Đơ̆ng blŭng sơnăm truh dang ei, dêh char Lâm Đồng chih iŏk 1.073 ‘nu jĭ jơ̆ng ti ƀơ̆r, dang 95% tơ̆ hơioh hơla kơ 5 sơnăm. Tơdra hơdrol tơ̆ hơnăp kơnh, jĭ gô hơnơ̆ng kơ tŏk păng đei ƀôh krê hơmơt. Vă kơchăng vei lăng jĭ, Anih vei lăng jang Pơgang athei Anih vei lăng Pơtho pơhrăm athei rim hơnih pơtho pơhrăm, mă loi ‘noh jăl mầm non păng jăl 1, tơlĕch jang tơpăt dôm trong jang tang găn jĭ, tơm ‘noh jĭ pơm kiơ̆ trong jang kăl “3 rơgoh”: sŏng sa rơgoh, oei rơgoh păng tơpang ti rơgoh.

Anih vei lăng jang Pơgang kŭm athei anih vei lăng pơtho pơhrăm jang hơdai kơjăp hăm anih jang pơgang lơ̆m roi tơbăt, dăr hơlen păng hơmet pơ ‘lơ̆ng hơnih đei jĭ; roi tơbăt ăn thây kô pơtho, mĕ ƀă lăng băt đei ƀôh jĭ păng trong tang găn hơdrol.