Mŏ Võ Thị Tuyết Nhung, bơ̆  jang tơ̆ Khoa hơmet jĭ klak, jĭ 1 ‘nu bơngai jng rơgei. 9 sơnăm bơ̆ jang tơ̆ âu, mŏ ưh lăp đĭ jơhngâm vei lăng, hơmet jĭ ăn đe hơioh đĕch, mă mŏ oei lơ ‘măng plang song pham mưh đei tơdrong kăl dơ̆ng. Truh dang ei, mŏ hlôi 22 vât plang song pham dŏng bơngai jĭ ăl, tơtom dŏng đei lơ bơngai jĭ ăl. Hăm mŏ, rim ‘măng plang song pham ‘nŏh thoi pơtruh dơ̆ng tơdrong arih ăn bơngai nai.

“Ƀât dôm ‘măng dŏng hơmet ăn bơngai jĭ ăn thoi noh, inh pôm tơchĕng plang song pham ăn  đe boăl, hơnhăk dơ̆ng tơdrong arih ăn boăl. Mưh jang đei tơdrong ‘nŏh inh ƀôh tôch hơiă yoa inh jang đei 1 tơđrong ‘lơ̆ng ăn bơngai nai. Ưh lăp hơdrô̆ inh hơnhăk tơdrong ‘nâu truh hăm lơ bơngai ôh, mă oei đei hloi klo, mĕ inh, ‘nhŏng oh nhôn, vă rim bơngai lơ̆m unh hnam nhôn vang plang song pham ngăl. Mưh đei bơngai jĭ ăl, kăl đei pham kiơ ‘nŏh nhôn chu plang song ăn boăl hloi.”

Kŭm hăm mŏ Nhung, plang song pham jing tơdrong đei hơnơ̆ng hăm khul kăn ƀô̆, bơngai jang pơgang tơ̆ Hnam pơgang hơmet jĭ ăn Hơioh Gia Lai. Kơdră chĕp kơ̆l anih jang mŏ Đỗ Thị Thu Hà ăn tơbăt: “Inh tơchĕng ba song 1 kơtoh pham nhen gơ̆t đei 1 tơdrong arih, inh tơchĕng ‘noh jĭ tơdrong tôch ‘lơ̆ng. Kơplăh doh inh ưh đei tơchĕng tơdrong ba plang song ‘nŏh tih yă kiơ ôh. Mưh ƀôh bơngai jĭ oei pơhual tôch pơmat kăl đei dŏng tơgŭm ‘noh inh tơchĕng, ba gơ̆h tơgŭm ‘năi kơna chu plang song pham hloi.”

Dăh mă tơ̆ khoa hơmet jĭ ăl nhen ƀak si Rmah Din hơnơ̆ng lơ ‘măng plang song pham, pơma: “Đĭ đăng bơngai jang tơ̆ Hnam pơgang hơmet jĭ ăn Hơioh âu bu bu kŭm đei đon ‘mĕh plang song pham vă dŏng arih ăn bơngai jĭ ăl ngăl. Jơhngâm đon yoa bơngai jĭ kăl hlŏh, kơna đe ƀak si dăh mă dôm bơngai điều dưỡng, dôm bơngai jang nai lơ̆m hnam pơgang hơnơ̆ng pơm kiơ̆ tơdrong jang plang song pham vă dŏng arih bơngai jĭ.”

Năng ƀôh tơdrong hơmet jĭ pham ưh đei krăl đơ̆ng nge (Thalassemia) kơ kon tơ̆ hnam Pơgang hơmet jĭ ăn hơioh Gia Lai, mŏ Nông Thị Tươi, oei tơ̆ xăh Ia Piơr čhưu jơhngâm ‘mêm băt tơ̆ hơnăp đon jang tôch tơnăp đơ̆ng khul ƀak si tơ̆ âu. Lơ̆m jơnăr krê hơmơt hlŏh dăh mă dôm ‘măng ưh kơ măh pham vă hơmet jĭ, đe ƀak si chu plang song pham kơdih hloi vă tơtom dŏng đei tơdrong arih ăn đe hơioh jĭ ăl: “Mon hnam nhôn jĭ pham hach, ưh đei krăl đơ̆ng nge, rim khei athei năm truyên pham tơ̆ âu, athei truyên pham hơnơ̆ng. Păng tơ̆ âu đei hloi pham đơ̆ng đe plang song vă vei lăng ‘lơ̆ng jơhngâm pran ăn đe kon mon.”

Dôm kơtoh pham ‘mêm kơeng ưh lăp vang dŏng arih ăn lơ bơngai jĭ đĕch, mă oei tưk tơiung jơhngâm đon ‘mêm băl lơ̆m tơpôl. ‘Noh kŭm jing 1 tơdrong tơƀôh hơdăh nơ̆r pơtho “Bơngai jang pơgang nhen thoi bơngai mĕ iâm dim” mưh bơngai jang pơgang ưh lăp hơmet jĭ đĕch, mă oei pơjao hloi tơdrong hơmĕng gơ̆h arih ăn bơngai nai, kiơ̆ đơ̆ng dôm tơdrong jang plang song pham tôch gĭt kăl ‘noh.