Hơnih bơ̆ jang pơgang dêh char tŏk bok atŏk kơtang rim trong jang vă pơm tơjur măt bơngai tơpoh ‘nao adoi nhen ming hơmet kĕ kăih ăn bơngai jĭ.Đơ̆ng blŭng sơnăm truh dang ei, dêh char Dak Lăk hlôi đei 602 ‘nu bơngai tơpoh jĭ jơ̆ng ti ƀơ̆r tơ̆ đe hơ ioh, tŏk 10% pơtêng hăm dôm khei ou lơ̆m sơnăm sơ̆, tim mă đei bơngai lôch ră. Mĭnh ƀar tơring đei măt bơngai jĭ lơ nhen phương Buôn Ma Thuột, Tuy Hoà, rim tơring Sông Hinh, Krông Pach, Liên Sơn Lăk, Buôn Đôn, Cư M’gar…Ƀak si Hoàng Hải Phúc, Kơdră chĕp pơgơ̆r Hơnih tơm Dăr lăng hơlen jĭ jăn dêh char Dak Lăk tơbăt, ‘năr tŏ pơđang pơm roi kơtang tơdrong hơmơt đei hơbuh jĭ jơ̆ng ti ƀơ̆r. Hơnih jang pơgang dêh char Dak Lăk tŏk bŏk tơlĕch jang rim trong jang tang găn hơlou, tơjră tang găn, adoi atŏk kơtang tơroi tơbăt vă kon pơlei hlôh vao vang iung jang tang găn tơdrong jĭ ou.