Krê loi, lăp lơ̆m gĭeng âu ki, kơsô̆ bơngai jĭ đĭ tŏk tôch lơ, hăm hlŏh 210 ‘nu bơngai jĭ athei chơ hơmet tơ̆ hnam pơgang. Tơdrong jĭ tơpŏh dêh hlŏh tơ̆ phường Tuy Hòa, păng dôm xăh Phú Hòa, Đồng Xuân, Sông Hinh, Krông Ana, Ea Súp, Ea H’leo găh dêh char Đắk Lắk. Tơdrong tang găn jĭ, vei lăng jơhngâm pran ăn kon pơlei kơplăh dang ei jĭ  tơdrong gĭt kăl hlŏh, ưh gơ̆h hŭt đon kơchăng, lăng pơhơi kiơ.

Tơdrong tơm jing đei jĭ tơpŏh dêh tơ̆ dôm xăh, phường ‘nŏh yoa tŏ ‘mi ưh kơ sơđơ̆ng, pơm ‘lơ̆ng ăn hơngĕnh brônh chek lar. Tơdrong krê hlŏh dơ̆ng, tơ̆ lơ pơlei pơla hơtăih yăih, tơdrong juăt iŏk yoa bô̆i, kơthŭng mong đak ‘mi ming tơ̆ ‘ngoăih ưh đei klơ̆p tơ nglơ̆p, kŭm hăm tơdrong juăt ưh đei hơpuih hơmet cham cham ‘you rơgoh, hŭt bô̆i, pơnhan pơchăh kư̆ kă jŭm dăr hnam đơ̆ng 1 kơsô̆ bơngai jing pơm anih "cheh kơtăp, chek lar" đơ̆ng mur.

Tơ̆ hơnăp tơdrong krê hơmơt âu, Anih vei lăng tơdrong jĭ jăn dêh char Đắk Lắk oei jang hơdoi kơjăp hăm khul jang pơgang tơ̆ tơring tơlĕch jang hrơ̆ch ‘lơ̆ng lơ trong jang. Hơdai hăm pruih pơgang pơlôch pơgang jĭ, tơdrong pơtâp pơhrăm, hơtŏk đon hlôh vao găh tơdrong hơmơt jĭ tơpŏh tơ̆ tơring đơ̆ng dôm hnam pơgang xăh, phường kŭm đei năng kăl. Pơma găh trong jang tơm âu, Ƀak si Lê Phúc, Phŏ Kơdră Anih vei lăng tơdrong jĭ jăn dêh char Đắk Lắk ăn tơbăt:

 “Nhôn hơtŏk đon kơchăng păng jang hrĕnh tơdrong tang găn véc-tơ, vă akhan hơlen năng, hơmet pơ ‘lơ̆ng anih đei mur, klanh hăm khul jang pơgang tơ̆ dôm hnam pơgang xăh, phường. Đơ̆ng noh, hơtŏk đon jang rơgei ăn đe sư, pơm lăp hăm tơdrong tơdra hơmet đei jĭ tơ̆ poh tơ̆ tơring, vă jang ‘lơ̆ng tơdrong tơdra hơdrol kŭm nhen jang đei lơ tơdrong ‘lơ̆ng ƀiơ̆ lơ̆m tơdrong tang găn jĭ pơlŏ lĕch đe.”

Đon pơhnŏng đơ̆ng anih jang pơgang 'nŏh tôch tih, mă lei tơdrong jang tang găn jĭ pơlŏ lĕch đe lăp gơ̆h đei jơnei 'lơ̆ng ăp mă đei đon kơchăng đơ̆ng kon pơlei 'mơ̆i. Tơplih ăn đon lăng pơhơi gô đei jĭ 'mơ̆i na tang găn, rim unh hnam athei ‘măn dang 10 pơnĭt 1 giĕng vă klơ̆p hơmet dôm tơmam mong đak, hơpuih hơmet râm rĕk păng pơjing đon juăt tep chô̆ kơmŭng jô̆ hloi tơ̆ kơ 'năr. Athei kơchăng đơ̆ng dôm tơdrong iĕ hlŏh vă vei lăng jơhngâm pran ăn unh hnam păng vei lăng 'lơ̆ng tơdrong hiôk sơđơ̆ng ăn tơpôl lơ̆m pơyan 'mi 'nâu.