pran roi tơbăt, hơtŏk ‘lơ̆ng đon hlôh vao đơ̆ng kon pơlei găh pơm rơgoh cham char, hŭt lê̆ hơnih chek lar đơ̆ng mur; ƀlă kơ ‘noh jang hơdai hăm dôm anih jang pơgang tơring, hnam pơgang xăh, phường pơgơ̆r pruih pơgang, pơlôch klanh, mur maih tơ̆ dôm hơnih đei jĭ vă tang găn jĭ tơpoh lanh, pơhrăm ăn khŭl jang pơgang tơ̆ tơ̆ tơring găh tang găn jĭ pơlŏ lĕch đe.

“Nhôn hơtŏk ‘lơ̆ng păng jang hrĕnh tơdrong jang tang găn véc-tơ, vă khan ‘noh jĭ dăr hơlen, hơmet ‘lơ̆ng mur, klanh ăn khŭl jang pơgang tơ̆ tơring tơ̆ dôm Hnam pơgang xăh, phường. Đơ̆ng noh, hơtŏk ‘lơ̆ng khŭl jang đơ̆ng đe sư vă pơm lăp hăm tơ dra hơdrol đei hơmơt tơ̆ rim tơring, vă bơ̆jang hiôk tơdrong jang tơ dra hơdrol kŭm nhen iŏk yua hloh lơ̆m tơdrong jang tang găn jĭ pơlŏ lĕch đe”.

Đơ̆ng blŭng sơnăm truh dang ei, lơ̆m dêh char Gia Lai chih iŏk 1.813 ‘nu jĭ 1 ‘nu lôch. Pơting hăm khei ‘nâu sơnăm 2025, kơsô̆ bơngai jĭ tŏk 914 ‘nu. Vă kơchăng vei lăng păng tang găn jĭ pơlŏ lĕch đe tŏk, Anih vei lăng tơdrong jĭ jăn dêh char hlôi pơgơ̆r khŭl bơ̆jang tơlĕch jang dăr hơlen lăng tơdrong jĭ pơlŏ lĕch đe, tơdrong jang tang găn păng hơmet pơ ‘lơ̆ng hơnih đei tơdrong jĭ tơ̆ dôm xăh tơm, chih iŏk lơ bơngai jĭ lơ̆m giĕng âu ki.

Mă hơdăh, anih jang ‘nao tơlĕch jang dăr hơlen tơ̆ xăh Bình An. Khŭl bơ̆jang hlôi bơ̆jang hăm khŭl kơdră chĕp kơ̆l Anih vei lăng kon pơlei xăh, Hnam pơgang xăh Bình An, Anih jang pơgang Tây Sơn găh tơdrong jang tang găn jĭ pơ lŏ lĕch đe tơ̆ tơring, tơdrong bơngai jĭ pơlŏ lĕch đe, tơdrong jang hơmet pơ ‘lơ̆ng hơnih đei jĭ, pơlôch klanh, mur măih, pruih pơgang; jang hơdai păng tơgŭm tơring tơlĕch jang hơmet pơ ‘lơ̆ng hơnih đei jĭ pơlŏ lĕch đe.

Kiơ̆ kơ Anih vei lăng jang pơgang dêh char Gia Lai, vă tơdrong jang tang găn jĭ pơlŏ lĕch đe jơnei, rim tơring kăl hơnơ̆ng tơlĕch jang tơdrong jang hơmet pơ ‘lơ̆ng hơnih đei jĭ; lăng kăl tơdrong jang pơlôch klanh, vei lăng rơgoh cham char, vei lăng rơgoh hnam oei; hơtŏk loi dơ̆ng roi tơbăt tang găn jĭ pơlŏ lĕch đe tơ̆ dôm ŭnh hnam, tơ̆ rim hnam trưng hŏk păng tơ̆ aloa pơre nơ̆r kơ tơring; dăr hơlen mur păng klanh hơnơ̆ng vă đei dôm trong jang hơmet pơ ‘lơ̆ng tơtom, veh ver kơ jĭ đei ƀôh păng lanh să.

Truh dang ei, dêh char Lâm Đồng chih iŏk 1.126 ‘nu jĭ pơlŏ lĕch đe; chih iŏk 48 ‘nu đei jĭ ‘nao lơ̆m giĕng păng 10 hơnih đei jĭ tŏk bŏk đei, akŏm tơ̆ dôm tơring nhen: Đạ Huoai, Bảo Lộc, Di Linh, Tánh Linh, Đức Linh păng Bắc Bình. Kiơ̆ kơ Anih vei lăng jang pơgang dêh char Lâm Đồng, mă đơ̆ng kơsô̆ bơngai jĭ đei jur ƀiơ̆ pơting hăm khei ‘nâu sơnăm hơdrol, mă lei jĭ hlôi đei ƀôh hrôih, lơ tơring krê hơmơt kơ đei ƀôh jĭ lơ tơ̆ hơnăp kơnh mưh yak mơ̆t pơyan ‘mi.

Vă kơchăng vei lăng jĭ, tang găn tŏ sĕt hloh kơsô̆ bơngai đei jĭ, bơngai jĭ dêh păng lôch yua đơ̆ng jĭ pơlŏ lĕch đe, Anih vei lăng jang pơgang athei Anih vei lăng tơdrong jĭ jăn dêh char hơtŏk loi dơ̆ng dăr hơlen pơrang jĭ. Tơtom chă ƀôh hrôih dôm bơngai jĭ, hơnih đei jĭ ‘nao đei vă pơgơ̆r hơmet pơ ‘lơ̆ng pơtôch, ưh kơ lê̆ jĭ lanh să pơdui đunh. Kơchăng hơmet ăn tôm măh pơgang, tơmam kơmăy kơmŏk, tơmam pơgang pơyua ăn tơdrong jang tang găn jĭ; pơgơ̆r hơlen lăng, dăr lăng hơnơ̆ng tơ̆ dôm tơring đei hơmơt lơ.